പട്‌ന: ബിഹാറില്‍ വീണ്ടും നായയുടെ പേരില്‍ താമസ സര്‍ട്ടിഫിക്കറ്റിന് അപേക്ഷയെത്തി. ഇത്തവണ ഡോഗേഷ് ബാബുവിനാണ് റസിഡന്‍സ് സര്‍ട്ടിഫിക്കറ്റ് വേണ്ടത്. കഴിഞ്ഞ ദിവസം ഡോഗേഷ് ബാബുവെന്ന നായക്ക് താമസ സര്‍ട്ടിഫിക്കറ്റ് അനുവദിച്ചത് വലിയ വിവാദമായിരുന്നു. ഇതിന് പിന്നാലെയാണ് വീണ്ടും അപേക്ഷയെത്തിയത്. സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചു.

സിര്‍ദാല ബ്ലോക്കിലെ ആര്‍ടിപിഎസ് ഓഫീസിലേക്കാണ് ഓണ്‍ലൈനായി പുതിയ അപേക്ഷയെത്തിയത്. അച്ഛന്റെ സ്ഥാനത്ത് 'ഡോഗേഷിന്റെ പപ്പ', അമ്മയുടെ സ്ഥാനത്ത് 'ഡോഗേഷിന്റെ മാമി' എന്നിങ്ങനെയാണ് അപേക്ഷ ഫോമില്‍ രേഖപ്പെടുത്തിയിട്ടുള്ളത്. ലിംഗം ആണ്‍ എന്നും രേഖപ്പെടുത്തിയിട്ടുണ്ട്. 

സംഭവത്തില്‍ ആര്‍.ടി.പി.എസ് പോര്‍ട്ടലിന്റെ ദുരുപയോഗത്തെക്കുറിച്ച് എഫ്.ഐ.ആര്‍ ഫയല്‍ ചെയ്ത് അന്വേഷണം നടത്താന്‍ നവാഡ ജില്ലാ മജിസ്ട്രേറ്റ് രവി പ്രകാശ് ഉത്തരവിട്ടു. സെക്ഷന്‍ 241 പ്രകാരം വഞ്ചനാപരമായ ഉപയോഗം, സെക്ഷന്‍ 241 പ്രകാരം വ്യാജ രേഖ ചമക്കല്‍, സെക്ഷന്‍ 319(2) പ്രകാരം വഞ്ചന, സെക്ഷന്‍ 340 (1),(2) പ്രകാരം ഇലക്ടോണിക് രേഖകളുടെ ദുരുപയോഗം,  ഐ.ടി ആക്ടിലെ സെക്ഷന്‍ 66 ഡി, കമ്പ്യൂട്ടറുകള്‍ ഉപയോഗിച്ചുള്ള ആള്‍മാറാട്ടം എന്നീ വകുപ്പുകള്‍ ചുമത്തിയാണ് കേസെടുത്തിട്ടുള്ളത്. 

ALSO READ: ധർമസ്ഥല കേസ്: രണ്ടാം ദിവസത്തെ തെരച്ചിൽ പൂർത്തിയായി, 5 പോയിന്റുകളിൽ ഒന്നും കണ്ടെത്തിയില്ല 

കഴിഞ്ഞ ദിവസം ഡോഗ് ബാബുവെന്ന നായക്ക് റസിഡന്‍ഷ്യല്‍ പെര്‍മിറ്റ് അനുവദിച്ചെന്ന വാര്‍ത്ത വലിയ വിവാദമായിരുന്നു. റവന്യൂ ഓഫീസര്‍ മുരാരി ചൗഹാന്റെ ഡിജിറ്റല്‍ ഒപ്പോടുകൂടിയാണ് ഡോഗ് ബാബുവിന് സര്‍ട്ടിഫിക്കറ്റ് അനുവദിച്ചത്. കുത്ത, കുത്തിയ ദേവി എന്നിങ്ങനെയായിരുന്നു ഡോഗ് ബാബുവിന്റെ രക്ഷിതാക്കളുടെ പേരുകള്‍. ഈ സംഭവത്തിലും അന്വേഷണം പ്രഖ്യാപിച്ചിട്ടുണ്ട്. അപേക്ഷ നല്‍കിയ വ്യക്തി, കമ്പ്യൂട്ടര്‍ ഓപ്പറേറ്റര്‍, അപേക്ഷ സ്വീകരിച്ച ഉദ്യോഗസ്ഥര്‍ക്കെതിരെ നടപടി എടുക്കാനാണ് തീരുമാനം.