ന്യൂഡൽഹി: താലിബാൻ അധികാരത്തിലേറി നാലുവർഷത്തിന് ശേഷം അഫ്ഗാൻ മന്ത്രിയുടെ ആദ്യ ഉന്നതതല രാഷ്ട്രീയ സന്ദർശനത്തിനൊരുങ്ങി ഇന്ത്യ. താലിബാൻ സർക്കാരിലെ വിദേശകാര്യമന്ത്രി അമീർ ഖാൻ മുത്തഖി അടുത്തയാഴ്ച ഇന്ത്യ സന്ദർശിക്കുമെന്നാണ് റിപ്പോർട്ട്. സന്ദർശന തിയതി നിശ്ചയിച്ചിട്ടില്ല. സ്ഥിരീകരിച്ചുകഴിഞ്ഞാൽ താലിബാൻ നേതാവിനെ സന്ദർശിക്കാൻ അനുവദിക്കുന്നതിനായി ഇന്ത്യ യു.എൻ രക്ഷാസമിതിയെ സമീപിക്കും. നിലവിൽ യു.എൻ ഉപരോധപട്ടികയിലുള്ള വ്യക്തിയായതിനാൽ അമീർ ഖാൻ മുത്തഖിയുടെ ഔദ്യോഗിക സന്ദർശനത്തിന് രക്ഷാസമിതിയുടെ അംഗീകാരം ആവശ്യമാണ്. എല്ലാ കൗൺസിൽ അംഗങ്ങളും ഉൾപ്പെടുന്ന യു.എന്നിന്റെ ഉപരോധ സമിതി യാത്രാ ഇളവുകൾ ഏകകണ്ഠമായി അംഗീകരിക്കണം.

താലിബാൻ മന്ത്രിയെ ഇന്ത്യ ക്ഷണിക്കുകയും ക്ഷണം സ്വീകരിക്കുകയും ചെയ്തിട്ടുണ്ടെങ്കിലും ഉപരോധമുൾപ്പെടെയുള്ള തടസങ്ങളുള്ളതിനാലാണ് സന്ദർശനം നീളുന്നതെന്നാണ് കേന്ദ്ര വിദേശകാര്യമന്ത്രാലയ വൃത്തങ്ങൾ പറയുന്നത്. അംഗീകാരം ലഭിക്കുന്നതോടെ സന്ദർശനം ഇന്ത്യയും താലിബാൻ ഭരണകൂടവും തമ്മിലുള്ള ഏറ്റവും ഉയർന്ന തലത്തിലുള്ള ഉഭയകക്ഷി ബന്ധത്തെ പ്രതിനിധീകരിക്കുന്നതാകുമെന്ന് ഔദ്യോഗികവൃത്തങ്ങൾ പറഞ്ഞു. ഇതുസംബന്ധിച്ച യു.എൻ സമിതി അധ്യക്ഷപദവി നിലവിൽ പാകിസ്ഥാനാണ്. ഈ മാസം ആദ്യം യു.എസ് എതിർപ്പുന്നയിച്ചതിനാൽ മുത്തഖിയുടെ പാക് സന്ദർശനം സാധ്യമായിരുന്നില്ല.

ALSO READ: ജി.എസ്.ടി സ്ലാബ് ചുരുക്കൽ ക്ഷേമ, വികസന പദ്ധതികളെ ബാധിക്കും; ആലോചനയില്ലാത്ത നടപടിയിൽ ആശങ്കയറിയിച്ച് സംസ്ഥാനങ്ങൾ

പഹൽഗാം ഭീകരാക്രമണത്തെ തുടർന്ന് അതിർത്തിയിൽ രൂപപ്പെട്ട ഇന്ത്യാ-പാക് സംഘർഷം അയവുവന്നതിന് തൊട്ടുപിന്നാലെ വിദേശകാര്യ മന്ത്രി എസ്. ജയശങ്കറും മുത്തഖിയും തമ്മിൽ നടത്തിയ ഫോൺ സംഭാഷണത്തിലാണ് സന്ദർശനം സംബന്ധിച്ച് തീരുമാനമായത്. 

അദ്യം വിയോജിപ്പ്, പിന്നെ അടുപ്പം 

2021 ഓഗസ്റ്റിൽ യു.എസ് അധിനിവേശ സൈന്യം അഫ്ഗാൻ വിട്ടതിനെ തുടർന്ന് താലിബാൻ അധികാരത്തിൽ വന്നതോടെ അഫ്ഗാൻ പൗരന്മാർക്കുള്ള വിസ ഇന്ത്യ റദ്ദാക്കുകയും കാബൂളിലെ എംബസി ഒഴിപ്പിക്കുകയും ചെയ്തിരുന്നു. താലിബാൻ ഭരണകൂടത്തെ ഇന്ത്യ ഔദ്യോഗികമായി അംഗീകരിക്കുന്നില്ലെങ്കിലും താലിബാനെ അകറ്റാതെ, തന്ത്രപ്രധാനമായ സമീപനം ആയിരുന്നു ഇന്ത്യ സ്വീകരിച്ചുപോന്നത്.

മേഖലയിലെ പ്രധാന എതിരാളികളായ ചൈനയും പാകിസ്താനും താലിബാനുമായി അടുപ്പം കാണിക്കാനുള്ള സാധ്യതമുന്നിൽക്കണ്ട്, അഫ്ഗാൻ ഭരണകൂടവുമായി 2023ൽ ഇന്ത്യ ഔദ്യോഗിക ചർച്ചകൾക്ക് തുടക്കമിട്ടു. തുടർന്ന് ഇരുരാജ്യത്തെയും മുതിർന്ന ഉദ്യോഗസ്ഥർ തമ്മിലും പലതവണ ചർച്ചനടക്കുകയുംചെയ്തു. ഇതിനൊടുവിലാണ് വിദേശകാര്യമന്ത്രിയെ ഇന്ത്യയിലേക്ക് ക്ഷണിക്കുന്നത്. നിലവിൽ താലിബാന് ഇന്ത്യയിൽ ഔദ്യോഗിക നയതന്ത്രകാര്യാലയം ഇല്ലെങ്കിലും, മുംബൈയിൽ അനൗദ്യോഗിക കോൺസുലേറ്റ് പ്രവർത്തിക്കുന്നുണ്ട്. 'സാങ്കേതിക സംഘം' എന്നപേരിൽ കാബൂളിൽ ഇന്ത്യക്കും ഓഫിസുണ്ട്.