മലപ്പുറം: കുറ്റിപ്പുറത്ത് സ്വകാര്യ ആശുപത്രിയില്‍ നഴ്‌സ് അമീന ആത്മഹത്യ ചെയ്തത് ജനറല്‍ മാനേജറുടെ മാനസിക പീഡനം കൊണ്ടാണെന്ന് ആരോപണം. ആശുപത്രി ജനറല്‍ മാനേജര്‍ അബ്ദുല്‍ റഹ്മാനെതിരേയാണ് പരാതി. കോതമംഗലം സ്വദേശിയാണ് 20 കാരിയായ അമീന. കഴിഞ്ഞ ശനിയാഴ്ചയാണ് കുറ്റിപ്പുറം സ്വകാര്യ ആശുപത്രിയിലെ ഹോസ്റ്റലില്‍ നഴ്‌സായ അമീനയെ അബോധാവസ്ഥയില്‍ കണ്ടെത്തിയത്.

 ഗുളികകള്‍ കഴിച്ച് ബോധം നഷ്ടപ്പെട്ട അമീനയെ കോഴിക്കോട്ടെ സ്വകാര്യ ആശുപത്രിയിലെത്തിച്ചെങ്കിലും മരണപ്പെടുകയായിരുന്നു. ആശുപത്രി ജനറല്‍ മാനേജറായ അബ്ദുല്‍ റഹ്്മാന്റെ മാനസിക പീഡനമാണ് ആത്മഹത്യക്ക് കാരണമെന്നാണ് കൂടെ ജോലി ചെയ്തവരുടെ ആരോപണം. മുമ്പും നിരവധി പേര്‍ക്ക് ഇയാളുടെ മാനസിക പീഡനം നേരിട്ടതായി ആരോപണമുണ്ട്. പലര്‍ക്കും ജോലി അവസാനിപ്പിച്ച് പോകേണ്ടി വന്നിട്ടുണ്ടെന്നും ഇവര്‍ പറയുന്നു.

ഇയാള്‍ക്കെതിരേ ആശുപത്രിയില്‍ ജോലി ചെയ്യുന്നവരും മുമ്പ് ചെയ്തവരും ഉള്‍പ്പെടെ 10 ഓളം പേര്‍ കുറ്റിപ്പുറം പൊലിസിന് പരാതി നല്‍കുകയും ചെയ്തിട്ടുണ്ട്. പരാതി ഉയര്‍ന്നതോടെ അബ്ദുല്‍ റഹ്മാനെ ജോലിയില്‍ നിന്ന് പിരിച്ചു വിട്ടുവെന്നും അന്വേഷണവുമായി സഹകരിക്കുമെന്നും ആശുപത്രി മാനേജ്‌മെന്റ് അറിയിച്ചിട്ടുണ്ട്.