തിരുവനന്തപുരം: കേരള ക്രിക്കറ്റ് ലീഗിൽ അദാനി ട്രിവാൻഡ്രം റോയൽസിനെതിരെ കാലിക്കറ്റ് ഗ്ലോബ്സ്റ്റാർസിന് 13 റൺസിന്റെ ആവേശ വിജയം. തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് വീശിയ കാലിക്കറ്റ് 20 ഓവറിൽ ആറ് വിക്കറ്റ് നഷ്ടത്തിൽ 186 റൺസാണ് നേടിയത്, വിജയലക്ഷ്യം പിന്തുടർന്ന ട്രിവാൻഡ്രം റോയൽസ് 19.3 ഓവറിൽ 173 റൺസിന്‌ പുറത്താവുകയായിരുന്നു. 

കാലികാറ്റിനായി വെടിക്കെട്ട് പ്രകടനം നടത്തിയ സൽമാൻ നിസാറാണ്‌ കളിയിലെ താരം. 26 പന്തിൽ പുറത്താവാതെ 86 റൺസാണ് സൽമാൻ നേടിയത്. 12 കൂറ്റൻ സിക്സുകളാണ് താരം അടിച്ചെടുത്തത്. ടീം സ്കോർ 18 ഓവറിൽ നിൽക്കുമ്പോൾ ആറ് വിക്കറ്റ് നഷ്ടത്തിൽ 115 റൺസ് എന്ന നിലയിലായിരുന്നു കാലിക്കറ്റ് ഉണ്ടായിരുന്നത്.

ഇവിടെനിന്നും ഞെട്ടിപ്പിക്കുന്ന പ്രകടനത്തിലൂടെ സൽമാൻ കാലിക്കറ്റിനെ മികച്ച സ്‌കോറിൽ എത്തിക്കുകയായിരുന്നു. അവസാന 12 പന്തിൽ നിന്നും 71 റൺസാണ് സൽമാൻ അടിച്ചുകൂട്ടിയത്. അവസാന ഓവറിൽ അഞ്ചു സിക്സുമാണ് താരം നേടിയത്. ടി-20 ക്രിക്കറ്റിൽ അവസാന രണ്ട് ഓവറിൽ ഒരു ടീം നേടുന്ന ഏറ്റവും ഉയർന്ന റൻസാണിത്. 

മത്സരത്തിൽ കലികാറ്റിനായി സൽമാന് പുറമെ മരുതുങ്ങൽ അജിനാസ് അർദ്ധ സെഞ്ച്വറിയും നേടി. 50 പന്തിൽ മൂന്ന് ഫോറുകളും നാല് സിക്സുകളും അടക്കം 50 റൺസാണ് അജിനാസ് നേടിയത്. കാലിക്കറ്റിൽ ബൗളിങ്ങിൽ അഖിൽ സ്കറിയ നാല് വിക്കറ്റുകൾ നേടി മിന്നും പ്രകടനം നടത്തിയപ്പോൾ റോയൽസ് 173 റൺസിൽ പുറത്താവുകയായിരുന്നു. 

നിലവിൽ കേരള ക്രിക്കറ്റ് ലീഗ് പോയിന്റ് പട്ടികയിൽ രണ്ടാം സ്ഥാനത്താണ് കാലിക്കറ്റ്. ഏഴു മത്സരങ്ങളിൽ നിന്നും നാല് വിജയവും രണ്ട് തോൽവിയും അടക്കം എട്ട് പോയിന്റാണ് കാലിക്കറ്റിൽ കൈവശമുള്ളത്. അതേസമയം ഏഴു മത്സരങ്ങളിൽ നിന്നും ഒരു വിജയവും ആറ് തോൽവിയും അടക്കം രണ്ട് പോയിന്റോടെ അവസാന സ്ഥാനത്താണ് റോയൽസ്. 

Salman Nizar Great Performance For Calicut Globstars in Kerala Cricket League