മോസ്‌കോ: റഷ്യയിലെ എണ്ണ ശുദ്ധീകരണശാലകള്‍ ലക്ഷ്യം വെച്ച് യുക്രൈന്‍ ആക്രമണം കടുപ്പിക്കുന്നു. റഷ്യയുടെ വടക്ക് പടിഞ്ഞാറ് ലെനിന്‍ഗ്രാഡ് മേഖലയിലെ കിറിഷി എണ്ണ ശുദ്ധീകരണ ശാലയില്‍ ആക്രമണമുണ്ടായതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. റഷ്യയിലെ ഏറ്റവും വലിയ എണ്ണ ശുദ്ധീകരണ ശാലകളിലൊന്നാണ് കിറിഷി. ആക്രമണം നടന്നതായി റഷ്യ സ്ഥിരീകരിച്ചിട്ടുണ്ട്.

ആക്രമണത്തിന് പിന്നാലെ റിഫൈനറിയില്‍ തീപിടിത്തമുണ്ടായി. പ്രതിദിനം 3,55,000 ബാലല്‍ ക്രൂഡോയില്‍ ഉത്പാദിപ്പിക്കാന്‍ ശേഷിയുള്ള എണ്ണ ശുദ്ധീകരണശാലയാണിത്. കിറിഷില്‍ മൂന്ന് ഡ്രോണുകള്‍ പതിച്ചെന്നും, അവശിഷ്ടങ്ങള്‍ വീണതിനെ തുടര്‍ന്ന് തീപിടിത്തമുണ്ടായെന്നും റീജിയണല്‍ ഗവര്‍ണര്‍ അലക്‌സാണ്ടര്‍ ഡ്രോഡ്‌സെന്‍കോ അറിയിച്ചു. ആക്രമണത്തില്‍ ആര്‍ക്കും പരിക്കേറ്റിട്ടില്ലെന്നും, തീ നിയന്ത്രണ വിധേയമാക്കിയതായും അദ്ദേഹം കൂട്ടിച്ചേര്‍ത്തു. 

കിറിഷിലെ ആക്രമണത്തിലേതെന്ന് അവകാശപ്പെടുന്ന വീഡിയോ ദൃശ്യങ്ങള്‍ യുക്രൈന്‍ പങ്കുവെച്ചിട്ടുണ്ട്. റഷ്യയുടെ പ്രധാന സാമ്പത്തിക സ്രോതസുകളിലൊന്നായ എണ്ണപ്പാടങ്ങള്‍ക്ക് നേരെ ആക്രമണം കടുപ്പിക്കുമെന്ന് യുക്രൈന്‍ നേരത്തെ വ്യക്തമാക്കിയിരുന്നു.

ALSO READ: നാല് ദിവസത്തിനിടെ ഇസ്‌റാഈൽ ആക്രമിച്ചത് ആറ് രാജ്യങ്ങളെ; പശ്ചിമേഷ്യ അതീവ ആശങ്കയിൽ 

യുക്രൈന്‍ ആക്രമണത്തിന് റഷ്യ എണ്ണപ്പണം ഉപയോഗിക്കുകയാണെന്ന് ആരോപിച്ച് അമേരിക്കയും നാറ്റോ സഖ്യകക്ഷികളും രംഗത്തെത്തിയിരുന്നു. ഇത് പ്രതിരോധിക്കാന്‍ അന്താരാഷ്ട്ര തലത്തില്‍ റഷ്യന്‍ എണ്ണക്ക് നിരോധനം ഏര്‍പ്പെടുത്തണമെന്നാണ് ആവശ്യം. റഷ്യയില്‍ നിന്ന് എണ്ണ വാങ്ങുന്ന പ്രധാന രാജ്യങ്ങളിലൊന്നാണ് ഇന്ത്യ. ഇത് നിര്‍ത്തണമെന്ന് ആവശ്യപ്പെട്ടാണ് ഡൊണാള്‍ഡ് ട്രംപ് ഇന്ത്യക്ക് മേല്‍ പുതിയ തീരുവ ചുമത്തിയത്. 

റഷ്യക്ക് മേലുള്ള സാമ്പത്തിക സമ്മര്‍ദ്ദം ശക്തമാക്കുന്നതിനായി ജി7 യോഗത്തിലും ട്രംപ് ആവശ്യം ഉന്നിയിച്ചിരുന്നു. റഷ്യയില്‍ നിന്ന് എണ്ണ വാങ്ങുന്ന രാജ്യങ്ങള്‍ക്ക് മേല്‍ തീരുവ ചുമത്തുന്നതില്‍ ജി7 അംഗരാജ്യങ്ങളും അമേരിക്കയ്‌ക്കൊപ്പം അണിനിരക്കണമെന്നാണ് ആവശ്യം. പുതിയ രാഷ്ട്രീയ സാഹചര്യത്തില്‍ റഷ്യയുമായി ചേര്‍ന്ന ഇന്ത്യക്കെതിരെ 100 ശതമാനം തീരുവ ചുമത്തണമെന്ന് യൂറോപ്യന്‍ യൂണിയനോടും ട്രംപ് ആവശ്യപ്പെട്ടിട്ടുണ്ട്.

Ukraine attacks Russia’s largest oil refinery in Kirishi-2