പാലക്കാട്: കാട്ടാനകൾ പാളം മുറിച്ചുകടന്നാൽ ഇനി  സ്‌റ്റേഷൻ മാസ്റ്റർ ഉടനറിയും. കാട്ടാനകളുടെ സാമീപ്യമുള്ള പാലക്കാട് -കോയമ്പത്തൂർ റൂട്ടിലെ കോട്ടേക്കാട് -മധുക്കരൈ സെക്ഷനിൽ പാളത്തിൽ ഒപ്റ്റിക്കൽ ഫൈബർ സെൻസറിങ് സംവിധാനം വരുന്നു. എ.ഐ കാമറ മുതൽ ഒപ്റ്റിക്കൽ ഫൈബർ കേബിൾ വരെയാണ് ഇവിടെ ഒരുക്കുന്നത്. ഇത് പാലക്കാട് ഡിവിഷൻ റെയിൽവേ മാനേജർ അരുൺ കുമാർ ചതുർവേദി പരിശോധിച്ചു. 

കാട്ടാനകൾ പാളത്തിന് സമീപത്ത് എത്തിയാൽ നിർമിതബുദ്ധിയുടെ സഹായത്തോടെ വേഗത്തിൽ മനസിലാക്കുന്ന എ.ഐ കാമറകളാണ് സ്ഥാപിക്കുന്നത്. ആനകളുടെ സാന്നിധ്യവും ചലനവും തത്സമയം കണ്ടെത്താം. ഇത് ഒപ്റ്റിക്കൽ ഫൈബർ അധിഷ്ഠിത സെൻസറിങ് നെറ്റ്‌വർക്കുമായി സംയോജിപ്പിക്കുന്നു. സെക്ഷനിലെ എ.ബി ലൈനുകളിൽ തിരിച്ചറിഞ്ഞ എല്ലാ ആന ഇടനാഴികളെയും ഇത് ബന്ധിപ്പിച്ചിട്ടുണ്ട്. എ ലൈനിലും ബി ലൈനിലും സിസ്റ്റത്തിന്റെ ഇൻസ്റ്റാലേഷൻ പൂർത്തിയായി. നിലവിൽ, സിഗ്‌നൽ വാലിഡേഷൻ, ഫൈൻ ട്യൂണിങ്, അലാറങ്ങൾ എന്നിവയുടെ ജോലി പുരോഗമിക്കുന്നു. 15.42 കോടി രൂപ ചെലവിട്ടുള്ള പദ്ധതി ഈ മാസം 30ന് മുമ്പ് പൂർത്തിയാക്കാനാണ് ലക്ഷ്യമിടുന്നത്. 

കാട്ടാനകൾ പാളത്തിനടുത്ത് എത്തിയാൽ ഡിസ്ട്രിബ്യൂട്ടഡ് അക്കൗസ്റ്റിക് സെൻസറിങ് ഉപയോഗിച്ച്, ട്രാക്കിലെ സെൻസറുകൾ വൈബ്രേഷൻ സിഗ്‌നേച്ചറുകൾ പിടിച്ചെടുത്ത് വാളയാറിലെ യൂണിറ്റിലേക്ക് ഡാറ്റ റിലേ ചെയ്യും. എ.ഐ ക്യാമറ വഴി ലഭിക്കുന്ന ദൃശ്യങ്ങൾ പരിശോധിച്ച് ആന സാന്നിധ്യമുണ്ടെന്ന് സ്റ്റേഷൻ മാസ്റ്റർമാർ, പാലക്കാട് ഡിവിഷൻ ഡിവിഷണൽ കൺട്രോൾ ഓഫിസ്, ലെവൽ ക്രോസിങുകൾ, ലോക്കോ പൈലറ്റുകൾ എന്നിവരെ അറിയിക്കും. ലോക്കോ പൈലറ്റുമാർക്ക് അറിയിപ്പ് ലഭിച്ചാൽ ഉടൻ ട്രെയിനിന്റെ വേഗത കുറയ്ക്കാൻ കഴിയും. ബി.എസ്.എൻ.എല്ലിന്റെ സഹായത്തോടെയാണ് എ.ഐ ക്യാമറകൾ സ്ഥാപിക്കുന്നത്. ഇത് കൂടാതെ നിരീക്ഷണ ടവറും സ്ഥാപിക്കും. 

കോട്ടേക്കാട് മുതൽ റെയിൽവേ സ്ഥാപിച്ച സൗരവേലി റെയിൽ വേലി ട്രാക്കിന്റെ ഇരുവശങ്ങളിലുമുള്ള പുല്ലുകൾ നീക്കം ചെയ്യൽ, ആന അടിപ്പാതകളുടെ പ്രവർത്തനം എന്നിവയുൾപ്പെടെ ഡിവിഷൻ മാനേജർ പരിശോധിച്ചു. രാത്രികാല വേഗ നിയന്ത്രണങ്ങൾ, കട്ടിങ്ങുകളുടെയും എംബാങ്ക്‌മെന്റുകളുടെയും വീതി കൂട്ടൽ, വെളിച്ചം വർധിപ്പിക്കൽ തുടങ്ങിയ അധിക നടപടികളും ആരംഭിച്ചിട്ടുണ്ട്.