റിയാദ്: റിയാദിൽ റെസിഡൻഷ്യൽ ഭൂമി വാങ്ങാനാ​ഗ്രഹിക്കുന്ന പൗരന്മാരിൽ നിന്ന് അപേക്ഷകൾ സ്വീകരിക്കുന്നതിനായി റിയൽ എസ്റ്റേറ്റ് ബാലൻസ് പ്ലാറ്റ്ഫോം ആരംഭിച്ച് റിയാദ് റോയൽ കമ്മിഷൻ. ഭൂമി താങ്ങാവുന്ന വിലയിൽ ലഭ്യമാക്കി റിയൽ എസ്റ്റേറ്റ് മേഖലയെ സുസ്ഥിരമാക്കാനാണ് ഈ പ്ലാറ്റ്ഫോം ലക്ഷ്യമിടുന്നത്. ഈ വർഷം ആദ്യം കിരീടാവകാശി മുഹമ്മദ് ബിൻ സൽമാൻ പ്രഖ്യാപിച്ച നിർദ്ദേശങ്ങളുടെ ഭാ​ഗമായാണ് ഈ സംരംഭം. 

ഇതുവഴി, അടുത്ത അഞ്ച് വർഷക്കാലം പ്രതിവർഷം 10,000 മുതൽ 40,000 വരെ പ്ലോട്ടുകൾ നൽകാനാണ് റോയൽ കമ്മിഷൻ ഫോർ റിയാദ് സിറ്റി (RCRC) ഉദ്ദേശിക്കുന്നതെന്ന് സഊദി പ്രസ് ഏജൻസി റിപ്പോർട്ട് ചെയ്തു. ഇതനുസരിച്ച് ഒരു ചതുരശ്ര മീറ്ററിന് 1,500 റിയാലിൽ (400 ഡോളർ) കൂടുതൽ വിലയുണ്ടാകില്ല. 

ALSO READ: ഐഫോൺ 17 എവിടെ നിന്ന് വാങ്ങുന്നതാണ് ലാഭം; ഇന്ത്യ, യുഎസ്, യുകെ, യുഎഇ എന്നിവിടങ്ങളിലെ വില വ്യത്യാസം അറിയാം

യോ​ഗ്യത

1) അപേക്ഷകർ സഊദി പൗരന്മാരായിരിക്കണം. 
2) വിവാഹിതരോ 25 വയസ്സിന് മുകളിലുള്ളവരോ ആയിരിക്കണം. 
3) കുറഞ്ഞത് മൂന്ന് വർഷമെങ്കിലും റിയാദിൽ താമസിച്ചവരായിരിക്കണം.
4) മറ്റൊരു സ്വത്തും സ്വന്തമായി ഉണ്ടാകാത്തവരായിരിക്കണം. 
5) ഒക്ടോബർ 23 ആണ് അപേക്ഷ അയക്കാനുള്ള അവസാന തീയതി. 

ഇത്തരത്തിൽ വിജയികളായ അപേക്ഷകർ 10 വർഷത്തിനകം സ്വന്തം ഭൂമിയിൽ വീട് നിർമ്മിക്കണം. അല്ലെങ്കിൽ കെട്ടിടം കണ്ടുകെട്ടലിന് വിധേയമാകും. നിർമ്മാണത്തിന് ധനസഹായം നൽകുന്ന മോർട്ട്ഗേജുകൾ ഒഴികെ, ഈ കാലയളവിൽ പുനർവിൽപ്പനയും കൈമാറ്റവും നിരോധിച്ചിട്ടുണ്ട്. 

ALSO READ: ദുബൈയിൽ ഐഫോൺ 17 പ്രീ ഓർഡർ ഇന്ന് ആരംഭിച്ചു; 3,500 ദിർഹം വരെ ലാഭിക്കാവുന്ന ഓഫറുകൾ പ്രഖ്യാപിച്ച് റീട്ടെയിലർമാർ

പ്ലാറ്റ്ഫോമിൽ രജിസ്റ്റർ ചെയ്യുന്നത് ഭൂമി അനുവദിക്കപ്പെടുമെന്ന് ഉറപ്പ് നൽകുന്നില്ലെന്ന് കമ്മിഷൻ വ്യക്തമാക്കി. tawazoun.rcrc.gov.sa എന്ന വെബ്സൈറ്റാണ് അപേക്ഷകൾക്കായുള്ള ഏക മാർഗം. ഒരു മധ്യസ്ഥനും കമ്മീഷനെ പ്രതിനിധീകരിക്കുന്നില്ലെന്നും കമ്മിഷൻ വ്യക്തമാക്കി. 

വിശദാംശങ്ങൾക്കും അപ്ഡേറ്റുകൾക്കുമായി RCRC-യുടെ ഔദ്യോഗിക ചാനലുകൾ സന്ദർശിക്കുക. കൂടാതെ, അന്വേഷണങ്ങൾക്ക് കമ്മിഷന്റെ കോൾ സെന്റർ വഴി ബന്ധപ്പെടാവുന്നതാണ്.