കോഴിക്കോട്: ടെലഗ്രാം അക്കൗണ്ടിലെ സ്വകാര്യ വിവരങ്ങൾ കൈക്കലാക്കാൻ സ്ലീപ്പർ സെല്ലുകൾ സജ്ജം. ടെലഗ്രാം സജീവമായി ഉപയോഗിക്കുന്നവരെ ലക്ഷ്യമിട്ടാണ് ഹാക്കർമാരെ ഉപയോഗിച്ച് വിവരങ്ങൾ ചോർത്തുന്നത്.

പരിചയക്കാരുടെ അക്കൗണ്ടുകൾക്ക് സമാനമായി വ്യാജ അക്കൗണ്ടുകളുണ്ടാക്കിയാണ് വിവരങ്ങൾ ശേഖരിക്കുന്നത്. ഇത്തരത്തിൽ നിരവധി പരാതികളാണ് സൈബർ പൊലിസിൽ എത്തുന്നത്. കോഴിക്കോട് സ്‌റ്റേഷനിൽ ഇന്നലെയും യുവതി പരാതിയുമായെത്തി.

ALSO READ: എക്സ്എഐ ഗ്രോക്കിന്റെ 'ഭയനകമായ പെരുമാറ്റം'; എലോൺ മസ്കിന്റെ ചാറ്റ്ബോട്ട് കമ്പനി മാപ്പ് പറഞ്ഞു

വിവരങ്ങൾ ചോർത്തിയ ആളുടെ അതേപേരിൽ മറ്റൊരു ഫോൺനമ്പറിൽ അക്കൗണ്ടുണ്ടാക്കുകയാണ് ആദ്യം ചെയ്യുന്നത്. പിന്നീട് അവരുടെ സഹൃത്തുക്കളുടെ അക്കൗണ്ടിലേക്ക് സന്ദേശമയക്കും. സന്ദേശങ്ങൾ കൈമാറുന്നതിനിടെ വെബ്‌സൈറ്റിന്റെ ലിങ്ക് അയയ്ക്കും. ഈ ലിങ്ക് തുറക്കുന്നതോടെ വിവരങ്ങൾ ഹാക്കർമാർ കരസ്ഥമാക്കുന്നു.

തുടർന്ന് ഇവരുടെ സുഹൃത്തുക്കൾക്ക് വ്യാജ അക്കൗണ്ടിൽ സന്ദേശം അയച്ച് പിന്നീട് ലിങ്ക് അയയ്ക്കുകയാണ് പതിവ്. ഇപ്രകാരം നിരവധി അക്കൗണ്ടുകളാണ് വ്യാജമായി ഹാക്കർമാർ കൈകാര്യം ചെയ്യുന്നത്. അശ്ലീല സൈറ്റുകളിലേക്ക് ക്ഷണിച്ചുള്ള ലിങ്കുകളും എത്തുന്നുണ്ട്. സന്ദേശങ്ങളിൽ സംശയം തോന്നി അന്വേഷിക്കുമ്പോൾ മാത്രമാണ് വ്യാജ അക്കൗണ്ടാണെന്ന് തിരിച്ചറിയുന്നത്. ഇതോടെ വ്യാജ സന്ദേശം പ്രചരിക്കുന്ന ടെലഗ്രാം അക്കൗണ്ടുകൾ ഒഴിവാക്കിയാലും ഹാക്കർമാരുടെ കൈവശം അക്കൗണ്ട് ഉണ്ടാകും. ദുരുപയോഗം തുടരും. ഇതോടെയാണ് പലരും സൈബർ പൊലിസിനെ സമീപിക്കുന്നത്.

ALSO READ: ട്രെൻഡിംഗ് വിടവാങ്ങുന്നു: യൂട്യൂബിന്റെ പുതിയ മാറ്റങ്ങൾ എന്തൊക്കെ?

ഏതാനും മാസങ്ങളിലായി 150 വ്യാജ ടെലഗ്രാം അക്കൗണ്ടുകളാണ് സൈബർ പൊലിസ് നിശ്ചലമാക്കിയത്. സിനിമകളും ദൈർഘ്യമേറിയ വീഡിയോകളുമടക്കം വലിയ ഫയലുകൾ പങ്കുവയ്ക്കാൻ ടെലിഗ്രാം വലിയതോതിൽ ഉപയോഗിക്കുന്നുണ്ട്. സുരക്ഷാക്രമീകരണ സംവിധാനമായ ടു സ്റ്റെപ്പ് ഒതന്റിഫിക്കേഷൻ ഉപയോഗപ്പെടുത്താൻ പലരും തയാറാകാത്തതാണ് അക്കൗണ്ടുകൾ ലക്ഷ്യമിടാൻ ഹാക്കർമാരെ പ്രേരിപ്പിക്കുന്നത്. വിശ്വാസയോഗ്യമല്ലാത്ത വെബ്‌സൈറ്റുകളിൽ പ്രവേശിക്കുന്നതും ടെലിഗ്രാമിലെ ചില വീഡിയോ ലിങ്കുകളിൽ ക്ലിക്ക് ചെയ്യുന്നതുമെല്ലാം ഹാക്കർമാർക്ക് സൗകര്യമാകും. അപരിചിതരുമായി ടെലഗ്രാമിൽ ചാറ്റ് ചെയ്യുന്നതും അപകടമായേക്കാം.