ന്യൂഡൽഹി: കനത്ത മഴയെ തുടർന്നുണ്ടായ വെള്ളപ്പൊക്കവും മണ്ണിടിച്ചിലും ദുരിതം വിതച്ച കേരളം,അസം,ഉത്തരാഖണ്ഡ്,മണിപ്പൂർ,മേഘാലയ, മിസോറം എന്നീ ആറ് സംസ്ഥാനങ്ങൾക്ക് കേന്ദ്ര സർക്കാർ 1,066.80 കോടി രൂപയുടെ സാമ്പത്തിക സഹായം അനുവദിച്ചു. സംസ്ഥാന ദുരന്ത പ്രതികരണ ഫണ്ടിൽ (SDRF) നിന്നാണ് ഈ തുക കേന്ദ്ര വിഹിതമായി നൽകിയതെന്ന് ആഭ്യന്തര മന്ത്രാലയം അറിയിച്ചു. ഇതിൽ മുണ്ടക്കൈ, ചൂരൽമല തുടങ്ങിയ വയനാട്ടിലെ ദുരന്തബാധിത പ്രദേശങ്ങൾക്ക് 153.20 കോടി രൂപ ലഭിക്കും.  പ്രളയവും മണ്ണിടിച്ചിലും ബാധിച്ച സംസ്ഥാനങ്ങൾക്ക് സാധ്യമായ എല്ലാ സഹായവും നൽകാൻ സർക്കാർ പ്രതിജ്ഞാബദ്ധമാണെന്ന് കേന്ദ്ര ആഭ്യന്തര മന്ത്രി അമിത് ഷാ എക്സിൽ കുറിച്ചു.

 

ഈ വർഷം 19 സംസ്ഥാനങ്ങൾക്ക് 8,000 കോടിയിലധികം രൂപ എസ്ഡിആർഎഫ്/എൻഡിആർഎഫ് ഫണ്ടുകളിൽ നിന്ന് നൽകിയിട്ടുണ്ട്. സാമ്പത്തിക സഹായത്തിന് പുറമെ, എൻഡിആർഎഫ്, കരസേന, വ്യോമസേന എന്നിവയുടെ വിന്യാസം ഉൾപ്പെടെയുള്ള ലോജിസ്റ്റിക് പിന്തുണയും ഉറപ്പാക്കുന്നുവെന്നും കുറിപ്പിൽ വ്യക്തമാക്കി. തുടർച്ചയായ മൺസൂൺ മഴയിൽ 21 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 104 എൻഡിആർഎഫ് സംഘങ്ങളെ വിന്യസിച്ചിട്ടുണ്ട്. ഇന്ത്യൻ സൈന്യം 'ഓപ്പറേഷൻ ജൽ റാഹത്ത് 2' എന്ന പേര് നൽകി നാഗാലാൻഡ്, അസം, മണിപ്പൂർ എന്നിവിടങ്ങളിൽ മാനുഷിക സഹായവും ദുരന്ത നിവാരണ പ്രവർത്തനങ്ങളും ആരംഭിച്ചതായും കേന്ദ്രം വ്യക്തമാക്കി.

സംസ്ഥാനങ്ങൾക്ക് ലഭിച്ച തുക:

ഉത്തരാഖണ്ഡ്: 455.60 കോടി രൂപ
അസം: 375.60 കോടി രൂപ
കേരളം: 153.20 കോടി രൂപ
മേഘാലയ: 30.40 കോടി രൂപ
മണിപ്പൂർ: 29.20 കോടി രൂപ
മിസോറം: 22.80 കോടി രൂപ

ഈ വർഷത്തെ മറ്റ് സഹായങ്ങൾ:

14 സംസ്ഥാനങ്ങൾക്ക് എസ്ഡിആർഎഫിൽ നിന്ന് 6,166.00 കോടി രൂപ.
12 സംസ്ഥാനങ്ങൾക്ക് ദേശീയ ദുരന്ത പ്രതികരണ നിധിയിൽ (NDRF) നിന്ന് 1,988.91 കോടി രൂപ.
അഞ്ച് സംസ്ഥാനങ്ങൾക്ക് സംസ്ഥാന ദുരന്ത ലഘൂകരണ നിധിയിൽ (SDMF) നിന്ന് 726.20 കോടി രൂപ.
രണ്ട് സംസ്ഥാനങ്ങൾക്ക് ദേശീയ ദുരന്ത ലഘൂകരണ നിധിയിൽ (NDMF) നിന്ന് 17.55 കോടി രൂപ.

The Central Government has allocated ₹1,066.80 crore to six flood-hit states, with Wayanad receiving ₹153 crore, Uttarakhand ₹455 crore, and Assam ₹375 crore to aid relief and rehabilitation efforts following severe floods and landslides caused by the southwest monsoon