ടെസ്റ്റ്‌ ക്രിക്കറ്റിൽ അരങ്ങേറ്റ മത്സരത്തിൽ ചരിത്രം കുറിച്ച് സൗത്ത് ആഫ്രിക്കൻ യുവതാരം ലുയാൻ ഡ്ര പ്രിട്ടോറിയസ്. സിംബാബ്വെക്കെതിരെ അരങ്ങേറ്റ മത്സരത്തിൽ സെഞ്ച്വറി നേടിയാണ് താരം ചരിത്രം സൃഷ്ടിച്ചത്. 160 പന്തിൽ 153 റൺസ് നേടിയാണ് പ്രിട്ടോറിയസ് തിളങ്ങിയത്. 11 ഫോറുകളും നാല് സിക്സുകളും അടങ്ങുന്നതായിരുന്നു താരത്തിന്റെ തകർപ്പൻ പ്രകടനം.

 ഇതോടെ ടെസ്റ്റ് ക്രിക്കറ്റിൽ അരങ്ങേറ്റ മത്സരത്തിൽ സൗത്ത് ആഫ്രിക്കയ്ക്ക് വേണ്ടി സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായി മാറാനാണ് പ്രിട്ടോറിയസിന് സാധിച്ചത്. 19 വയസ്സും 93 ദിവസവും പ്രായമുള്ളപ്പോഴാണ് താരം ഈ റെക്കോർഡ് തന്റെ പേരിൽ ആക്കിമാറ്റിയിരിക്കുന്നത്. 21 വയസ്സ് 35 ദിവസവും പ്രായമുള്ളപ്പോൾ സെഞ്ച്വറി നേടിയ ജാക്സ് റുഡോൾഫിന്റെ റെക്കോർഡ് തകർത്താണ് ഈ 19കാരൻ ചരിത്രം തിരുത്തി കുറിച്ചത്.

ഈ വർഷത്തെ ഐപിഎല്ലിൽ രാജസ്ഥാൻ റോയൽസ് താരത്തെ സ്വന്തമാക്കിയിരുന്നു. പരുക്കേറ്റ നിതീഷ് റാണയ്ക്ക് പകരക്കാരനായിട്ടായിരുന്നു രാജസ്ഥാൻ റോയൽസ് ലുയാൻ-ഡ്രെ പ്രിട്ടോറിയസിനെ സൈൻ ചെയ്തത്. 30 ലക്ഷം രൂപയ്ക്കാണ് ഈ ദക്ഷിണാഫ്രിക്കൻ താരം റോയൽസിൽ ചേർന്നത്. 

2025 ലെ SA20-ൽ 12 മത്സരങ്ങളിൽ നിന്ന് 166.80 സ്ട്രൈക്ക് റേറ്റിൽ 397 റൺസ് നേടി താരം കഴിവ് തെളിയിച്ചിട്ടുണ്ട്. സൺറൈസേഴ്‌സ് ഈസ്റ്റേൺ കേപ്പിനെതിരെ പാൾ റോയൽസിനായി 51 പന്തിൽ 97 റൺസ് നേടിയത് സീസണിലെ ഏറ്റവും മികച്ച ഇന്നിംഗ്‌സുകളിൽ ഒന്നായിരുന്നു. കഴിഞ്ഞ വർഷം നടന്ന അണ്ടർ 19 ലോകകപ്പിൽ ദക്ഷിണാഫ്രിക്കയ്ക്കായി ഏറ്റവും കൂടുതൽ റൺസ് നേടിയ കളിക്കാരനും പ്രിട്ടോറിയസായിരുന്നു. 

സൗത്ത് ആഫ്രിക്ക പ്ലെയിങ് ഇലവൻ

മാത്യു ബ്രീറ്റ്‌സ്‌കെ, ടോണി ഡി സോർസി, വ്ലാൻ മൾഡർ, ഡേവിഡ് ബെഡിംഗ്‌ഹാം, ലുവൻ-ഡ്രെ പ്രിട്ടോറിയസ്, ഡെവാൾഡ് ബ്രെവിസ്, കൈൽ വെറെയ്‌നെ (വിക്കറ്റ് കീപ്പർ), കോർബിൻ ബോഷ്, കേശവ് മഹാരാജ് (ക്യാപ്റ്റൻ), കോഡി യൂസഫ്, ക്വേന മഫാക

സിംബാബ്‌വെ പ്ലെയിങ് ഇലവൻ

ബ്രയാൻ ബെന്നറ്റ്, തകുദ്സ്വനാഷെ കൈറ്റാനോ, നിക്ക് വെൽച്ച്, സീൻ വില്യംസ്, ക്രെയ്ഗ് എർവിൻ(ക്യാപ്റ്റൻ), വെസ്‌ലി മധെവെരെ, തഫാദ്‌സ്വ സിഗ((വിക്കറ്റ് കീപ്പർ)), വെല്ലിംഗ്ടൺ മസകാഡ്‌സ, വിൻസെൻ്റ് മസെകെസ, ബ്ലെസിംഗ് മുസരബാനി, താനക ചിരവനഗ