കൽപ്പറ്റ: പ്ലസ് വൺ പ്രവേശനത്തിനുള്ള സപ്ലിമെന്ററി അലോട്ട്‌മെന്റിന് ഇന്നുകൂടി അപേക്ഷ നൽകാം. ഇന്ന് വൈകിട്ട് അഞ്ചുവരെയാണ് അവസരം. അപേക്ഷിച്ചിട്ടും അലോട്ട്‌മെന്റ് ലഭിക്കാത്തവർ, ഇതുവരെ അപേക്ഷിക്കാത്തവർ, തെറ്റായ വിവരങ്ങൾ നൽകിയത് കാരണം പ്രവേശനം നിരാകരിക്കപ്പെട്ടവർ എന്നിവർക്ക് സപ്ലിമെന്ററി അലോട്ട്‌മെന്റിന് അപേക്ഷ സമർപ്പിക്കാം.

അതേസമയം നിലവിൽ പ്രവേശനം നേടിക്കഴിഞ്ഞവർക്കും പ്രവേശനം ലഭിച്ചിട്ടും ഹാജരാകാത്തവർക്കും പ്രവേശനം നേടിയശേഷം ടി.സി വാങ്ങിയവർക്കും അപേക്ഷ നൽകാനാകില്ല. ജില്ലയിൽ വിവിധ സ്‌കൂളുകളിലായി നിലവിൽ വിവിധ വിഷയങ്ങളിലായി 1,555 സീറ്റുകളാണ് ഒഴിവുള്ളത്. മുഖ്യ അലോട്ട്‌മെന്റിന് ശേഷം ഓരോ സ്‌കൂളിലും ഒഴിവുള്ള സീറ്റുകളുടെ വിവരങ്ങൾ അഡ്മിഷൻ വെബ്‌സൈറ്റിൽ പ്രസിദ്ധീകരിച്ചിട്ടുണ്ട്. അലോട്ട്‌മെന്റ് ലഭിക്കാത്തവർ പട്ടിക പരിശോധിച്ച് ഓരോ സ്‌കൂളിലെയും സീറ്റ് ലഭ്യത മനസിലാക്കി ഇന്ന് വൈകിട്ട് അഞ്ചിന് മുമ്പായി അപേക്ഷ പുതുക്കി നൽകണം.  പട്ടികയിലെ സ്‌കൂൾ/കോമ്പിനേഷൻ മാത്രമേ ഓപ്ഷനുകളായി തിരഞ്ഞെടുക്കാൻ സാധിക്കുകയുള്ളൂ. അപേക്ഷ  പുതുക്കാത്തവരെ സപ്ലിമെന്ററി അലോട്ട്‌മെന്റിന് പരിഗണിക്കില്ല. 

അപേക്ഷ നൽകുന്നത് എങ്ങനെ

അപേക്ഷിച്ചിട്ടും ഇതുവരെ അലോട്ട്‌മെന്റ് ലഭിക്കാത്തവർ കാൻഡിഡേറ്റ് ലോഗിൻ പേജിലുള്ള Renew Application ലിങ്ക് ഉപയോഗിച്ച് അപേക്ഷ പുതുക്കണം. ഇതുവരെയും അപേക്ഷ നൽകാത്തവർ create candidate loginsws ലിങ്ക് വഴി കാൻഡിഡേറ്റ് ലോഗിൻ നിർമിച്ച ശേഷം Apply Online SWS ലിങ്ക് വഴി പുതുതായി അപേക്ഷ നൽകണം. അപേക്ഷയിൽ തെറ്റായ വിവരങ്ങൾ നൽകിയത് കാരണം പ്രവേശനം നിരാകരിക്കപ്പെട്ടവർ കാൻഡിഡേറ്റ് ലോഗിനിൽ നൽകിയിട്ടുള്ള Renew Application ലിങ്ക് ഉപയോഗിച്ച് അപേക്ഷയിലെ പിഴവുകൾ തിരുത്തി സമർപ്പിക്കണം.

Applications for the supplementary allotment of Plus One admissions in Kerala are being accepted until today, allowing students to secure remaining seats.