തൃശൂർ: മലയോര മേഖലയിൽ മഴ ശക്തമായതോടെ ഡാമുകളിലെ ജലനിരപ്പ് ഉയർന്നു. ഷോളയാർ ഡാമിൽ 96 ശതമാനം വെള്ളം നിറഞ്ഞു. ഷോളയാർ ഡാമിന്റെ സ്പിൽവേ ഷട്ടർ അരടിയോളം ഉയർത്തി. ജലവിതാനം ഉയർന്ന പശ്ചാത്തലത്തിൽ പെരിങ്ങൽകുത്ത് ഡാമിന്റെ സ്ലുവീസ് ഡാമും തുറന്നിട്ടുണ്ട്. ഇതിന് പിന്നാലെ ചാലക്കുടി പുഴയിലും ജലനിരപ്പ് ഉയർന്നിട്ടുണ്ട്. മൂന്നാർ മീറ്ററാണ് പുഴയിലെ നിലവിലെ വെള്ളം ഉള്ളത്.  

അതേസമയം കേരളത്തിൽ ഇന്നും പരക്കെ മഴക്ക് സാധ്യത ഉണ്ടെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. ഇന്ന് സംസ്ഥാനത്ത് അതിശക്തമായ മഴക്കും ജൂലൈ 29 വരെ ശക്തമായ മഴക്കും സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. ഒറ്റപ്പെട്ട സ്ഥലങ്ങളിൽ മണിക്കൂറിൽ 50 മുതൽ 60 കിലോ മീറ്റർ വരെ വേഗതയിൽ ശക്തമായ കാറ്റ് വീശാനും സാധ്യതകളുണ്ട്.

ALSO READ: ഖത്തര്‍: അംബാസിഡറോടൊപ്പമുള്ള പ്രതിമാസ യോഗം ജൂലൈ 31 ന്

ഇന്ന് ഏഴ് ജില്ലകളിൽ ഓറഞ്ച്, യെല്ലോ അലേർട്ട് പ്രഖ്യാപിച്ചിട്ടുണ്ട്. മലപ്പുറം, പാലക്കാട്, തൃശൂർ, ഇടുക്കി, എറണാംകുളം, കോട്ടയം, പത്തനംതിട്ട എന്നീ ജില്ലകളിലാണ് ഓറഞ്ച് അലേർട്ട് ഉള്ളത്. ഈ ജില്ലകളിൽ അതിശകതമായ മഴ പെയ്യുമെന്നാണ് പ്രവചനം. 24 മണിക്കൂറിൽ 115.6 മില്ലി മീറ്റർ മുതൽ 204.4 മില്ലി മീറ്റർ വരെ മഴ ലഭിക്കുമെന്നാണ് അതിശകതമായ മഴ എന്നത് കൊണ്ട് അർഥമാക്കുന്നത്. 

കാസർകോഡ്, കണ്ണൂർ, വയനാട്, കോഴിക്കോട്, ആലപ്പുഴ, കൊല്ലം, തിരുവനന്തപുരം എന്നീ ജില്ലകളിൽ യെല്ലോ അലേർട്ടുമാണ് ഉള്ളത്. ഒറ്റപ്പെട്ട ശക്തമായ മഴയാണ് ഈ ജില്ലകളിൽ പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലി മീറ്റർ മുതൽ 115.5 മില്ലി മീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർഥമാക്കുന്നത്.