റിയാദ്: കുറഞ്ഞ വിലയില്‍ മികച്ച ഗുണമേന്മയുള്ള ഉല്‍പ്പന്നങ്ങള്‍ ലഭ്യമാക്കുന്ന ലുലുവിന്റെ വാല്യൂ കണ്‍സെപ്റ്റ് സ്റ്റോറായ 'ലോട്ടി'ന്റെ മൂന്ന് പുതിയ സ്റ്റോറുകള്‍ സഊദി അറേബ്യയില്‍ തുറന്നു. മക്ക, കിഴക്കന്‍ പ്രവിശ്യയിലെ സൈഹാത്ത്, റിയാദ് എന്നിവിടങ്ങളിലാണ് പുതിയ ലോട്ട് സ്റ്റോറുകള്‍. ലുലു ഗ്രൂപ്പ് ചെയര്‍മാന്‍ എം.എ യൂസഫലിയുടെ സാന്നിധ്യത്തില്‍ റോയല്‍ കമ്മീഷന്‍ ഫോര്‍ മക്ക സിറ്റി ആന്‍ഡ് ഹോളി സൈറ്റ്‌സ് ഇന്‍വെസ്റ്റ്‌മെന്റ് ആന്‍ഡ് പാര്‍ട്ണര്‍ഷിപ്‌സ് ജനറല്‍ മാനേജര്‍ ഡോ. വലീദ് ബാ സുലൈമാന്‍ ലോട്ടിന്റെ ഉദ്ഘാടനം നിര്‍വഹിച്ചു. മക്ക മുനിസിപ്പാലിറ്റി ഇന്‍വെസ്റ്റ്‌മെന്റ് ആന്‍ഡ് പ്ലാനിങ് ഡയരക്ടര്‍ ജനറല്‍ എന്‍ജി. യാസര്‍ അത്തര്‍, വ്യവസായ പ്രമുഖരായ എന്‍ജി. അബ്ദുല്‍ അസീസ് അല്‍ സിന്ദി, ശൈഖ് ഇബ്രാഹിം അല്‍ റിഫാഇ തുടങ്ങിയവരുടെ സാന്നിധ്യത്തിലായിരുന്നു ഉദ്ഘാടന ചടങ്ങ്.

സഊദി അറേബ്യയുടെ വിഷന്‍ 2030ന് പിന്തുണ നല്‍കുകയാണ് ലുലുവെന്നും ഉപഭോക്താകളുടെ വാല്യു ഷോപ്പിങ് ആവശ്യകത കൂടി കണക്കിലെടുത്താണ് ലോട്ട് സ്റ്റോറുകളുടെ സാന്നിധ്യം ലുലു വിപുലമാക്കുന്നതെന്നും ലുലു ഗ്രൂപ്പ് ചെയര്‍മാന്‍ എം.എ യൂസഫലി പറഞ്ഞു. പുതിയ നാല് ലോട്ട് സ്റ്റോറുകള്‍ കൂടി സഊദി അറേബ്യയില്‍ ഉടന്‍ തുറക്കുമെന്നും യൂസഫലി വ്യക്തമാക്കി. മികച്ച ഉല്‍പ്പന്നങ്ങളും കുറഞ്ഞ നിരക്കിലാണ് ലോട്ട് സ്റ്റോറുകളില്‍ ലഭ്യമാക്കിയിരിക്കുന്നത്. 22 റിയാലില്‍ താഴെയാണ് വില. വീട്ടുപകരണങ്ങള്‍, കിച്ചന്‍ വെയര്‍, ഫാഷന്‍, ബ്യൂട്ടി പ്രൊഡ്ക്ട്‌സ് അടക്കം വിപുലമായ ശേഖരമാണ് ലോട്ടില്‍ ഒരുക്കിയിട്ടുള്ളത്. സഊദി അറേബ്യയിലെ പ്രാദേശിക ഉല്‍പ്പന്നങ്ങളും ലോട്ടിലുണ്ട്. അല്‍ റുസഫിയയിലെ അബ്ദുല്ല അരീഫ് സ്ട്രീറ്റിലാണ് മക്കയിലെ ലോട്ട് സ്റ്റോര്‍. 43,000 ചതുരശ്ര അടിയിലുള്ള സ്റ്റോറില്‍ വൈവിധ്യമാര്‍ന്ന ഉല്‍പ്പന്നങ്ങളുടെ ശേഖരമാണുള്ളത്. 600 വാഹനങ്ങള്‍ പാര്‍ക്ക് ചെയ്യാനും സൗകര്യമുണ്ട്. മക്കയ്ക്ക് പുറമെ, സൈഹാത്ത് അല്‍ മുസബ് റാഫി സ്ട്രീറ്റിലും, റിയാദില്‍ അല്‍ മലാസിലുമാണ് പുതിയ ലോട്ട് സ്റ്റോറുകള്‍. 24,000 ചതുരശ്രയടി വലുപ്പത്തിലാണ് സൈഹാത്ത് ലോട്ട് സ്റ്റോര്‍. 187,72 ചതുരശ്രയടി വലുപ്പത്തിലാണ് റിയാദ് അല്‍ മലാസ് ലോട്ട് ഒരുങ്ങിയിരിക്കുന്നത്.

ALSO READ: വിപഞ്ചികയുടെ മൃതദേഹം നാട്ടിലെത്തിക്കും; മകള്‍ വൈഭവിയെ യുഎഇയില്‍ സംസ്‌കരിക്കും

Lulu Group opens three new Lotte stores in Saudi Arabia on the same day