തൊടുപുഴ: മുല്ലപ്പെരിയാർ അണക്കെട്ടിൽ തമിഴ്‌നാട് റൂൾ കർവ് നിയമം ലംഘിച്ചതായി ആരോപണം. കേന്ദ്ര ജലകമ്മിഷന്റെ ജൂൺ മാസത്തെ ജലസംഭരണ പട്ടിക (റൂൾ കർവ്) പ്രകാരം, അണക്കെട്ടിൽ പരമാവധി 136 അടി വെള്ളം മാത്രമേ ശേഖരിക്കാവൂ. എന്നാൽ, ശനിയാഴ്ച രാത്രി 10 മണിയോടെ ജലനിരപ്പ് 136 അടിയിൽ എത്തിയിട്ടും, 13.35 മണിക്കൂർ വൈകി ഞായറാഴ്ച രാവിലെ 11.35നാണ് ഷട്ടറുകൾ തുറന്ന് സ്പിൽവേ വഴി വെള്ളം പുറത്തേക്ക് ഒഴുക്കിയത്. ഈ സമയം ജലനിരപ്പ് 136.25 അടിയായി ഉയർന്നിരുന്നു.

കേരളം സുപ്രിംകോടതിയിൽ നിയമപോരാട്ടങ്ങളിലൂടെ നേടിയെടുത്ത അവകാശമാണ് 136 അടിക്ക് മുകളിലുള്ള ഓരോ തുള്ളി ജലവും. ആദ്യം 10 സെ.മീ. ഉയർത്തിയ ഷട്ടറുകൾ വൈകിട്ട് 4 മണിയോടെ 30 സെ.മീ. ആയി ഉയർത്തി. സുപ്രിംകോടതി നിർദേശപ്രകാരം റൂൾ കർവ് പാലിക്കാൻ തമിഴ്‌നാട് ബാധ്യസ്ഥരാണ്. റൂൾ കർവും ഗേറ്റ് ഓപ്പറേറ്റിങ് ഷെഡ്യൂളും നിരീക്ഷിക്കാനും അന്തിമമാക്കാനുമുള്ള ചുമതല ഉന്നതാധികാര സമിതിക്കാണ്. എന്നാൽ, ഈ സമിതി പലപ്പോഴും തമിഴ്‌നാടിനോട് പക്ഷപാതം കാണിക്കുന്നുവെന്ന ആക്ഷേപം ശക്തമാണ്.

ALSO READ: മെഡിക്കൽ കോളജിൽ ഉപകരണക്ഷാമം: ഡോ. ഹാരിസിന്റെ തുറന്നുപറച്ചിലിന് പൊതുസമൂഹത്തിൽനിന്ന് വൻ പിന്തുണ; നിലപാട്  മയപ്പെടുത്തി ആരോഗ്യമന്ത്രി

തമിഴ്‌നാടിന്റെ നിയമലംഘനത്തിനെതിരെ കേരളം സുപ്രിംകോടതിയിലും ഉന്നതാധികാര സമിതിയിലും പരാതി നൽകാൻ തീരുമാനിച്ചു. ഇതുസംബന്ധിച്ച് സുപ്രിംകോടതിയിലെ മുതിർന്ന അഭിഭാഷകൻ മോഹൻ കട്ടാർക്കിയുമായി മുഖ്യമന്ത്രിയുടെ ഓഫിസ് കൂടിയാലോചന നടത്തും. സർക്കാർ നിയോഗിച്ച വിദഗ്ധനും കെ.എസ്.ഇ.ബി. റിട്ട. ചീഫ് എൻജിനീയറുമായ ജെയിംസ് വിൽസനുമായും ആശയവിനിമയം നടത്തിയിട്ടുണ്ട്. അന്തർസംസ്ഥാന ജലപ്രശ്നങ്ങളിൽ വൈദഗ്ധ്യം തെളിയിച്ച വിൽസൻ, മുല്ലപ്പെരിയാർ സ്പെഷൽ സെൽ, പറമ്പിക്കുളം ആളിയാർ റിവ്യു റിപ്പോർട്ട് കമ്മിറ്റി, വൈദ്യുതി ബോർഡ് റിസർവോയർ വിദഗ്ധ ഉപദേശക സമിതി എന്നിവയിൽ അംഗമായിരുന്നു.

ഞായറാഴ്ച വൈകിട്ടത്തെ കണക്കനുസരിച്ച്, 13 ഷട്ടറുകളിലൂടെ സെക്കന്റിൽ 750 ഘനയടി വെള്ളം പെരിയാറിലേക്ക് ഒഴുക്കുന്നുണ്ട്. ഈ വെള്ളം ഇടുക്കി ഡാമിൽ എത്തും. മുല്ലപ്പെരിയാർ ജലം ഉപയോഗിച്ച് തമിഴ്‌നാട് ലോവർ ക്യാംപ് പവർ ഹൗസിൽ വർഷംതോറും ശരാശരി 500 കോടി രൂപയുടെ വൈദ്യുതി ഉൽപ്പാദിപ്പിക്കുന്നു. എന്നാൽ, കേരളത്തിന് നൽകുന്ന പാട്ടത്തുക വെറും 10 ലക്ഷം രൂപ മാത്രമാണ്—വസ്തുക്കരമായ 2.5 ലക്ഷവും വൈദ്യുതി ഉൽപ്പാദന റോയൽറ്റിയായി 7.5 ലക്ഷവും.

Tamil Nadu has violated the Mullaperiyar dam agreement, prompting Kerala to plan a formal complaint against the breach.