തൊടുപുഴ: മുൻ വൈദ്യുതി മന്ത്രിയുടെ പേഴ്‌സണൽ സ്റ്റാഫ് ചിത്തിരപുരം കെ.എസ്.ഇ.ബി ഇൻസ്‌പെക്ഷൻ ബംഗ്ലാവിൽ അനധികൃതമായി താമസിച്ചത് ആറര വർഷം. ഒന്നാം പിണറായി സർക്കാരിന്റെ കാലത്ത് വൈദ്യുതി മന്ത്രിയായിരുന്ന എം.എം മണിയുടെ ഗൺമാനാണ് വാടക പോലും നൽകാതെ ചിത്തിരപുരം കെ.എസ്.ഇ.ബി ഐ.ബി യിലെ മൂന്നാം നമ്പർ മുറി ഇത്രയും കാലം  സ്വന്തമാക്കിവച്ചത്. അനധികൃത താമസം കണ്ടെത്തിയ കെ.എസ്.ഇ.ബി വിജിലൻസ് 3,96,510 രൂപയും പലിശയും ഇയാളിൽനിന്ന് തിരിച്ചുപിടിക്കാൻ ഡയരക്ടർ ബോർഡിനോട് ശുപാർശ ചെയ്തിരിക്കുകയാണിപ്പോൾ. 

അനധികൃത കൈയേറ്റക്കാരെ ഒഴിപ്പിക്കുന്നതിനുള്ള നടപടികളുമായി മുന്നോട്ട് പോകാൻ തനിക്ക് ചില പരിമിതികൾ ഉണ്ടായിരുന്നതിനാൽ  ഉന്നത അധികാരികളെ സമീപിച്ചിരുന്നുവെന്നാണ് ഐ.ബി യുടെ കസ്റ്റോഡിയനായ ജനറേഷൻ ഡിവിഷൻ എക്‌സിക്യൂട്ടീവ് എൻജിനീയർ നൽകിയ റിപ്പോർട്ട്. 2021 സെപ്റ്റംബറിലെ  എക്‌സിക്യൂട്ടീവ് എൻജിനീയറുടെ റിപ്പോർട്ടിനെ തുടർന്ന്, നിയമവിരുദ്ധമായി താമസിക്കുന്നവരെ ഒഴിപ്പിക്കാൻ സി.എം.ഡി യോട് ശുപാർശ ചെയ്തിരുന്നുവെങ്കിലും നടപടിയിലേക്ക് പോയിരുന്നില്ല. 

ALSO READ: ഇന്ന് ഒന്‍പത് ജില്ലകളില്‍ മഴ മുന്നറിയിപ്പ്; കേരള തീരത്ത് മത്സ്യബന്ധനത്തിനും വിലക്ക് 

തിരുവനന്തപുരം വൈദുതി ഭവനത്തിലെ ഐ.ബി ബുക്കിങ് സെക്ഷനിൽ നിന്നുള്ള  നിർദേശപ്രകാരം ചിത്തിരപുരം ഐ.ബിയുടെ കെയർ ടേക്കർ, അന്നത്തെ വൈദ്യുതി മന്ത്രിയായിരുന്ന എം.എം. മണിയുടെ പേഴ്‌സണൽ സ്റ്റാഫിന് 2016 നവംബർ 26  മുതൽ 2017 ഡിസംബർ 27 വരെ മൂന്നാം നമ്പർ റൂം അനുവദിച്ചിരുന്നു. ഇക്കാലയളവിലെ വാടക ഓരോ ദിവസത്തേക്കും 30 രൂപ നിരക്കിൽ ഈടാക്കി ബോർഡ് അക്കൗണ്ടിൽ അടച്ചിട്ടുണ്ട്. ഇതിന് ശേഷവും  മന്ത്രിയുടെ സ്റ്റാഫ് ബുക്കിങ് ഇല്ലാതെയും വാടക നൽകാതെയും ഇതേ റൂമിൽ  തുടർന്നു താമസിക്കുകയായിരുന്നു. 

2024 ജൂൺ 18 ന് കെ.എസ്.ഇ.ബി വിജിലൻസ് വിഭാഗം നടത്തിയ മിന്നൽ പരിശോധനയിലാണ് അനധികൃത താമസം കണ്ടെത്തിയത്. തുടർന്ന്  ഐ.ബി ബുക്കിങ് രജിസ്റ്ററുകൾ പരിശോധിച്ചപ്പോൾ ഇൗ മുറി മിക്കവാറും സ്ഥിരമായി 'ബുക്ക്ഡ്' എന്ന് രേഖപ്പെടുത്തിയിരുന്നതായി കണ്ടെത്തി. എന്നാൽ പേഴ്‌സണൽ സ്റ്റാഫ് താമസിച്ച കൃത്യമായ ദിവസങ്ങളുടെ എണ്ണം എവിടെയും രേഖപ്പെടുത്തിയിട്ടില്ല. ഐ.ബി ബുക്കിങ് രജിസ്റ്ററിൽ ഈ മുറി മിക്ക സമയത്തും 'ബുക്ക്ഡ്' എന്ന് രേഖപ്പെടുത്തിയിരുന്നതും ചുമതലയുള്ള എക്‌സിക്യൂട്ടീവ് എൻജിനീയറുടെ റിപ്പോർട്ടും അടിസ്ഥാനമാക്കി, ബോർഡിന് സംഭവിച്ച നഷ്ടം എത്രയും വേഗം തിരിച്ചുപിടിക്കാനാണ് ഉത്തരവ്.