ന്യൂഡൽഹി: ഡൽഹി വിമാനത്താവളത്തിൽ ലാൻഡ് ചെയ്ത എയർ ഇന്ത്യ വിമാനത്തിൽ തീ. ഹോങ്കോങ് - ഡൽഹി എയർ ഇന്ത്യ (AI 315) വിമാനത്തിലാണ് തീപിടുത്തം ഉണ്ടായത്. വിമാനം ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ ഇറങ്ങിയതിന് പിന്നാലെയാണ് തീപിടുത്തം ഉണ്ടായത്. യാത്രക്കാരും ജീവനക്കാരും സുരക്ഷിതരാണ്. 

വിമാനം ലാൻഡ് ചെയ്ത് ഗേറ്റിൽ നിർത്തിയ സമയം ഓക്സിലറി പവർ യൂണിറ്റിൽ തീപിടുത്തം ഉണ്ടായെന്നാണ് വിവരം. യാത്രക്കാർ വിമാനത്തിൽ നിന്ന് പുറത്തിറങ്ങുന്നതിനിടെയാണ് തീപിടിത്തം കണ്ടെത്തിയതെന്ന് എയർലൈൻ അറിയിച്ചു. തീ കണ്ടെത്തിയയുടനെ ഓക്സിലറി പവർ യൂണിറ്റ് അഥവാ എപിയു യാന്ത്രികമായി ഷട്ട് ഡൗൺ ആകുകയും യാത്രക്കാരും ജീവനക്കാരും സുരക്ഷിതമായി ഇറങ്ങുന്നത് തുടരുകയും ചെയ്തതായി എയർലൈൻ അറിയിച്ചു.

ALSO READ: 10 കിലോമീറ്ററിന് ഇടയിൽ 236 ക്യാമറകൾ; ഈ ഇന്ത്യൻ നഗരത്തിൽ ഇനി സുരക്ഷിതമായി സഞ്ചരിക്കാം

തീപിടിച്ചതിനെ തുടർന്ന് വിമാനത്തിന് കേടുപാടുകൾ സംഭവിച്ചിട്ടുണ്ട്. ട്വിൻ ജെറ്റ് എയർബസ് എ321 എന്ന വിമാനത്തിന് 'ചില കേടുപാടുകൾ' സംഭവിച്ചതായി എയർ ഇന്ത്യ അറിയിച്ചു. സംഭവത്തിൽ അന്വേഷണം നടത്തുമെന്ന് ഡയറക്ടർ ജനറലിനെ സിവിൽ ഏവിയേഷൻ അറിയിച്ചു. 

അതേസമയം, 48 മണിക്കൂറിനുള്ളിൽ എയർ ഇന്ത്യയ്ക്ക് സംഭവിക്കുന്ന മൂന്നാമത്തെ വലിയ തിരിച്ചടിയാണ് ഡൽഹിയിലെ അപകടം. തിങ്കളാഴ്ച കൊച്ചി-മുംബൈ വിമാനം ലാൻഡിംഗിനിടെ റൺവേയിൽ നിന്ന് തെന്നിമാറി, വിമാനത്തിനും ടാറിങ്ങിനും കേടുപാടുകൾ സംഭവിച്ചു. അതേ ദിവസം തന്നെ, മണിക്കൂറിൽ 155 കിലോമീറ്റർ വേഗതയിൽ പറന്നുയരുന്ന ഡൽഹി-കൊൽക്കത്ത വിമാനം അവസാന നിമിഷം ടേക്ക് ഓഫ് നിർത്തിവച്ചു. ടേക്ക് ഓഫ് സമയത്ത് "ഒരു സാങ്കേതിക തകരാർ" കണ്ടെത്തിയതായി എയർലൈൻ പിന്നീട് അറിയിച്ചു.

ALSO READ: കൊച്ചി - മുംബൈ എയർഇന്ത്യ വിമാനം ലാൻഡിങ്ങിനിടെ റൺവേയിൽ നിന്ന് തെന്നിമാറി; ഒഴിവായത് വൻ ദുരന്തം

ആറ് മാസത്തിനുള്ളിൽ അഞ്ച് സുരക്ഷാ ലംഘനങ്ങൾക്ക് ഒമ്പത് നോട്ടീസുകൾ എയർ ഇന്ത്യക്ക് ലഭിച്ചിരുന്നു. വ്യോമയാന സഹമന്ത്രി മുരളീധർ മോഹോൾ തിങ്കളാഴ്ച പാർലമെന്റിലാണ് ഇക്കാര്യം അറിയിച്ചത്.