പട്ടിണിയിലായ ഗസ്സയിൽ സഹായ സാധനങ്ങൾ തേടി എത്തുന്ന ഫലസ്തീനികളെ മനഃപൂർവ്വം വെടിവയ്ക്കാൻ സൈനികർക്ക് ഉത്തരവ് നൽകിയതായി ഇസ്‌റാഈലി മാധ്യമങ്ങൾ വെളിപ്പെടുത്തി ഗസ്സയിലെ യുദ്ധ കുറ്റകൃത്യങ്ങളുടെ കൂടുതൽ തെളിവാണ് ഈ വെളിപ്പെടുത്തലെന്ന് ഗസ്സയിലെ ഗവൺമെന്റ് മീഡിയ ഓഫീസ് പറഞ്ഞു. സഹായ വിതരണം ആരംഭിച്ചത് മുതൽ സഹായം സ്വീകരിക്കാനെത്തുന്ന നൂറുകണക്കിന് മനുഷ്യരെയാണ് ഇസ്‌റാഈൽ സൈന്യം വെടിവെച്ച് കൊലപ്പെടുത്തികൊണ്ടിരിക്കുന്നത്.

യുഎസിന്റെയും ഇസ്‌റാഈലിന്റെയും പിന്തുണയുള്ള ഗസ്സ ഹ്യുമാനിറ്റേറിയൻ ഫൗണ്ടേഷൻ (ജിഎച്ച്എഫ്) നടത്തുന്ന സഹായ വിതരണ കേന്ദ്രങ്ങൾ 'ഒരു കൊലപാതകക്കളം' ആയി മാറിയെന്ന് യുഎൻ ഏജൻസി ഫോർ ഫലസ്തീൻ അഭയാർത്ഥികളുടെ (യുഎൻആർഡബ്ല്യുഎ) തലവൻ പറയുന്നു.

ഇതിനിടെ, ഇസ്‌റാഈൽ ആക്രമണം തുടരുന്ന സാഹചര്യത്തിൽ ഗസ്സയിൽ അടുത്ത ആഴ്ചയ്ക്കുള്ളിൽ വെടിനിർത്തൽ സാധ്യമാകുമെന്ന് യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞു. ചർച്ചകളിൽ വലിയ പുരോഗതി ഉണ്ടായിട്ടുണ്ടെന്ന് ട്രംപ് സൂചന നൽകിയതിന് ഏതാനും ദിവസങ്ങൾക്ക് ശേഷമാണ് ഇത് സംഭവിക്കുന്നത്.

ALSO READ: ഗസ്സയിലെ ഇസ്‌റാഈല്‍ ആക്രമണം അവസാനിപ്പിക്കാൻ ട്രംപ്; നെതന്യാഹുവിനെ കേസുകളില്‍ നിന്ന് രക്ഷിക്കാൻ പദ്ധതി

അതേസമയം, ഇസ്‌റാഈൽ നടത്തിയ ആക്രമണത്തിൽ വെള്ളിയാഴ്ച പ്രദേശത്തുടനീളം 60 ലധികം പേർ കൊല്ലപ്പെട്ടു. ഉപരോധിക്കപ്പെട്ട എൻക്ലേവിൽ ഉടനീളം പുലർച്ചെ മുതൽ നടന്ന ആക്രമണങ്ങളിൽ കുറഞ്ഞത് 14 പേർ കൊല്ലപ്പെട്ടതായി ആശുപത്രി വൃത്തങ്ങളെ ഉദ്ധരിച്ച് അൽ ജസീറ അറബിക് റിപ്പോർട്ട് ചെയ്തു. വടക്കൻ ഗസ്സയിലെ അസ്-സഫ്താവി പ്രദേശത്ത്, ഒസാമ ബിൻ സെയ്ദ് സ്കൂളിന് നേരെ ഇസ്‌റാഈൽ നടത്തിയ വ്യോമാക്രമണത്തിൽ കുറഞ്ഞത് എട്ട് പേരും കൊല്ലപ്പെട്ടതായി റിപ്പോർട്ട് ഉണ്ട്. അവിടെ നിരവധി പേർ അഭയം തേടിയിരിക്കുന്ന സ്ഥലമായിരുന്നു. ഇവിടെയാണ് ആക്രമണം ഉണ്ടായത്. കൊല്ലപ്പെട്ടവരിൽ രണ്ട് കുട്ടികളും ഒരു സ്ത്രീയും ഉൾപ്പെടുന്നു. അൽ-മവാസി പ്രദേശത്ത് കുടിയിറക്കപ്പെട്ട ആളുകളെ പാർപ്പിച്ച ടെന്റുകൾക്ക് നേരെ സൈന്യം നടത്തിയ ആക്രമണത്തിൽ ആറ് പേർ കൊല്ലപ്പെട്ടു.

അതേസമയം, ഫലസ്തീൻ പ്രിസണേഴ്‌സ് മീഡിയ ഓഫീസ് (ASRA) പ്രകാരം, നബ്ലസ്, ഖൽഖില്യ, സാൽഫിറ്റ് എന്നീ ഗവർണറേറ്റുകളിൽ ഇസ്‌റാഈൽ സൈന്യം നിരവധി റെയ്ഡുകൾ നടത്തി 25 ലധികം പേരെ അറസ്റ്റ് ചെയ്തു. അറസ്റ്റിലായവരിൽ നബ്ലസ് ഗവർണറേറ്റിലെ ബീറ്റയിൽ നിന്നുള്ള പത്രപ്രവർത്തകൻ മുജാഹിദ് ബാനി മുഫ്‌ലെയും ഉൾപ്പെടുന്നതായി ASRA പ്രസിദ്ധീകരിച്ച പ്രസ്താവനയിൽ പറയുന്നു. റെയ്ഡിനിടെ ഇസ്രായേൽ സൈന്യം ഡസൻ കണക്കിന് വീടുകൾ ആക്രമിക്കുകയും കൊള്ളയടിക്കുകയും ചെയ്തു.