ബെംഗളൂരു: കെംപഗൗഡ അന്താരാഷ്ട്ര വിമാനത്താവളത്തിനുള്ളിലെ രാമേശ്വരം കഫേയുടെ ഔട്ട്‌ലെറ്റിൽ പൊങ്കൽ വിഭവത്തിൽ നിന്ന് പുഴുവിനെ കണ്ടെത്തിയ സംഭവം വിവാദമായി. ഇന്ന് രാവിലെ പ്രഭാതഭക്ഷണം കഴിക്കാനെത്തിയ ഒരു ഉപഭോക്താവിനാണ് പാത്രത്തിൽ പുഴുവിനെ കിട്ടിയത്. സംഭവം റിപ്പോർട്ട് ചെയ്തപ്പോൾ ജീവനക്കാർ ആദ്യം വിഷയം അവഗണിക്കാൻ ശ്രമിച്ചതായി ഉപഭോക്താവ് ആരോപിച്ചു. “ഭക്ഷണം വിളമ്പി കഴിക്കാനൊരുങ്ങുമ്പോൾ തന്നെ പുഴുവിനെ കാണുകയായിരുന്നു. ജീവനക്കാരോട് പരാതിപ്പെട്ടെങ്കിലും അവർ കാര്യമായി എടുത്തില്ല. വീഡിയോ റെക്കോർഡ് ചെയ്തപ്പോൾ മാത്രമാണ് ജീവനക്കാർ ക്ഷമാപണം പ്രകടിപ്പിച്ച് മുന്നോട്ട് വന്നതും പണം തിരികെ നൽകിയതെന്നും അദ്ദേഹം പറഞ്ഞു.

രാമേശ്വരം കഫേയുടെ സഹ ഉടമകളായ രാഘവേന്ദ്ര റാവുവും ദിവ്യ റാവുവും സംഭവത്തിൽ പ്രതികരണവുമായി രം​ഗത്തെത്തി. “ഉപഭോക്താവിനെ ബന്ധപ്പെടാൻ ശ്രമിക്കുന്നുവെന്നും അദ്ദേഹം യാത്രയിലാണെന്നാണ് അറിയാൻ കഴിഞ്ഞത് രാഘവേന്ദ്ര റാവു വ്യക്തമാക്കി. എന്നാൽ, ദിവ്യ റാവു ആരോപണത്തിന്റെ ആധികാരികതയെ ചോദ്യം ചെയ്തു. “മുൻപ് ചിലർ പോക്കറ്റിൽ നിന്ന് പുഴുക്കളെ എടുത്ത് ബ്രാൻഡിന്റെ പ്രതിച്ഛായ മോശമാക്കാൻ ശ്രമിച്ചിട്ടുണ്ട്. ഇത് സിസിടിവിയിൽ പതിഞ്ഞിട്ടുമുണ്ട്. വിമാനത്താവളത്തിൽ ദൃശ്യങ്ങൾ പരിശോധിക്കാൻ അനുമതി വേണം. ഞങ്ങളുടെ പേര് കളങ്കപ്പെടുത്താനുള്ള ശ്രമമാണിത്,”ദിവ്യ റാവു പറഞ്ഞു. ഔദ്യോഗിക പ്രസ്താവന ഉടൻ പുറത്തിറക്കുമെന്നും അവർ അറിയിച്ചു.

ബെംഗളൂരുവിൽ ഇന്ദിരാ നഗർ, ജെപി നഗർ, ബ്രൂക്ക്ഫീൽഡ്, രാജാജി നഗർ എന്നിവിടങ്ങളിൽ രാമേശ്വരം കഫേയ്ക്ക് അഞ്ച് ഔട്ട്‌ലെറ്റുകളുണ്ട്. ഏറ്റവും പുതിയ ശാഖ ഇന്ദിരാ നഗറിലെ 100 ഫീറ്റ് റോഡിലാണ്. കെംപഗൗഡ വിമാനത്താവളത്തിന്റെ ടെർമിനൽ 1-ൽ പുതിയ ഔട്ട്‌ലെറ്റ് തുറക്കാനും പദ്ധതിയുണ്ട്. ഹൈദരാബാദിൽ മാധാപൂരിൽ ഒരു ശാഖ പ്രവർത്തിക്കുന്നു, 2025-ൽ കൂടുതൽ ശാഖകൾ തുറക്കാൻ ലക്ഷ്യമിടുന്നു. എന്നാൽ, കേരളത്തിലോ ചെന്നൈയിലോ വ്യാപനത്തിന് തൽക്കാലം പദ്ധതിയില്ല.