തിരുവനന്തപുരം: കൃഷി വകുപ്പ് മേധാവി ബി അശോക് ഐഎഎസിന് സ്ഥാനമാറ്റം. കേര പദ്ധതി വാര്‍ത്ത ചോര്‍ത്തല്‍ വിവാദത്തിന് പിന്നാലെയാണ് കൃഷി വകുപ്പ് പ്രിന്‍സിപ്പല്‍ സെക്രട്ടറി സ്ഥാനത്ത് നിന്ന് അശോകിനെ കെടിഡിഎഫ്‌സി ചെയര്‍മാന്‍ സ്ഥാനത്തേക്ക് മാറ്റിയത്. കൃഷി വകുപ്പ് മേധാവിയായി ടിങ്കു ബിസ്വാളിനെ നിയമിക്കുകയും ചെയ്തു. 

കേര പദ്ധതിക്ക് ലോകബാങ്ക് നല്‍കിയ ഫണ്ട് വകമാറ്റിയ വിവരം മാധ്യമപ്രവര്‍ത്തകര്‍ക്ക് ലഭിച്ച സംഭവം അന്വേഷിച്ച് ബി അശോകായിരുന്നു. വിഷയത്തില്‍ മുഖ്യമന്ത്രിയുടെ ഓഫീസിനെ പ്രതിരോധത്തിലാക്കിയ റിപ്പോര്‍ട്ടാണ് ഇദ്ദേഹം സമര്‍പ്പിച്ചത്. കൃഷി വകുപ്പിലെ നാല് ഉദ്യോഗസ്ഥര്‍ മാത്രം കൈകാര്യം ചെയ്ത ഫയല്‍ എങ്ങനെ മുഖ്യമന്ത്രിയുടെ ഓഫീസിന് ലഭിച്ചെന്ന് അന്വേഷണ റിപ്പോര്‍ട്ടില്‍ അദ്ദേഹം സൂചിപ്പിച്ചിരുന്നു. ഇതിന് പിന്നാലെയാണ് അശോകിന്റെ സ്ഥാനം തെറിച്ചത്. 

ALSO READ: നെഹ്‌റു ട്രോഫി വള്ളംകളി; ജലരാജാവായി വീയപുരം ചുണ്ടന്‍,കിരീട നേട്ടം ഫോട്ടോ ഫിനിഷിൽ 

കേരളത്തിന്റെ കാര്‍ഷിക മേഖല നവീകരണത്തിനായി ലോകബാങ്ക് കേര പദ്ധതിയില്‍ ഉള്‍പ്പെടുത്തി കേരളത്തിന് അനുവദിച്ച 2365.48 കോടി രൂപയുടെ വായ്പ വകമാറ്റി ചെലവഴിച്ചത് വലിയ വിവാദമായിരുന്നു. വാര്‍ത്ത ചോര്‍ന്നതിന് പിന്നാലെ മുഖ്യമന്ത്രിയുടെ ഓഫീസിലെ ഉന്നതന്‍ ഇടപെട്ട് അന്വേഷണവും പ്രഖ്യാപിച്ചിരുന്നു. ഇതിന് പിന്നാലെയാണ് അശോകിനെ സ്ഥലം മാറ്റുന്നത്. 

പൊതുവെ ജൂനിയര്‍ ഐഎഎസ് ഉദ്യോഗസ്ഥരെ നിയമിക്കുന്ന തസ്തകയിലേക്കാണ് സ്ഥലം മാറ്റിയത്. ഇതിനെതിരെ അശോക് നിയമനടപടി സ്വീകരിക്കുമെന്നാണ് വിവരം. നേരത്തെ കൃഷി വകുപ്പില്‍ നിന്ന് ഒഴിവാക്കി തദ്ദേശ വകുപ്പ് ഒംബുഡ്‌സ്മാനായി നിയമിച്ചതിനെതിരെ അശോക് സെന്‍ട്രല്‍ അഡ്മിനിസ്‌ട്രേറ്റീവ് ട്രൈബ്യൂണലിനെ സമീപിച്ചിരുന്നു. ടൈബ്രൂണല്‍ തല്‍സ്ഥിതി തുടരാന്‍ ഇടക്കാല ഉത്തരവിടുകയും ചെയ്തിരുന്നു. 

Ashok, the Principal Secretary of the Agriculture Department, has been transferred