തിരുവനന്തപുരം: കിളിമാനൂരില്‍ വയോധികനെ വാഹനം ഇടിച്ച് കൊലപ്പെടുത്തിയ കേസില്‍ പാറശാലയിലെ എസ്.എച്ച്.ഒ അനില്‍കുമാറിനെ സസ്‌പെന്‍ഡ് ചെയ്തു. ദക്ഷിണമേഖലാ ഐ.ജി എസ് ശ്യാംസുന്ദര്‍ ആണ് നടപടി എടുത്തത്. 

അലക്ഷ്യമായി കൊണ്ട് അമിതമായ വേഗതയില്‍ വാഹനം ഓടിച്ച് അപകടം ഉണ്ടാക്കിയതിനും നിര്‍ത്താതെ പോയതിനുമാണ് അനില്‍കുമാറിനെതിരെ കേസെടുത്തത്.  ജാമ്യമില്ല വകുപ്പു പ്രകാരം കേസ് രേഖപ്പെടുത്തിയതോടെ അനില്‍കുമാര്‍ ഒളിവിലാണ്. 

സംഭവത്തില്‍ നടപടിക്ക് ശുപാര്‍ശ ചെയ്ത റൂറല്‍ എസ്.പി കെ.എസ് സുദര്‍ശന്‍ ഡി.ഐ.ജിക്ക് റിപ്പോര്‍ട്ട് കൈമാറിയിരുന്നു. ബംഗളുരുവില്‍ മറ്റൊരു കേസില്‍ പ്രതിയെ അന്വേഷിച്ചു പോയ അനില്‍കുമാര്‍ ഇന്നലെ രാവിലെ തിരിച്ചെത്തിയെങ്കിലും സ്‌റ്റേഷനിലോ എസ്.പി ഓഫിസിലോ റിപ്പോര്‍ട്ട് ചെയ്തിരുന്നില്ല. 

കഴിഞ്ഞ ഞായറാഴ്ച്ച പുലര്‍ച്ചെ നാലിനും അഞ്ചിനും ഇടയിലാണ് അപകടമുണ്ടായത്. അപകടത്തില്‍ കിളിമാനൂര്‍ ചേണിക്കുഴി സ്വദേശി രാജന്‍ (59) മരിച്ചത്. അനില്‍ കുമാറിന്റെ മാരുതി 800, റോഡിലൂടെ നടന്ന് പോവുകയായിരുന്ന രാജനെ ഇടിച്ചിട്ട് നിര്‍ത്താതെ കടന്നുകളഞ്ഞെന്നാണ് കേസ്. ആദ്യഘട്ടത്തില്‍ വാഹനം ഏതാണെന്ന് കണ്ടെത്താന്‍ സാധിച്ചിരുന്നില്ല. അജ്ഞാത വാഹനം ഇടിച്ച് അപകടമുണ്ടായെന്നാണ് ആദ്യം റിപ്പോര്‍ട്ട് വന്നത്. അലക്ഷ്യമായി വാഹനം ഒടിച്ച് അപകടമുണ്ടായെന്നാണ് എഫ്.ഐ.ആര്‍. ഒരു മണിക്കൂറോളം റോഡില്‍ കിടന്ന് രക്തം വാര്‍ന്നാണ് രാജന്‍ മരിച്ചത്. പുലര്‍ച്ചെ റോഡിലെത്തിയ നാട്ടുകാരാണ് ഇയാള്‍ വീണ് കിടക്കുന്നത് കണ്ടെത്തിയത്. തുടര്‍ന്ന് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.