തിരുവനന്തപുരം: നഗരത്തിലെ പ്രമുഖ ഹോട്ടല്‍ ഉടമയെ കൊല്ലപ്പെട്ട നിലയില്‍ കണ്ടെത്തി. ഹോട്ടല്‍ ജീവനക്കാര്‍ താമസിക്കുന്ന വാടക വീടിന്റെ പരിസരത്ത് നിന്നാണ് ഇയാളുടെ മൃതദേഹം കണ്ടെത്തിയത്. വഴുതയ്ക്കാട് കോട്ടണ്‍ഹില്‍ സ്‌കൂളിനു സമീപം പ്രവര്‍ത്തിക്കുന്ന കേരള കഫേ ഹോട്ടല്‍ ഉടമ ജസ്റ്റിന്‍ രാജിനെയാണ് കൊല്ലപ്പെട്ട നിലയില്‍ കണ്ടെത്തിയത്.

ALSO READ: തിരുവനന്തപുരത്തെ ഹോട്ടലുടമയുടെ കൊലപാതകം; ഒളിവിൽ പോയ രണ്ട് ഹോട്ടൽ തൊഴിലാളികൾ പിടിയിൽ

പാറശ്ശാല മുന്‍ എംഎല്‍എ എം സത്യനേശന്റെ മകള്‍ ഗീതയുടെ ഭര്‍ത്താവാണ് ജസ്റ്റിന്‍ രാജ്. ഇയാളുടെ മൃതദേഹം പായകൊണ്ട് മൂടിയ നിലയിലായിരുന്നു. സംഭവത്തിനു പിന്നാലെ ഹോട്ടല്‍ ജീവനക്കാരായ രണ്ട് പേരെ കാണാതായിരുന്നു. സംഭവത്തില്‍ രണ്ട് പേരെ മ്യൂസിയം പൊലിസ് കസ്റ്റഡിയില്‍ എടുത്തിട്ടുണ്ട്. അടിമലത്തുറയില്‍ നിന്നാണ് പൊലിസ് ഇവരെ പിടികൂടിയത്. വിഴിഞ്ഞം സ്വദേശികളായ ഡേവിസ്, രാജേഷ് എന്നിവരെയാണ് പൊലിസ് കസ്റ്റഡിയില്‍ എടുത്തത്. ഇവരെ പിടികൂടാന്‍ പോയ പൊലിസ് ഉദ്യോഗസ്ഥര്‍ക്ക് നേരെ ആക്രമണമുണ്ടായി.

ആകെ എട്ടു ജീവനക്കാരാണ് ഹോട്ടലില്‍ ഉള്ളത്. ഇവരില്‍ ഡേവിസും രാജേഷും ചൊവ്വാഴ്ച ജോലിക്ക് എത്തിയിരുന്നില്ല. ഇവരെ തിരക്കി ജസ്റ്റിന്‍ രാജ് ഇവര്‍ താമസിക്കുന്ന വാടക വീട്ടില്‍ ചെന്നിരുന്നു. ജസ്റ്റിന്‍ രാജ് തിരിച്ചുവരാത്തതിനാല്‍ മറ്റു ജീവനക്കാര്‍ എത്തി പരിശോധിച്ചപ്പോഴാണ് ഇയാളുടെ മൃതദേഹം കണ്ടെത്തിയത്.