ന്യൂഡൽഹി: തിഹാർ ജയിലിൽ കഴിയുന്ന ഗുണ്ടാ നേതാവിന് സ്വന്തം വിവാഹ ചടങ്ങിൽ പങ്കെടുക്കാൻ അഞ്ച് മണിക്കൂർ നേരത്തേക്ക് പരോൾ അനുവദിച്ചു. ദബാംഗ് എന്ന അമിത് എന്നയാളാണ് അഞ്ച് മണിക്കൂർ പരോളിൽ തിഹാർ ജയിലിൽ നിന്ന് പുറത്തിറങ്ങി വിവാഹിതനാകുന്നത്. ഡൽഹിയിലെ നരേലയിലുള്ള താജ്പൂർ ഗ്രാമത്തിൽ, ​ഗുണ്ട സംഘത്തിന്റെ ശക്തികേന്ദ്രത്തിലാണ് വിവാഹ ചടങ്ങ് നടക്കുക എന്നാണ് റിപ്പോർട്ടുകൾ സൂചിപ്പിക്കുന്നത്. ചടങ്ങിൽ മുൻനിര ഗുണ്ടാ സംഘാംഗങ്ങളും പങ്കെടുക്കുമെന്ന പ്രതീക്ഷിക്കുന്നതിനാൽ സുരക്ഷാ ഉദ്യോഗസ്ഥരുടെ കർശന നിരീക്ഷണത്തിലാണ് അമിതിനെ വിവാഹ വേദിയിലേക്ക് കൊണ്ടുപോകുന്നത്. അനിഷ്ട സംഭവങ്ങൾ ഒഴിവാക്കാൻ താജ്പൂർ ഗ്രാമത്തിൽ വൻ പൊലീസ് സന്നാഹവും വിന്യസിച്ചിട്ടുണ്ട്.

2023-ൽ തിഹാർ ജയിലിൽ വെച്ച് എതിരാളികളായ ഗോഗി സംഘത്തിന്റെ ആക്രമണത്തിൽ സുനിൽ ബല്യാൻ എന്ന ​ഗുണ്ട കൊല്ലപ്പെട്ടിരുന്നു. ഒരു ദശാബ്ദത്തിലേറെ ടില്ലു സംഘത്തിന്റെ തലവനായിരുന്ന സുനിലിന്റെ മരണത്തോടെ, അമിത് സംഘത്തിന്റെ നിയന്ത്രണം ഏറ്റെടുത്തു. 2020-ൽ മഹാരാഷ്ട്ര സംഘടിത കുറ്റകൃത്യ നിയന്ത്രണ നിയമ (എംസിഒസിഎ) പ്രകാരം ഡൽഹി പൊലീസിന്റെ സ്പെഷ്യൽ സെൽ അമിതിനെ അറസ്റ്റ് ചെയ്തിരുന്നു. അറസ്റ്റിന് വഴിയൊരുക്കിയ വിവരങ്ങൾ നൽകുന്നവർക്ക് പൊലീസ് രണ്ട് ലക്ഷം രൂപ പാരിതോഷികം പ്രഖ്യാപിച്ചിരുന്നു.

അമിതിനെതിരെ കൊലപാതകം, പിടിച്ചുപറി, ആയുധ നിയമം തുടങ്ങിയ വകുപ്പുകളിൽ നിരവധി കേസുകൾ നിലവിലുണ്ട്. 2018-ൽ രോഹിണി കോടതിക്ക് സമീപം ഗോഗി എന്ന ​ഗുണ്ടസംഘത്തിലെ മോനു നേപ്പാളി എന്നയാളെ കൊലപ്പെടുത്തിയതിനും, സുനിലിന്റെ മരണത്തിന് പ്രതികാരമായി അലിപൂർ കൊലപാതക കേസ് ആസൂത്രണം ചെയ്തതിനും അമിതിനെതിരെ കുറ്റം ചുമത്തപ്പെട്ടിട്ടുണ്ട്. നിലവിൽ തിഹാർ ജയിലിലെ മൂന്നാം നമ്പർ സെല്ലിൽ കഴിയുന്ന അമിതിന്റെ വിവാഹ ചടങ്ങ് കനത്ത സുരക്ഷയിൽ നടക്കുമെന്ന് അധികൃതർ അറിയിച്ചു.

Amit, a key member of the notorious Tillu Tajpuriya gang, will be released on a five-hour parole from Tihar Jail to get married today. The wedding will take place in Tajpur village, Narela, under tight security, with senior gang members expected to attend.