പാലക്കാട്: രാഷ്ട്രപതി ദ്രൗപതി മുർമു അനുമതി നിഷേധിച്ച മലയാള ഭാഷാ ബിൽ വിണ്ടും നിയമസഭയിലെത്തും. പത്തു വർഷം മുമ്പ് നിയമസഭ പാസാക്കിയ മലയാള ഭാഷ (വ്യാപനവും പരിപോഷണവും) പുതിയ രൂപത്തിലായിരിക്കും അടുത്ത നിയമസഭാ സമ്മേളനത്തിൽ അവതരിപ്പിക്കുക. രണ്ടു മാസം മുമ്പാണ് രാഷ്ട്രപതി ബില്ലിന് അനുമതി നിഷേധിച്ചത്. പ്രത്യേക കാരണമൊന്നും ചൂണ്ടിക്കാണിക്കാതെയായിരുന്നു നടപടി.

2015 ഡിസംബർ 17നാണ് 13ാം നിയമസഭ ഐകകണ്‌ഠ്യേന ബിൽ പാസാക്കിയത്. കേരളമൊഴികെ മറ്റെല്ലാ സംസ്ഥാനങ്ങളും 1969ൽ തന്നെ മാതൃഭാഷയിൽ ഭരണനിർവഹണം എന്നതു പ്രാബല്യത്തിലാക്കിയിരുന്നു. ഇതിന്റെ ചുവടുപിടിച്ചാണ് കേരളവും നീക്കം നടത്തിയത്. 1969ൽ സംസ്ഥാനത്തിന്റെ ഔദ്യോഗിക ഭാഷ ഇംഗ്ലിഷും മലയാളവും ആയിരിക്കുമെന്നു വ്യക്തമാക്കി ഔദ്യോഗിക ഭാഷാ നിയമം ഉണ്ടാക്കി. തുടർന്ന് 1973ൽ ഇത് ഇംഗ്ലിഷോ മലയാളമോ ആയിരിക്കുമെന്നു ഭേദഗതി ചെയ്തു. ഇതു സംബന്ധിച്ച് വിവാദമുയർന്നപ്പോഴാണ് 2015ൽ ഔദ്യോഗികഭാഷ മലയാളമാക്കി പുനർനിർവചിച്ച് മലയാള ഭാഷ വ്യാപനവും പരിപോഷണവും ബിൽ പാസാക്കിയത്. ഭാഷാ ന്യൂനപക്ഷങ്ങളുടെ അവകാശങ്ങൾ കണക്കിലെടുക്കുന്നില്ലെന്ന് വിവിധ കോണുകളിൽ നിന്ന് വിമർശനങ്ങൾ ഉയർന്നിരുന്നു. 

ALSO READ: ജഡ്ജിമാർക്കെതിരേ ഫേസ്ബുക്ക്  പോസ്റ്റിട്ടയാൾക്ക് മൂന്ന് ദിവസത്തെ തടവുശിക്ഷ വിധിച്ച് ഹൈക്കോടതി

തമിഴ്, കന്നഡ എന്നിവ മാത്രമേ സംസ്ഥാനം ന്യൂനപക്ഷ ഭാഷകളായി അംഗീകരിക്കുന്നുള്ളൂവെങ്കിലും ബില്ലിൽ തുളു, കൊങ്കണി എന്നിവയും ഉൾപ്പെടുത്തി. സംസ്ഥാന സർക്കാരുമായുള്ള ഔദ്യോഗിക ആശയവിനിമയത്തിനായി ഈ ന്യൂനപക്ഷ വിഭാഗങ്ങളിൽപ്പെട്ടവർക്ക് അവരുടെ ഭാഷയോ ഇംഗ്ലീഷോ ഉപയോഗിക്കാമെന്നും ബില്ലിൽ പരാമർശിച്ചിരുന്നു. എന്നാൽ, ഭാഷാ ന്യൂനപക്ഷങ്ങളുടെ ഭരണഘടനാ അവകാശങ്ങൾ ലംഘിക്കുന്നതാണോ എന്ന സംശയത്തിൽ അന്നത്തെ ഗവർണർ പി. സദാശിവം രാഷ്ട്രപതിയുടെ പരിഗണനയ്ക്ക് അയക്കുകയായിരുന്നു.