തൃശൂര്‍: കുന്നംകുളം കസ്റ്റഡി മര്‍ദ്ദനത്തില്‍ ശക്തമായ പ്രതിഷേധത്തിനൊരുങ്ങി കോണ്‍ഗ്രസ്. യൂത്ത് കോണ്‍ഗ്രസ് പ്രവര്‍ത്തകനെ മര്‍ദ്ദിച്ച പൊലിസുകാര്‍ കാക്കിയിട്ട് വീടിന് പുറത്തിറങ്ങില്ലെന്ന് പ്രതിപക്ഷ നേതാവ് വി.ഡി സതീശന്‍ പറഞ്ഞു. കുറ്റക്കാര്‍ക്കെതിരെ നടപടിയെടുത്തില്ലെങ്കില്‍ കേരളം ഇന്നേവരെ കണ്ടിട്ടില്ലാത്ത സമരം കോണ്‍ഗ്രസ് നടത്തുമെന്നും സതീശന്‍ പറഞ്ഞു. 

കുന്നംകുളം പൊലിസ് സ്റ്റേഷനില്‍ വെച്ച് ക്രൂരമര്‍ദ്ദനത്തിന് ഇരയായ യൂത്ത് കോണ്‍ഗ്രസ് ചൊവ്വന്നൂര്‍ മണ്ഡലം പ്രസിഡന്റ് വിഎസ് സുജിത്തിനെ നേരിട്ടെത്തി ആശ്വസിപ്പിച്ചതിന് ശേഷമാണ് പ്രതിപക്ഷ നേതാവിന്റെ പ്രതികരണം. മുന്നോട്ടുള്ള പോരാട്ടങ്ങള്‍ക്ക് പാര്‍ട്ടിയും, താനും ഒപ്പമുണ്ടാകുമെന്നും, പ്രതികളായ നാല് പൊലിസ് ഉദ്യോഗസ്ഥര്‍ക്കെതിരെയും എത്രയും പെട്ടെന്ന് നടപടി എടുക്കണമെന്നും സതീശന്‍ പറഞ്ഞു. സുജിത്തിന് മര്‍ദ്ദനമേല്‍ക്കുന്ന സിസിടിവ ദൃശ്യങ്ങള്‍ പുറത്തെത്തിക്കുന്നതിനായി വര്‍ഷങ്ങളോളം നിയമ പോരാട്ടം നടത്തിയ കോണ്‍ഗ്രസ് കുന്നംകുളം ബ്ലോക്ക് വൈസ് പ്രസിഡന്റ് വര്‍ഗീസ് ചൊവ്വന്നൂരിനെ പ്രതിപക്ഷ നേതാവ് അഭിനന്ദിക്കുകയും ചെയ്തു. 

ALSO READ: ഗസ്സയില്‍ 'നരകത്തിന്റെ വാതിലുകള്‍' തുറന്നെന്ന് ഇസ്‌റാഈല്‍ പ്രതിരോധ മന്ത്രി; ആക്രമണം ശക്തം, ഗസ്സ സിറ്റിയിലെ ബഹുനില ടവര്‍ നിരപ്പാക്കി, ഇന്ന് കൊല്ലപ്പെട്ടത് 44 പേര്‍ 

അതേസമയം കസ്റ്റഡി മര്‍ദ്ദനത്തില്‍ പൊലിസ് ഉദ്യോഗസ്ഥര്‍ക്കെതിരെ നടപടിയെടുത്തതില്‍ ഒത്തുകളിയെന്ന ആരോപണം ശക്തമാണ്. കേസില്‍ കോടതി പ്രതിചേര്‍ത്ത സിപിഒ ശശിധരനെതിരെ പൊലിസ് ഇതുവരെ നടപടി സ്വീകരിച്ചിട്ടില്ല. സുജിത്തിനെ ശശിധരന്‍ മര്‍ദ്ദിക്കുന്നത് ദൃശ്യങ്ങളില്‍ ഇല്ലെന്ന് കാണിച്ചാണ് നടപടിയില്‍ നിന്ന് ഒഴിവാക്കിയത്. 

എന്നാല്‍ പൊലിസ് സ്റ്റേഷനില്‍ എത്തുന്നതിന് മുന്‍പ് തന്നെ ശശിധരന്‍ മര്‍ദ്ദിച്ചുവെന്ന് സുജിത്ത് മൊഴി നല്‍കിയിരുന്നു. സംഭവത്തില്‍ അന്വേഷണം നടത്തിയ ക്രൈം റെക്കോര്‍ഡ്‌സ് ബ്യൂറോ എസ്പിയുടെ റിപ്പോര്‍ട്ടില്‍ ശശിധരനും കുറ്റക്കാരനാണെന്ന് കണ്ടെത്തിയിട്ടുണ്ട്. ഇത് നിലനില്‍ക്കെയാണ് ശശിധരനെതിരായ നടപടി ഒഴിവാക്കിയത്. 

2023 ഏപ്രിലിലാണ് കേസിനാസ്പദമായ സംഭവം. രാത്രി റോഡരികില്‍ നില്‍ക്കുകയായിരുന്ന സുജിത്തിന്റെ സുഹൃത്തുക്കളെ പട്രോളിങ്ങിനെത്തിയ പൊലിസ് ഭീഷണിപ്പെടുത്തിയിരുന്നു. ഇത് ചോദ്യം ചെയ്ത സുജിത്തിനെ പൊലിസ് സംഘം കസ്റ്റഡിയിലെടുത്ത് സ്റ്റേഷനില്‍ കൊണ്ടുപോയി ക്രൂരമായി മര്‍ദ്ദിക്കുകയായിരുന്നു. വിവരവാകശ നിയമപ്രകാരം സ്റ്റേഷനിലെ സിസിടിവി ദൃശ്യങ്ങള്‍ നല്‍കാന്‍ ആവശ്യപ്പെട്ടെങ്കിലും പൊലിസ് തയ്യാറായിരുന്നില്ല. പിന്നീട് കമ്മീഷന്‍ നേരിട്ട് വിഷയത്തില്‍ ഇടപെടുകയും ദൃശ്യങ്ങള്‍ നല്‍കാന്‍ ഉത്തരവിടുകയും ചെയ്യതു. വര്‍ഷങ്ങള്‍ നീണ്ട നിയമ പോരാട്ടത്തിനൊടുവിലാണ് സുജിത്തിന് പ്രതികളെ കുടുക്കാനായത്. സ്റ്റേഷന്‍ എസ്.ഐ നുഹ്‌മാന്റെ നേതൃത്വത്തിലാണ് സുജിത്തിനെ ക്രൂരമായി മര്‍ദ്ദിച്ചത്. 

V. D. Satheesan strongly condemned the police assault on a Youth Congress leader vs sujith.