വാഷിങ്ടണ്‍: ഇസ്‌റാഈല്‍ സൈന്യത്തിന് ചരമഗീതം പാടിയ പ്രമുഖ ബ്രിട്ടിഷ് റാപ്പ് ഗായകരായ ബോബ് വിലന്റെയും ബോബി വിലന്റെയും ബാന്‍ഡ് അംഗങ്ങളുടെയും വിസ റദ്ദാക്കി യു.എസ്. ഗ്ലാസ്റ്റണ്‍ബറി ഫെസ്റ്റിവലില്‍ രണ്ടുലക്ഷത്തിലധികം ആളുകള്‍ പങ്കെടുത്ത സംഗീതോത്സവത്തിലാണ് ഇസ്‌റാഈലി സൈന്യത്തിനെതിരേ ഇവര്‍ ഗാനമാലപിച്ചത്.
ഫലസ്തീന്‍ അനുകൂല, ഇസ്‌റാഈല്‍ വിരുദ്ധ നിലപാടു പുലര്‍ത്തുന്ന റാപ്പ് ബാന്‍ഡാണ് ബോബ്‌സ്. ഇസ്‌റാഈല്‍ സൈന്യം ഫലസ്തീനികള്‍ക്കു നേരെ നടത്തുന്ന ക്രൂരതയ്ക്കു നേരെ ശക്തമായ പ്രതിഷേധമാണ് ബാന്‍ഡിന്റെ പരിപാടികളില്‍ അലയടിക്കുന്നത്. ഫ്രീ ഫ്രീ ഫലസ്തീന്‍, ഡത്ത് ഡത്ത് ടു ദ ഐ.ഡി.എഫ് എന്ന ഇവരുടെ ഗാനത്തിന്റെ വിഡിയോ സമൂഹമാധ്യമങ്ങളില്‍ വൈറലാണ്. ഈ ഗാനമാണ് യു.എസ് ഭരണകൂടത്തെ കടുത്ത നടപടിക്ക് പ്രേരിപ്പിച്ചതും.

 

 

വിസ റദ്ദാക്കിയ കാര്യം യു.എസ് ഡെപ്യൂട്ടി സ്റ്റേറ്റ് സെക്രട്ടറി ക്രിസ്റ്റഫര്‍ ലന്‍ഡൗ എക്‌സിലാണ് വെളിപ്പെടുത്തിയത്. വിസ റദ്ദാക്കിയത് അഭിപ്രായ സ്വാതന്ത്ര്യത്തിന്റെ ലംഘനമാണെന്നാണ് ഇതിനെ എതിര്‍ക്കുന്നവര്‍ പറയുന്നത്.
അതേസമയം , വിവാദ ഗാനത്തെ തുടര്‍ന്ന് റാപ്പര്‍മാര്‍ക്കെതിരേ ബ്രിട്ടിഷ് പൊലിസ് ക്രിമിനല്‍ കേസെടുത്ത് അന്വേഷണം ആരംഭിച്ചിട്ടുണ്ട്. ഗാനത്തിന്റെ വിഡിയോ ബി.ബി.സി നീക്കം ചെയ്തു. ഇസ്‌റാഈലി സൈന്യത്തിനെതിരായ ഗാനത്തെ തുടര്‍ന്ന് ഫ്രഞ്ച് മ്യൂസിക് ഫെസ്റ്റിവലില്‍ നിന്ന് ബോബ് വിലനെ ഒഴിവാക്കിയിരിക്കുകയാണ്. അതേസമയം താന്‍ കണ്ട കാര്യമാണ് താന്‍ ഗാനത്തിലൂടെ പറഞ്ഞതെന്ന് ബോബ് വിലന്‍ സമൂഹമാധ്യമത്തിലൂടെ പ്രതികരിച്ചു.

 

 

പ്രശസ്ത ഡ്രമ്മറായ ബോബ് വിലനും ഗായകന്‍ ബോബി വിലനും ചേര്‍ന്ന് നടത്തുന്ന റാപ്പ് സംഗീത ബാന്‍ഡാണ് ബോബ്‌സ്. ഇവരെ ചേര്‍ത്ത് വിളിക്കുന്നതും ബോബ്‌സ് എന്നാണ്. 2017ലാണ് റാപ്പ് ബാന്‍ഡ് ആരംഭിക്കുന്നത്. 2020ല്‍ വി ലിവ് ഹിയര്‍ എന്ന ആല്‍ബം പുറത്തുവിട്ടു. വംശീയത, മുതലാളിത്തം, പൊലിസ് അക്രമം തുടങ്ങിയവയ്‌ക്കെതിരായ പ്രമേയങ്ങളാണ് ബോബ് വിലന്‍ ബാന്‍ഡ് ആലപിക്കുന്നത്. അതിനാല്‍ തന്നെ ജനലക്ഷങ്ങള്‍ ബോബ് വിലന്‍ ബാന്‍ഡിനെ കൈനീട്ടി സ്വീകരിച്ചു. വലിയ ആരാധകവൃന്ദമാണ് ലോകത്തെങ്ങും ഇവര്‍ക്കുള്ളത്. ഓരോ പരിപാടിക്കും ലക്ഷക്കണക്കിനു സംഗീതപ്രേമികളാണ് പങ്കെടുക്കുന്നത്.

British rap duo Bob Vylan have been banned from the US after the group’s frontman called for the death of all Israeli soldiers in a Glastonbury performance