റഫ: ഇസ്‌റാഈല്‍ സൈന്യത്തിന് നേരെ വമ്പന്‍ ആക്രമണം നടത്തി ഹമാസ്. ആക്രമണത്തില്‍ 25 സൈനികര്‍ കൊല്ലപ്പെടുകയോ പരുക്കേല്‍ക്കുകയോ ചെയ്തതായി റിപ്പോര്‍ട്ടുകള്‍ സൂചിപ്പിക്കുന്നു. തെക്കന്‍ ഗസ്സയിലെ റഫയില്‍ അടുത്ത ദിവസങ്ങളിലായി നടന്ന വ്യത്യസ്ത ആക്രമണങ്ങളെ കുറിച്ച വിവരം ഹമാസിന്റെ സൈനിക വിഭാഗമായ ഖസ്സാം ബ്രിഗേഡ്‌സ് ആണ് പുറത്തു വിട്ടത്. 

റഫയുടെ കിഴക്കു ഭാഗത്ത് സൈനികര്‍ക്ക് നേരെ നടന്ന ആക്രമണത്തില്‍ ഏഴ് പേരാണ് ഉള്‍പ്പെട്ടത്. ഇവിടെ  ചിലരെങ്കിലും കൊല്ലപ്പെട്ടിരിക്കാമെന്നാണ് സൂചന. പരുക്കേറ്റവരേയും കൊല്ലപ്പെട്ടവരേയും ഹെലികോപ്റ്ററില്‍ മാറ്റിയെന്നും ഖസ്സാം പുറത്തു വിട്ട റിപ്പോര്‍ട്ടില്‍ പറയുന്നു. അതേ പ്രദേശത്ത് മറ്റൊരു സൈനിക സംഘത്തിന് നേരേയും പോരാളികള്‍ മിന്നലാക്രമണം നടത്തി. അവരില്‍ എത്രപേര്‍ക്കേ പരുക്കേറ്റെന്നോ എത്രപേര്‍ കൊല്ലപ്പെട്ടുവെന്നോ വ്യക്തമല്ല.  

ALSO READ: 'മെഡിക്കല്‍ എത്തിക്‌സിന്റേയും അന്താരാഷ്യരാഷ്ട്ര നിയമങ്ങളുടേയും ഗുഗുതര ലംഘനം' ഗസ്സയിലെ കൊടുംക്രൂരതക്കെതിരെ ഇസ്‌റാഈല്‍ മെഡിക്കല്‍ അസോസിയേഷനും

ജൂലൈ 12 ന് തെക്കന്‍ നഗരമായ ഖാന്‍ യൂനിസിന്റെ വടക്ക് ഭാഗത്ത് ഒരു കവചിത സൈനിക വാഹനം 'ഉയര്‍ന്ന സ്ഫോടനശേഷിയുള്ള' ഉപകരണം ഉപയോഗിച്ച് തകര്‍ത്തതായും ഇതില്‍ നിരവധി സൈനികര്‍ കൊല്ലപ്പെടുകയും പരുക്കേല്‍ക്കുകയും ചെയ്തതായും ഖസ്സാം ബ്രിഗേഡ് അവകാശപ്പെടുന്നു.

'യാസിന്‍ 105' ഷെല്‍ ഉപയോഗിച്ച് ഒരു മെര്‍ക്കാവ ടാങ്ക് തകര്‍ക്കുന്നത് ഉള്‍പ്പെടെ ആക്രമണങ്ങളുടെ വീഡിയോ ദൃശ്യങ്ങള്‍ ഖസ്സാം ബ്രിഗേഡ് പുറത്തുവിട്ടിരുന്നു. സൈനികവാഹനങ്ങളെ അടുത്ത് നിന്ന് ആക്രമിക്കുന്നതാണ് ദൃശ്യങ്ങളില്‍ ഉള്ളത്. ഒരു ദൃശ്യത്തില്‍ ടാഹ്കിനുള്ളില്‍ നിന്ന് സ്‌ഫോടക വസ്തു പൊട്ടിത്തെറിക്കുന്നതാണ് കാണുന്നതെന്നും റിപ്പോര്‍ട്ടുകള്‍ പറയുന്നു. ഇസ്‌റാഈലി സൈനിക വാഹനങ്ങള്‍ കടന്നു പോകുന്ന വഴികളില്‍ വളരെ ആസൂത്രിതമായി സ്‌ഫോടക വസ്തുക്കള്‍ സ്ഥാപിക്കുന്നതും ദൃശ്യങ്ങളില്‍ നിന്ന് വ്യക്തമാണ്. 

ഒക്ടോബര്‍ ഏഴുമുതല്‍ ഇസ്‌റാഈല്‍ ഗസ്സയില്‍ നടത്തുന്ന ആക്രമണങ്ങളില്‍ ഇതുവരെ 59,106 പേര്‍ കൊല്ലപ്പെട്ടെന്നാണ് കണക്ക്. 142,511 പേര്‍ക്ക് പരുക്കേറ്റെന്നും ഗസ്സ ആരോഗ്യമന്ത്രാലയത്തിന്റെ റിപ്പോര്‍ട്ടില്‍ പറയുന്നു. ഇതില്‍ ഭൂരിബാഗവും സ്ത്രീകളും കുട്ടികളുമാണ്.