മേജർ ലീഗ് സോക്കറിൽ ഇന്റർ മയാമിക്ക് മിന്നും വിജയം. മോൺട്രിയലിനെ ഒന്നിനെതിരെ നാല് ഗോളുകൾക്കാണ് ഇന്റർ മയാമി തകർത്തു വിട്ടത്. മത്സരത്തിൽ ഇന്റർ മയാമിക്കായി ലയണൽ മെസി ഇരട്ട ഗോൾ നേടി മയാമിയുടെ ഈ വമ്പൻ വിജയത്തിൽ നിർണായകമായ പങ്കാണ് വഹിച്ചത്. ഗോളിന് പുറമെ ഒരു അസിസ്റ്റ് നേടിയും മെസി തിളങ്ങി.

ഇതോടെ 2012ന് ശേഷം മേജർ ലീഗ് സോക്കറിൽ തുടർച്ചയായ മൂന്ന് മത്സരങ്ങളിൽ രണ്ടിലധികം ഗോളുകളും ഒരു അസിസ്റ്റും സ്വന്തമാക്കുന്ന ആദ്യ താരമായി മാറാനും മെസിക്ക് സാധിച്ചു. ഇതിനു മുമ്പ് ഇത്തരത്തിൽ തുടർച്ചയായി ഗോൾ സ്കോറിങ് നടത്തിയത് മുൻ ഫ്രഞ്ച് താരം തിയറി ഹെൻറി ആയിരുന്നു. 

ഫിഫ ക്ലബ് ലോകകപ്പിൽ നിന്നും പുറത്തായതിന് ശേഷം മെസിയും സംഘവും കളിക്കുന്ന ആദ്യ മത്സരമായിരുന്നു ഇത്. പ്രീ ക്വാർട്ടറിൽ നിലവിലെ ചാമ്പ്യൻസ് ലീഗ് ജേതാക്കളായ പാരീസ് സെയ്ന്റ് ജെർമെയ്‌നെതിരെ പരാജയപ്പെട്ടതാണ് ഇന്റർ മയാമി പുറത്തായത്. എതിരില്ലാത്ത നാല് ഗോളുകൾക്കായിരുന്നു മയാമി പരാജയപ്പെട്ടത്.

ടൂർണമെന്റിൽ പോർച്ചുഗീസ് ക്ലബ്ബായ പോർട്ടോ എഫ്സിക്കെതിരെ ഇന്റർ മയാമി തകർപ്പൻ വിജയം നേടിയിരുന്നു. ഈ മത്സരത്തിൽ ഇന്റർ മയാമിക്കായി വിജയഗോൾ നേടിയത് മെസിയായിരുന്നു. പോർച്ചുഗീസ് ടീമിനെതിരെ ഒരു തകർപ്പൻ ഫ്രീ കിക്ക് ഗോളിലൂടെയാണ് മെസി ഇന്റർ മയാമിക്ക് വിജയം സമ്മാനിച്ചത്.

അതേസമയം മെസിക്ക് പുറമെ മത്സരത്തിൽ ടാഡിയോ അല്ലെൻഡെയും ഇരട്ട ഗോൾ നേടി മികച്ച പ്രകടനമാണ് നടത്തിയത്. ടെലാസ്കോ സെഗോവിയ ഒരു ഗോളും നേടി. പ്രിൻസ് ഒവുസുവിന്റെ ഗോളാണ് മോൺട്രിയലിനായി ഗോൾ നേടിയത്. നിലവിൽ മേജർ ലീഗ് സോക്കറിന്റെ പോയിന്റ് പട്ടികയിൽ ആറാം സ്ഥാനത്താണ് മെസിയും സംഘവും. 17 മത്സരങ്ങളിൽ നിന്നും ഒമ്പത് വിജയവും അഞ്ചു സമനിലയും മൂന്ന് തോൽവിയും അടക്കം 32 പോയിന്റാണ് ഇന്റർ മയാമിക്കുള്ളത്. 

എംഎൽഎസ്സിൽ ജൂലൈ പത്തിന് ന്യൂ ഇംഗ്ലണ്ടിനെതിരെയാണ് മെസിയുടെയും സംഘത്തിന്റെയും അടുത്ത മത്സരം.  

Inter Miami defeated Montreal 4-1 in Major League Soccer Lionel Messi scored twice and provided an assist for Inter Miami in the match