തിരുവനന്തപുരം: ക്ഷീര കര്‍ഷകന്‍ അനില്‍കുമാറിനെ ആക്രമിച്ച് പണം കവര്‍ന്ന കേസിലെ പ്രതികള്‍ റിമാന്‍ഡില്‍. വെമ്പായം കൊഞ്ചിറ സ്വദേശികളായ അജിത് കുമാര്‍(37), അസീം(42) ആലിയാട് സ്വദേശി സുധീഷ്(25) വാമനപുരം വാര്യംകോണം സ്വദേശി കിച്ചു (31) എന്നിവരാണ് സംഭവത്തില്‍ അറസ്റ്റിലായത്. ക്ഷീരകര്‍ഷകനായ വലിയ കട്ടയ്ക്കാന്‍ മുരൂര്‍ക്കോണം സ്വദേശി അനില്‍ കുമാറിനെ ആക്രമിച്ചാണ് പണം തട്ടിയെടുത്തത്.

ഇക്കഴിഞ്ഞ ബുധനാഴ്ച രാത്രിയായിരുന്നു സംഭവം നടന്നത്. തന്റെ ഡയറി ഫാമില്‍ രാത്രി പശുക്കളെ നോക്കാനെത്തിയ അനില്‍ കുമാര്‍ ഗേറ്റ് തുറന്ന് തൊഴുത്തിലേക്ക് കയറിയ ഉടനെയായിരുന്നു പതിയിരുന്ന പ്രതികള്‍ മുഖം മൂടി ധരിച്ച് അനില്‍ കുമാറിനെ മര്‍ദിച്ചത്. മര്‍ദിച്ചവശനാക്കിയ ശേഷം കൊല്ലുമെന്ന് ഭീഷണിപ്പെടുത്തി മൊബൈല്‍ ഫോണ്‍ കൈക്കലാക്കിയ ഇവര്‍ പിന്‍ നമ്പര്‍ ചോദിച്ചറിഞ്ഞ ശേഷം അക്കൗണ്ടില്‍ നിന്നു 16,000 രൂപ മറ്റൊരാളുടെ അക്കൗണ്ടിലേക്ക് ഗൂഗിള്‍ പേ വഴി അയക്കുകയായിരുന്നു വെന്നാണ് പരാതി.

വെഞ്ഞാറമ്മൂട് പൊലിസ് കഴിഞ്ഞ ദിവസങ്ങളില്‍ നടത്തിയ അന്വേഷണത്തില്‍ പ്രതികളെ വിവിധ സ്ഥലങ്ങളില്‍ നിന്നു പിടികൂടുകയായിരുന്നു. ഇവര്‍ പണം അയച്ച അക്കൗണ്ടും പൊലിസ് പരിശോധിച്ച് തെളിവ് ശേഖരിച്ചു വരുകയാണ്. പ്രതികളെ ഇന്നലെ കോടതിയില്‍ ഹാജരാക്കി റിമാന്‍ഡ് ചെയ്തു.