ഡല്‍ഹി: ബിഹാറിലെ വോട്ടര്‍ പട്ടിക പരിഷ്‌കരണത്തില്‍ വിവാദം ഉയരുന്നു. തിരിച്ചറിയലിനായി ജനന സര്‍ട്ടിഫിക്കറ്റ് മാത്രം മതിയെന്ന് ആധാരമാക്കിയ തെരഞ്ഞെടുപ്പ് കമ്മീഷന്‍ നടപടിയാണ് വിവാദത്തിന് കാരണം. ഈ നീക്കം അപ്രായോഗികമാണെന്ന് ഇന്ത്യ സഖ്യം വ്യക്തമാക്കി. തെരഞ്ഞെടുപ്പ് കമ്മീഷന്റെ ഈ വോട്ടര്‍ പട്ടിക പരിഷ്‌കരണ നടപടിയിലൂടെ 3 കോടി ജനങ്ങള്‍ക്ക് വോട്ടവകാശം നഷ്ടപ്പെടുമെന്നു പ്രതിപക്ഷ പാര്‍ട്ടികള്‍ വിവരിച്ചു.

തെരഞ്ഞെടുപ്പ് കമ്മീഷന്റെ ഈ നടപടിക്കെതിരെ സുപ്രിംകോടതിയെ സമീപിക്കാനുള്ള നീക്കത്തിലാണ് ഇന്ത്യ സഖ്യം. തെരഞ്ഞെടുപ്പ് കമ്മീഷനെ ആശങ്ക അറിയിച്ചെങ്കിലും നടപടി തുടരുമെന്ന മറുപടിയാണ് കിട്ടിയതെന്നും ഇന്ത്യ സഖ്യം നേതാക്കള്‍ വ്യക്തമാക്കി. അതേസമയം തെരഞ്ഞെടുപ്പ് അടുത്തതോടെ സംസ്ഥാനത്തെ സാമൂഹിക സുരക്ഷാ പെന്‍ഷന്‍ പദ്ധതിയില്‍ വലിയ വര്‍ധനവ് മുഖ്യമന്ത്രി നിതീഷ് കുമാര്‍ കഴിഞ്ഞ ദിവസം പ്രഖ്യാപിച്ചു.

പുതുക്കിയ പദ്ധതി പ്രകാരം മുതിര്‍ന്ന പൗരന്മാര്‍ക്കും ഭിന്നശേഷിക്കാര്‍ക്കും ഇനി പ്രതിമാസം 400 രൂപയ്ക്ക് പകരം 1100 രൂപയാണ് ലഭിക്കുക. വര്‍ധിപ്പിച്ച പെന്‍ഷന്‍ തുക ജൂലൈ മാസം മുതല്‍ വിതരണം ചെയ്യുമെന്ന് നിതീഷ് കുമാര്‍ എക്‌സില്‍ കുറിച്ചിരുന്നു. ഈ തീരുമാനം ഗുണഭോക്താക്കള്‍ക്ക് ആശ്വാസം നല്‍കുമെന്ന് പ്രതീക്ഷിക്കുന്നു. 'സാമൂഹിക സുരക്ഷാ പെന്‍ഷന്‍ പദ്ധതി പ്രകാരം വിധവകള്‍ക്കും വയോജനങ്ങള്‍ക്കും ഭിന്നശേഷിക്കാര്‍ക്കും ഇനി പ്രതിമാസം 400 രൂപയ്ക്ക് പകരം 1100 രൂപ പെന്‍ഷന്‍ ലഭിക്കുമെന്ന വിവരം നിങ്ങളെ അറിയിക്കുന്നതില്‍ സന്തോഷമുണ്ട്.

ജൂലൈ മാസം മുതല്‍ എല്ലാ ഗുണഭോക്താക്കള്‍ക്കും വര്‍ധിച്ച നിരക്കില്‍ പെന്‍ഷന്‍ ലഭിക്കും. എല്ലാ ഗുണഭോക്താക്കളുടെയും അക്കൗണ്ടുകളിലേക്ക് എല്ലാ മാസവും 10ാം തിയതി ഈ തുക അയക്കുന്നത് ഉറപ്പാക്കും' നിതീഷ് കുമാര്‍ എക്‌സിലെ പോസ്റ്റില്‍ പറഞ്ഞു. പരിഷ്‌കരിച്ച പെന്‍ഷന്‍ എല്ലാ മാസവും പത്താം തീയതി ഗുണഭോക്താക്കളുടെ ബാങ്ക് അക്കൗണ്ടുകളില്‍ ക്രെഡിറ്റ് ചെയ്യുമെന്ന് സര്‍ക്കാര്‍ വ്യക്തമാക്കി. ബീഹാറിന്റെ സാമൂഹിക ക്ഷേമ പദ്ധതിയുടെ കീഴില്‍ വയോജനങ്ങളെയും ഭിന്നശേഷിക്കാരെയും വിധവകളെയും മറ്റ് അര്‍ഹരായ വ്യക്തികളെയും പദ്ധതിയില്‍ ഉള്‍പ്പെടുത്തിയിട്ടുണ്ട്.