റിയാദ്: മാസം പൂർത്തിയാകും മുമ്പ് തന്നെ ആവശ്യമെങ്കിൽ ശമ്പളം വാങ്ങാവുന്ന “ഫ്ലെക്സിബിൾ സാലറി” പദ്ധതി അവതരിപ്പിച്ച് സഊദി അറേബ്യ. തൊഴിൽ മന്ത്രാലയത്തിന് കീഴിൽ മുദാദ് സംവിധാനം ആണ് പുതിയ പദ്ധതി ആവിഷ്കരിക്കുന്നത്. ഇതിനായി ഖസ്‌ന ഫിനാൻഷ്യൽ ടെക്‌നോളജി കമ്പനിയുമായി മുദാദ് പ്ലാറ്റ്‌ഫോം സഹകരണ കരാർ ഒപ്പ് വെച്ചു. ഇത് തൊഴിലാളികൾക്ക് സാധാരണ ശമ്പള വിതരണ തീയതിക്ക് മുമ്പ് ശമ്പളത്തിന്റെ ഒരു ഭാഗം ലഭിക്കാൻ അനുവദിക്കും.

ജീവനക്കാരുടെ സാമ്പത്തിക സ്ഥിരതയെ പിന്തുണയ്ക്കുന്നതിനായാണ് പുതിയ സംവിധാനം സജ്ജീകരിക്കുന്നത്. ഫിനാൻഷ്യൽ സൊല്യൂഷൻസ് കമ്പനിയാണ് “ഫ്ലെക്സിബിൾ സാലറി” പ്രാബല്യത്തിൽ വരുത്തുന്നത്. ഇതിൽ രജിസ്റ്റർ ചെയ്യുന്ന കമ്പനികളിലെ തൊഴിലാളികൾക്ക് ഇതിന്റെ സേവനം ലഭിക്കും. 

ജീവനക്കാരുടെ സാമ്പത്തിക വഴക്കം വർദ്ധിപ്പിക്കുന്നതിനും വായ്പകളോ ക്രെഡിറ്റ് കാർഡുകളോ അവലംബിക്കാതെ അവരുടെ അടിയന്തര ആവശ്യങ്ങൾ നിറവേറ്റാൻ സഹായിക്കുന്നതിനും, അത് മൂലം ജീവിത നിലവാരം മെച്ചപ്പെടുത്തുന്നതിനും സാമ്പത്തിക ബാധ്യതകൾ മൂലമുണ്ടാകുന്ന മാനസിക സമ്മർദ്ദം കുറയ്ക്കുന്നതിനും ജീവനക്കാരുടെ സംതൃപ്തിയും ഉൽപ്പാദനക്ഷമതയും വർദ്ധിപ്പിക്കാൻ ആഗ്രഹിക്കുന്ന കമ്പനികളെ ഫ്ലെക്സിബിൾ സാലറി പ്രോഗ്രാം ലക്ഷ്യമിടുന്നു.

സഊദി വിഷൻ 2030 ന്റെ ലക്ഷ്യങ്ങൾക്ക് അനുസൃതമായി, മാനവ വിഭവശേഷി മാനേജ്‌മെന്റിലെ ഡിജിറ്റൽ പരിവർത്തന ശ്രമങ്ങളെ പിന്തുണയ്ക്കുന്നതിനും തൊഴിൽ അന്തരീക്ഷം മെച്ചപ്പെടുത്തുന്നതിനും തൊഴിലാളികളുടെ അവകാശങ്ങൾ ഉറപ്പാക്കുന്നതിനും സംഭാവന ചെയ്യുന്ന നൂതന പരിഹാരങ്ങൾ നൽകുന്നതിന് സഹകരണം വർദ്ധിപ്പിക്കുന്നതിനുമുള്ള ചട്ടക്കൂടിനുള്ളിൽ കരാർ ഉൾപ്പെടുന്നതായി ഇരു ഭാഗത്തെയും പ്രതിനിധികൾ കരാർ ഒപ്പ് വെച്ച് പറഞ്ഞു.