തിരുവനന്തപുരം: ഇടിഞ്ഞാര്‍ മൈലാടുംകുന്നില്‍ ക്ഷേത്ര പൂജാരിയെ ചെറുമകന്‍ കുത്തിക്കൊന്നു. 58കാരനായ രാജേന്ദ്രന്‍ കാണിയാണ് കൊല്ലപ്പെട്ടത്. സംഭവത്തില്‍ രാജേന്ദ്രന്‍ കാണിയുടെ മകളുടെ മകന്‍ സന്ദീപിനെ പൊലിസ് കസ്റ്റഡിയിലെടുത്തു. ഇയാള്‍ നിരവധി കേസുകളില്‍ പ്രതിയാണെന്ന് പൊലിസ് പറഞ്ഞു. 

ഞായറാഴ്ച്ച വൈകീട്ട് 5.30ഒടെയാണ് സംഭവം. സന്ദീപിന്റെ വീട്ടിലായിരുന്നു മുത്തശന്‍ നേരത്തെ താമസിച്ചിരുന്നത്. വാഹനാപകടത്തില്‍ കൊല്ലപ്പെട്ട മുത്തശിയുടെ പേരില്‍ ലഭിച്ച നഷ്ടപരിഹാര തുക ആവശ്യപ്പെട്ടാണ് മുത്തശനും സന്ദീപും തമ്മില്‍ തര്‍ക്കമുണ്ടായതെന്നാണ് നിഗമനം. കോടതി വിധിച്ച നഷ്ടപരിഹാര തുക നല്‍കാന്‍ ആവശ്യപ്പെട്ട് സന്ദീപ് നേരത്തെയും രാജേന്ദ്രന്‍ കാണിയെ നിര്‍ബന്ധിച്ചിരുന്നതായി പൊലിസ് പറഞ്ഞു. 

ശല്യം സഹിക്കാനാവാതെ രാജേന്ദ്രന്‍ കാണി വീട്ടില്‍ നിന്നിറങ്ങി ഇടിഞ്ഞാറില്‍ മുറിയെടുത്ത് താമസം മാറ്റി. ഇവിടെ എത്തിയും സന്ദീപ് ശല്യം തുടര്‍ന്നു. ഇന്ന് വൈകീട്ട് ക്ഷേത്രം തുറക്കാനെത്തിയപ്പോഴും മുത്തച്ഛനും സന്ദീപും തമ്മില്‍ തര്‍ക്കമുണ്ടായി. തുടര്‍ന്ന് സന്ദീപ് മുത്തച്ഛനെ കത്തിയെടുത്ത് കുത്തി. ഇതോടെ രാജേന്ദ്രന്‍ കാണി അടുത്തുകണ്ട കടയിലേക്ക് ഓടിക്കയറി. പിന്നാലെയെത്തിയ സന്ദീപ് മുത്തച്ഛനെ കടയ്ക്ക് പുറത്തെത്തിച്ച് വീണ്ടും കുത്തുകയായിരുന്നു. ആക്രമണത്തില്‍ ഗുരുതരമായി പരിക്കേറ്റ രാജേന്ദ്രന്‍ കാണിയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. നാട്ടുകാര്‍ പിടിച്ചുകെട്ടിയ സന്ദീപിനെ പിന്നീട് പൊലിസെത്തി കസ്റ്റഡിയിലെടുക്കുകയും ചെയ്തു.

ALSO READ: 'എന്റെ തലച്ചോറിന് 200 കോടി രൂപ മൂല്യമുണ്ട്, സത്യസന്ധമായി എങ്ങനെ സമ്പാദിക്കണമെന്ന് എനിക്കറിയാം'; എഥനോൾ വിവാദത്തിൽ നിതിൻ ഗഡ്കരി

youth stabbed grand father Dispute over compensation amount