ഗസ്സ: ഗസ്സ സിറ്റിയിൽ ആക്രമണം കടുപ്പിക്കുമെന്ന സൂചനയുമായി ഇസ്‌റാഈൽ. ഗസ്സ സിറ്റിയെ ഏറ്റവും 'അപകടകരമായ പോരാട്ട മേഖലയായി' ഇസ്‌റാഈൽ പ്രഖ്യാപിച്ചു. തന്ത്രപരമായ വെടിനിർത്തൽ മേഖലയായായിരുന്നു ഗസ്സ സിറ്റിയെ ഇസ്‌റാഈൽ നേരത്തെ വിശേഷിപ്പിച്ചിരുന്നത്. 
ഇസ്‌റാഈൽ സർക്കാരിന്റെ നിർദേശപ്രകാരമുള്ള സുരക്ഷാ അവലോകനത്തിലാണ് ഗസ്സ സിറ്റിക്ക് പുതിയ വിശേഷണം നൽകുന്നതെന്ന് ഇസ്‌റാഈൽ സേനയുടെ അറബിക് വക്താവ് അവിച്ചെ ആഡ്രെയീ പറഞ്ഞു. 

ഇതു പ്രകാരം ഇന്നലെ രാവിലെ മുതൽ പ്രാദേശികമായി നൽകിയ താൽക്കാലിക വെടിനിർത്തൽ ഗസ്സ സിറ്റിക്ക് ബാധകമാകില്ലെന്നും അപകടകരമായ പോരാട്ട മേഖലയായി കണക്കാക്കുമെന്നും അദ്ദേഹം പറഞ്ഞു. കഴിഞ്ഞ ഒരാഴ്ചയായി ഗസ്സ സിറ്റിയിൽ ഇസ്‌റാഈൽ സൈന്യം ആക്രമണം ശക്തിപ്പെടുത്തിയിട്ടുണ്ട്.ഗസ്സ സിറ്റി പിടിച്ചെടുക്കാൻ ഇസ്‌റാഈൽ മന്ത്രിസഭാ യോഗം തീരുമാനിച്ചതോടെയാണ് സൈന്യം ആക്രമണം ശക്തമാക്കിയത്.

ഗസ്സ സിറ്റിയെ മൂന്നു ഭാഗമാക്കി തിരിച്ചാണ് നേരത്തെ ഇസ്‌റാഈൽ സൈന്യം ആക്രമണം നടത്തിയിരുന്നത്. ദാറുൽ ബലാഹ്, അൽ മുവാസി മേഖലകളിൽ രാവിലെ 10 മുതൽ രാത്രി 8 വരെ താൽക്കാലിക വെടിനിർത്തലായിരുന്നു.

ഇതിനിടെ, ഇസ്‌റാഈൽ സൈന്യം ഇന്നലെ ഗസ്സയിൽ 51 പേരെ കൂടി കൊലപ്പെടുത്തി. മധ്യ ഗസ്സയിലെ നെറ്റ്‌സാരിം അതിർത്തിയിൽ സഹായം തേടിയെത്തിയ ഏഴു പേരെയും ഇസ്‌റാഈൽ സൈന്യം വെടിവച്ചുകൊന്നു. വ്യാഴാഴ്ച 59 പേരെ ഗസ്സയിൽ കൊലപ്പെടുത്തിയിരുന്നു. ഇതിൽ 23 പേർ സഹായം തേടിയെത്തിയവരാണ്. 

ഗസ്സ സിറ്റിയിലെ അൽ മവാസി മേഖലയിലാണ് ഇസ്‌റാഈൽ സൈന്യം ഇന്നലെ കൂട്ടക്കൊല നടത്തിയത്. ഗസ്സയിൽ പട്ടിണിയെ തുടർന്ന് മരിച്ചവരുടെ എണ്ണം 322 ആയി. ഇതിൽ 121 പേർ കുട്ടികളാണ്.