പാലും പാലുല്‍പന്നങ്ങളും നമുക്കെന്നും പ്രിയപ്പെട്ടവയാണ്. നമ്മുടെ ദൈനംദിന ചര്യയില്‍ ഇവയ്‌ക്കെല്ലാം വളരെയധികം പ്രാധാന്യവുമുണ്ട്. അതിലൊന്നാണ് വെണ്ണ. വെണ്ണ കൂട്ടി നമ്മള്‍ പല ഭക്ഷണങ്ങളും കഴിക്കാറുണ്ട്. എന്നാല്‍ വെളുത്ത പാലില്‍ നിന്നും ഈ മഞ്ഞ നിറത്തിലുള്ള വെണ്ണ ഉണ്ടാകുന്നത് എങ്ങനെയാണെന്ന് ചിന്തിച്ചു നോക്കിയിട്ടുണ്ടോ..? ഇതിന് ശാസ്ത്രീയമായ വല്ല വശവുമുണ്ടോ..? എന്താണ് ഇതിനു കാരണം? 

വെണ്ണയുടെ സ്വാഭാവിക നിറമായ മഞ്ഞ നിറത്തിന് പാലിനേക്കാള്‍ കൂടുതല്‍ ബന്ധമുള്ളത് പശുവിന്റെ ഭക്ഷണരീതിയുമായാണ്. മത്തനും ക്യാരറ്റിനും മഞ്ഞ നിറം നല്‍കുന്ന ബീറ്റ-കരോട്ടിന്‍ അടങ്ങിയ പുല്ലാണ് പശുവും ഭക്ഷിക്കുന്നത്. ഈ വര്‍ണകം പശുവിന്റെ കൊഴുപ്പുമായി കൂടിച്ചേരുകയും അത് പാലിലെ കൊഴുപ്പായി മാറുകയുമാണ് ചെയ്യുന്നത്. 

പാലിന് മഞ്ഞ നിറം കാണാന്‍ കഴിയാത്തത്, പാലിലെ വെള്ളത്തിന്റെ അംശവും കൊഴുപ്പിന്റെ ഗോളങ്ങളും പ്രകാശ രശ്മികളെ വിസരണം ചെയ്യുന്നതു മൂലമാണ്. എന്നാല്‍ കടഞ്ഞ പാലില്‍ നിന്ന് ബീറ്റ കരോട്ടിന്‍ അടങ്ങിയ കൊഴുപ്പ് വേര്‍തിരിച്ചെടുക്കുമ്പോള്‍ കേന്ദ്രീകരിക്കുന്ന വെണ്ണയ്ക്കു സ്വാഭാവികമായും മഞ്ഞ നിറമുണ്ടാകുന്നു. എന്നാല്‍ എല്ലാതരം വെണ്ണയ്ക്കും ഒരേ തരത്തിലുള്ള മഞ്ഞ നിറമല്ല എന്നും ഓര്‍ക്കുക. കാലാവസ്ഥയ്ക്കും പ്രാദേശികതയ്ക്കുമനുസരിച്ച് വെണ്ണയുടെ നിറത്തിലും വ്യത്യാസം വരാം.

പച്ചപ്പുല്ല് ധാരാളമായി ലഭിക്കുന്ന സമയത്ത് വെണ്ണയുടെ നിറത്തിന് മഞ്ഞ നിറം കൂടുതലാണെങ്കില്‍ മഴക്കാലത്ത് വൈക്കോലിനെയാണ് ആശ്രയിക്കുന്നത്. അപ്പോള്‍ മഞ്ഞനിറം കുറവായിരിക്കും. ഇനി ഇതിനു സ്ഥിരമായി മഞ്ഞ നിറം കിട്ടാന്‍ വേണ്ടി അനാറ്റോ പോലുള്ള പ്രകൃതിദത്ത നിറങ്ങള്‍ ഉപയോഗിക്കുന്നവരും ഉണ്ട്. ഇതു കാരണം വര്‍ഷങ്ങളോളം വെണ്ണ മഞ്ഞ നിറവും ആകര്‍ഷണമുള്ളവയുമായി കാണപ്പെടുന്നു. 

എരുമപ്പാലില്‍ ബീറ്റ കരോട്ടിന്റെ അളവു കുറവാണ്. അതുകൊണ്ട് തന്നെ വടക്കേ ഇന്ത്യയിലെ വീടുകളിലുണ്ടാക്കുന്ന വെണ്ണയ്ക്ക് മഞ്ഞനിറം ഉണ്ടാവുന്നതും വളരെ കുറവായിരിക്കും. ഇന്ത്യന്‍ പാലുല്‍പന്നങ്ങളില്‍ മുന്‍പന്തിയില്‍  തന്നെയാണ് അമൂല്‍. തുടക്കത്തില്‍ അമൂലിന്റെ വെണ്ണയുണ്ടാക്കിയിരുന്നത് ഫ്രഷ്‌ക്രീമില്‍ നിന്നാണ്. അതുകൊണ്ട് തന്നെ ഇവയ്ക്ക് വിളറിയ നിറവും മഞ്ഞ നിറവും ഉപ്പില്ലാത്തതും ആയിരുന്നു. എന്നാല്‍ ഇന്നു കാണുന്ന അമൂല്‍ പരസ്യങ്ങളില്‍ വെണ്ണയുടെ നിറം മഞ്ഞയായി ലഭിക്കാന്‍ പ്രകൃതിദത്ത നിറങ്ങള്‍ ചേര്‍ക്കുകയാണ് ചെയ്തിട്ടുള്ളത്.