ദുബൈ: എമിറേറ്റിലെ വിസ അപേക്ഷാ സേവന കേന്ദ്രമായ ആമറിന്റെ കാര്യക്ഷമത ഉയര്‍ത്താനുള്ള പരിശീലന പദ്ധതിയ്ക്ക് ജനറല്‍ ഡയരക്ടറേറ്റ് ഓഫ് ഐഡന്റിറ്റി ആന്‍ഡ് ഫോറീനേഴ്‌സ് അഫയേഴ്‌സ് ദുബൈ (ജി.ഡി.ആര്‍.എഫ്.എ.ഡി) തുടക്കമിട്ടു. ഇതിന്റെ ഭാഗമായി ആദ്യ സമഗ്ര പരിശീലന ടൂള്‍ കിറ്റ് പുറത്തിറക്കി.
കേന്ദ്രങ്ങളിലെ സേവന നിലവാരം മെച്ചപ്പെടുത്താനും ജീവനക്കാര്‍ക്ക് കൃത്യമായ അറിവ് പകരാനും ലക്ഷ്യമിട്ടുള്ള സുപ്രധാന ചുവടുവെപ്പിന്റെ ഭാഗമായാണ് ഈ പരിശീലനം. സ്ഥാപനപരമായ മികവും മികച്ച ഉപയോക്തൃ സേവനവും ഉറപ്പാക്കുന്ന തൊഴില്‍ സംസ്‌കാരം വളര്‍ത്തുകയെന്ന ജി.ഡി.ആര്‍.എഫ്.എ.ഡിയുടെ ലക്ഷ്യത്തിന്റെ ഭാഗമായാണ് പദ്ധതി നടപ്പാക്കുന്നത്.

കഴിഞ്ഞ രണ്ട് മാസത്തിനുള്ളില്‍ പുതുതായി നിയമിച്ച 80% ആമര്‍ സെന്റര്‍ ജീവനക്കാര്‍ക്കും ഈ പരിശീലനം നല്‍കിക്കഴിഞ്ഞു. നടപടിക്രമങ്ങള്‍, പെരുമാറ്റ രീതികള്‍, നിയമപരമായ കാര്യങ്ങള്‍ എന്നിവയെല്ലാം ഉള്‍ക്കൊള്ളുന്നതായിരുന്നു ഈ സമഗ്ര പരിശീലനം. സ്ഥാപനപരമായ അറിവ് കൈമാറാനും സേവന മികവ് വര്‍ധിപ്പിക്കാനും ഈ പരിശീലന കിറ്റ് ഏകീകൃത മാര്‍ഗനിര്‍ദേശമായി വര്‍ത്തിക്കും. പ്രൊഫഷണല്‍ മര്യാദകള്‍, സേവനങ്ങളെക്കുറിച്ചുള്ള വിവരങ്ങള്‍, രേഖകള്‍ സമര്‍പ്പിക്കേണ്ട രീതി, പുതിയ ഇന്‍ഡെക്‌സിംഗ് സംവിധാനം, ഭരണപരമായ നിയമ ലംഘനങ്ങളും പിഴകളും എന്നിവയെല്ലാം പരിശീലനത്തില്‍ ഉള്‍പ്പെടുത്തിയാതായി മധികൃതര്‍ അറിയിച്ചു. ഉപയോക്താക്കളുമായി നേരിട്ട് ഇടപെടുന്ന ജീവനക്കാര്‍ക്ക് എളുപ്പത്തില്‍ മനസ്സിലാക്കാവുന്നതും പ്രായോഗികവുമായ രീതിയിലാണ് ഈ വിവരങ്ങള്‍ തയാറാക്കിയിരിക്കുന്നത്.

'സേവന നിലവാരം ജീവനക്കാരെ ശാക്തീകരിക്കുന്നതിലൂടെയാണ് ആരംഭിക്കുന്നതെന്ന് ഞങ്ങള്‍ വിശ്വസിക്കുന്നു. നടപടിക്രമപരമായ അറിവ് ഏകീകരിക്കുന്നത് ഉപയോക്താക്കള്‍ക്ക് കൂടുതല്‍ സുഗമവും കാര്യക്ഷമവുമായ അനുഭവം നല്‍കാന്‍ സഹായിക്കും. ഈ പരിശീലന കിറ്റ് ഒരു പഠനോപകരണം എന്നതിലുപരി, ജി.ഡി.ആര്‍.എഫ്.എ.ഡിയുടെ ലക്ഷ്യങ്ങള്‍ക്കനുസൃതമായ മൂല്യാധിഷ്ഠിതപ്രൊഫഷണല്‍ സംസ്‌കാരം വളര്‍ത്താനുള്ള തന്ത്രപരമായ ചുവടുവെപ്പാണെന്ന് എന്‍ട്രി ആന്‍ഡ് റെസിഡന്‍സ് പെര്‍മിറ്റ്‌സ് വിഭാഗം ഡയരക്ടര്‍ ജനറല്‍ അസിസ്റ്റന്റ് ബ്രിഗേഡിയര്‍ ജനറല്‍ ഖലഫ് അഹമ്മദ് അല്‍ ഗൈത് പറഞ്ഞു.

ഈ പുതിയ പരിശീലന പരിപാടി, തൊഴില്‍ അന്തരീക്ഷം മെച്ചപ്പെടുത്തുന്നതിലൂടെയും നൂതന ആശയങ്ങള്‍ പ്രോത്സാഹിപ്പിക്കുന്നതിലൂടെയും സേവന നിലവാരം ഉയര്‍ത്തുന്നതിലൂടെയും സ്ഥാപനത്തിന്റെ ഖ്യാതി വര്‍ധിപ്പിക്കാന്‍ ലക്ഷ്യമിട്ടുള്ള നിരവധി പദ്ധതികളുടെ ഭാഗമാണ്. ഇത് പൊതുജനങ്ങളുടെ വിശ്വാസം വര്‍ധിപ്പിക്കുകയും ദുബൈയിലെ താമസാനുമതി സേവനങ്ങള്‍ക്കായുള്ള പ്രധാന കേന്ദ്രമായി ആമര്‍ സെന്ററുകളെ ശക്തിപ്പെടുത്തുകയും ചെയ്യും. തുടര്‍ച്ചയായ പുരോഗതിക്കും പുതിയ കാര്യങ്ങള്‍ പഠിക്കാനും മനുഷ്യ വിഭവ ശേഷി വികസിപ്പിക്കാനും ജനറല്‍ ഡയരക്ടറേറ്റ് നല്‍കുന്ന പ്രാധാന്യം ഈ പദ്ധതിയിലൂടെ വ്യക്തമാകുന്നുവെന്നും ജി.ഡി.ആര്‍.എഫ്.എ.ഡി വിശദീകരിച്ചു.

ALSO READ: വീണ്ടും പാക് ചാരന്‍ വലയില്‍: പിടിയിലായത് സൈനികന്‍ ദേവീന്ദര്‍ സിങ്; പ്രതിക്ക് രഹസ്യ സൈനിക സാമഗ്രികളിലേക്കും പ്രവേശനം, പിന്നീട് അവ ഐഎസ്‌ഐക്ക് കമാറി

 ALSO READ: ലുലു ഗ്രൂപ്പ് സഊദിയില്‍ ഒരേ ദിവസം മൂന്ന് പുതിയ ലോട്ട് സ്റ്റോറുകള്‍ തുറന്നു; മിക്ക ഉല്‍പ്പന്നങ്ങള്‍ക്കും 22 റിയാലില്‍ താഴെ വില