പലരും പരാതി പറയുന്ന കാര്യമാണ് കുറച്ചുനേരം ഉപയോഗിക്കുമ്പോഴേക്കും ഫോണ്‍ ചൂടാവുന്നത്. ഫോണ്‍ മാറ്റിവാങ്ങാന്‍ വരെ ചിന്തിക്കുന്നവരുമുണ്ട്. എന്നാല്‍ എന്തുകൊണ്ടാണ് ഫോണ്‍ ചൂടാകുന്നതെന്ന് ചിന്തിച്ചിട്ടുണ്ടോ.. ഫോണ്‍ ചൂടാവുന്നതിന് പിന്നില്‍ നിരവധി കാരണങ്ങളുണ്ട്. അതിലെ പ്രധാനകാരണം ഫോണ്‍ ചാര്‍ജിലിടുന്നത് സംബന്ധിച്ചാണ്. 

നമ്മള്‍ ഉപയോഗിക്കുന്ന ഫോണുകളില്‍ കൂടുതലും ലിഥിയം അയേണ്‍ ബാറ്ററികളാണ്. കൂടുതല്‍ നേരം ചാര്‍ജിന് ഇടുന്നുണ്ടെങ്കില്‍ ഫോണ്‍ ചൂടാവാനുള്ള സാധ്യത വളരെ കൂടുതലാണ്. ഇതിന് കാരണം ബാറ്ററി ചാര്‍ജിങ് പാറ്റേണ്‍ തകിടം മറിയുന്നതാണ്. അധികം സമയം ഫോണ്‍ ചാര്‍ജിന് ഇടുന്നത് ബാറ്ററിയുടെ ദീര്‍ഘായുസിനെ നേരിട്ടു ബാധിക്കുന്ന കാര്യങ്ങളാണ്.

ഇനി ഇന്നത്തെ കാലത്തെ പല ഫോണുകളിലും 100 ശതമാനം ചാര്‍ജ് ആയാല്‍ തനിയെ ചാര്‍ജിങ് നിലക്കുന്ന ടെക്‌നോളജി അടങ്ങിയിട്ടുണ്ട്. എന്നാല്‍ അങ്ങനെ ഉള്ള പല ഫോണുകളും നമ്മള്‍ ഉപയോഗിക്കാത്തപ്പോള്‍ പോലും പ്രവര്‍ത്തിക്കുന്ന ആപ്പുകള്‍ ഫോണുകളില്‍ അടങ്ങിയിട്ടുണ്ട്. ഈ ആപ്ലിക്കേഷനുകളുടെ പ്രവര്‍ത്തനം വഴി ചാര്‍ജ് കുറയും. അങ്ങനെ ചാര്‍ജ് 99 ശതമാനത്തിലേക്കെത്തിയാല്‍ പല സ്മാര്‍ട്ട്‌ഫോണുകളും വീണ്ടും ചാര്‍ജ് കയറി തുടങ്ങും. ഇത് രാത്രിയില്‍ പലകുറി ആവര്‍ത്തിക്കുന്നതോടെ സ്മാര്‍ട്ട്‌ഫോണ്‍ ബാറ്ററിയുടെ പ്രവര്‍ത്തനത്തെ ബാധിക്കുകയും ചെയ്യും.

അതുകൊണ്ട് ഫോണ്‍ ചൂടാകാതിരിക്കാനും ദീര്‍ഘകാലം നിലനില്‍ക്കുന്നതിനും ഫോണ്‍ രാത്രിയില്‍ ചാര്‍ജിനിടുന്നത് ഒഴിവാക്കുക.