മേജർ ലീഗ് സോക്കറിൽ വിജയകുതിപ്പ് തുടർന്ന് ഇന്റർ മയാമി. ഇന്ന് നടന്ന മത്സരത്തിൽ ന്യൂ ഇംഗ്ലണ്ടിനെതിരെ ഒന്നിനെതിരെ രണ്ട് ഗോളുകളുടെ തകർപ്പൻ വിജയമാണ് ഇന്റർ മയാമി നേടിയത്.  മത്സരത്തിൽ അമേരിക്കൻ ക്ലബ്ബിനു വേണ്ടി ഇരട്ട ഗോൾ നേടി ലയണൽ മെസി മിന്നും പ്രകടനമാണ് പുറത്തെടുത്തത്.

ഈ ഇരട്ട ഗോളോടെ മറ്റൊരു താരത്തിനും സ്വന്തമാക്കാൻ സാധിക്കാത്ത ഒരു റെക്കോർഡ് ആണ് മെസ്സി കൈപ്പിടിയിലാക്കിയത്. ഇതിൽ ഒരു ഗോൾ മെസി പെനാൽറ്റി ബോക്സിന് പുറത്തു നിന്നുമാണ് നേടിയത്. ഈ ഒറ്റ ഗോളോടെ പെനാൽറ്റി ബോക്സിന് പുറത്തുനിന്നും 100 ഗോളുകൾ നേടുന്ന ഫുട്ബോൾ ചരിത്രത്തിലെ ആദ്യ താരമായി മെസി മാറി.

മത്സരത്തിന്റെ ആദ്യപകുതിയിൽ തന്നെ മെസി രണ്ട് ഗോളുകൾ സ്വന്തമാക്കിയിരുന്നു. മത്സരത്തിൽ 27, 38 എന്നീ മിനിറ്റുകളിൽ ആയിരുന്നു മെസിയുടെ ഗോളുകൾ പിറന്നത്. മത്സരം അവസാനിക്കാൻ 10 മിനിറ്റുകൾ ബാക്കിനിൽക്കെ കാർലെസ് ഗില്ലിന്റെ വകയായിരുന്നു ന്യൂ ഇംഗ്ലണ്ടിന്റെ ആശ്വാസ ഗോൾ പിറന്നത്. 

മത്സരത്തിൽ ബോൾ പൊസഷന്റെ കാര്യത്തിൽ മെസിയും സംഘവും മുന്നിട്ടുനിന്നെങ്കിലും ഷോട്ടുകളുടെ എണ്ണത്തിൽ ന്യൂ ഇംഗ്ലണ്ട് ആയിരുന്നു ഇന്റർ മയാമിയെക്കാൾ മുന്നിൽ എത്തിയത്. 56% ബോൾ പൊസഷൻ സ്വന്തമാക്കിയ ഇന്റർ മയാമിക്ക് 13 ഷോട്ടുകളാണ് എതിരാളികളുടെ പോസ്റ്റിലേക്ക് നേടാൻ സാധിച്ചത്. ഇതിൽ മൂന്ന് ഷോട്ടുകളും ഓൺ ടാർഗെറ്റിലേക്ക് ആയിരുന്നു. മറുഭാഗത്ത് 16 ഷോട്ടുകളിൽ നിന്നും ആറ് ഷോട്ടുകളും ന്യൂ ഇംഗ്ലണ്ട് ഇന്റർ മയാമിയുടെ പോസ്റ്റിലേക്ക് എത്തിച്ചു. 

നിലവിൽ മേജർ ലീഗ് സോക്കറിന്റെ പോയിന്റ് പട്ടികയിൽ അഞ്ചാം സ്ഥാനത്താണ് ഇന്റർ മയാമി. 18 മത്സരങ്ങൾ പിന്നിട്ടപ്പോൾ 10 വിജയവും അഞ്ച് സമനിലയും മൂന്ന് തോൽവിയും അടക്കം 35 പോയിന്റാണ് ഇന്റർ മയാമിയുടെ കൈവശമുള്ളത്. ന്യൂ ഇംഗ്ലണ്ട് 20 മത്സരങ്ങളിൽ നിന്നും ആറ് വീതം വിജയവും തോൽവിയും എട്ട് സമനിലയും അടക്കം 24 പോയിന്റുമായി പതിനൊന്നാം സ്ഥാനത്തുമാണ്.

Lionel Messi Create a Historical Record in Major League Soccer