തെൽ അവീവ്: യെമനിൽ നിന്ന് ഇസ്‌റാഈൽ ലക്ഷ്യമാക്കി മിസൈൽ ആക്രമണം. തെക്കൻ ഇസ്‌റാഈലി നഗരമായ ബീർഷെബയിലേക്ക് ആണ് യെമന്റെ മിസൈൽ ആക്രമണം ഉണ്ടായത്. ആക്രമണത്തിന്റെ ഉത്തരവാദിത്തം യെമന്റെ ഹൂത്തി സേന ഏറ്റെടുത്തു. യെമനിൽ നിന്ന് ഇസ്‌റാഈൽ പ്രദേശം ലക്ഷ്യമാക്കി ഒരു മിസൈൽ വിക്ഷേപണം നടന്നതായി ഇസ്‌റാഈൽ സൈന്യം സ്ഥിരീകരിച്ചു. 

ശനിയാഴ്ച നടന്ന മിസൈൽ ആക്രമണത്തിന് ഉത്തരവാദി ഹൂത്തി സംഘമാണെന്ന് ഹൂത്തി സൈനിക വക്താവ് യഹ്‌യ സാരി അറിയിച്ചു. ആക്രമണത്തിന് പിന്നാലെ ഇസ്‌റാഈലിൽ വ്യാപകമായി സൈറണുകൾ മുഴങ്ങിയെന്നും ഇസ്‌റാഈൽ മാധ്യമങ്ങൾ റിപ്പോർട്ട് ചെയ്തു. ഇറാനുമായുള്ള യുദ്ധ സമയത്ത് ഉണ്ടായ ഭീതി, ഇരു രാജ്യങ്ങളും തമ്മിൽ വെടിനിർത്തലിലേക്ക് നീങ്ങിയതോടെ ഇസ്‌റാഈൽ ജനത സമാധാനത്തിലേക്ക് എത്തിയതായിരുന്നു. എന്നാൽ യെമനിൽ നിന്ന് ആക്രമണം ഉണ്ടായതോടെ വീണ്ടും ബങ്കറുകളിൽ അഭയം പ്രാപിച്ചിരിക്കുകയാണ് ഇസ്‌റാഈലിലെ ജനങ്ങൾ.

അതേസമയം, ആക്രമണത്തിൽ നാശനഷ്ടങ്ങൾ ഉണ്ടായതായുള്ള വിവരങ്ങൾ ഇസ്‌റാഈൽ പുറത്തുവിട്ടിട്ടില്ല. മിസൈൽ "മിക്കവാറും വിജയകരമായി തടഞ്ഞു" എന്നാണ് ഇസ്‌റാഈൽ സൈന്യം പറഞ്ഞത്. ഇത് പൂർണമായും തടയാൻ സാധിച്ചിട്ടില്ല എന്നുകൂടി അർത്ഥമാക്കുന്നുണ്ട്. 

ALSO READ: സഹായങ്ങൾ തേടി എത്തുന്ന മനുഷ്യരെ മനഃപൂർവം വെടിവെക്കാൻ സൈനികർക്ക് ഇസ്‌റാഈൽ നിർദേശം നൽകിയതായി വെളിപ്പെടുത്തൽ

'യെമനിൽ നിന്നുള്ള പ്രൊജക്റ്റൈൽ വെടിവയ്പ്പിനെ തുടർന്ന് തെക്കൻ ഇസ്‌റാഈലിൽ സൈറണുകൾ മുഴങ്ങുന്നു' - യെമനിൽ നിന്നുള്ള പ്രൊജക്റ്റൈൽ ആക്രമണത്തെക്കുറിച്ച് ഐഡിഎഫ് എക്സ്-ൽ മുന്നറിയിപ്പ് നൽകി. ഭീഷണിയെ തടയുന്നതിനായി ഇസ്‌റായേലിന്റെ വ്യോമ പ്രതിരോധ സംവിധാനങ്ങൾ സജീവമാക്കിയതായും സാധ്യതയുള്ള അപകടത്തെക്കുറിച്ച് താമസക്കാർക്ക് മുന്നറിയിപ്പ് നൽകിയതായും ഐഡിഎഫ്   അറിയിച്ചു. ടെലഗ്രാം മെസേജിംഗ് ആപ്പ് വഴിയാണ് സൈന്യം ഈ വിവരങ്ങൾ അറിയിച്ചത്. ഭീഷണി നിർവീര്യമാക്കാൻ സൈന്യം പ്രവർത്തിക്കുന്നതിനാൽ ഇന്ററപ്റ്റ് ശ്രമങ്ങൾ തുടരുകയാണ് എന്നും അറിയിപ്പിൽ പറഞ്ഞിരുന്നു. 

അതേസമയം, 2023 ഒക്ടോബറിൽ ഗസ്സയിൽ ഇസ്‌റാഈൽ യുദ്ധം ആരംഭിച്ചതുമുതൽ , യെമന്റെ ഭൂരിഭാഗവും നിയന്ത്രിക്കുന്ന ഹൂത്തികൾ ഇസ്‌റായേലിനു നേരെയും ചെങ്കടലിലെ കപ്പൽ ഗതാഗതത്തിനു നേരെയും ആക്രമണം നടത്തിവരികയാണ്. ആഗോള വ്യാപാരത്തെ തടസ്സപ്പെടുത്തി ഉണ്ടായ പ്രതിരോധത്തിൽ ഒടുവിൽ അമേരിക്ക ഉൾപ്പെടെ യെമനുമായി കരാറിൽ എത്തിയിരുന്നു. ഹൂത്തികൾ ഡസൻ കണക്കിന് മിസൈലുകളും ഡ്രോണുകളും ആണ് ഇസ്‌റാഈലിലേക്ക് വിക്ഷേപിച്ചത്. പലതും തടയാൻ ഇസ്‌റാഈലിന് കഴിഞ്ഞിരുന്നു. യെമൻ ലക്ഷ്യമാക്കി ഇസ്‌റാഈലിലും ആക്രമണം നടത്തുന്നുണ്ട്.