തിരുവനന്തപുരം: നേരത്തെ പിൻവലിച്ച ബസ് സമരം വീണ്ടും ആരംഭിക്കാനുള്ള ഒരുക്കത്തിലേക്ക് ബസ് ഉടമകൾ. സ്വകാര്യ ബസ് ഉടമകൾ ഉന്നയിച്ച ആവശ്യങ്ങൾ ചർച്ചയിൽ തീരുമാനമാകാത്ത സാഹചര്യത്തിലാണ് വീണ്ടും സമരത്തിലേക്ക് നീങ്ങുന്നത്. വിദ്യാർഥികളുടെ ടിക്കറ്റ് നിരക്ക് വർധന ഉൾപ്പെടെയുള്ള വിവിധ ആവശ്യങ്ങളാണ് സംസ്ഥാനസർക്കാർ അംഗീകരിക്കാതിരുന്നത്. ഓഗസ്റ്റ് ഒന്നിന് ഇത് സംബന്ധിച്ച് അന്തിമ തീരുമാനമുണ്ടാകും.

ഇന്ന് തിരുവനന്തപുരത്ത് വെച്ച് ബസുടമ സംയുക്ത സമിതി ഭാരവാഹികൾ ഗതാഗത സെക്രട്ടറി, ട്രാൻസ്പോർട് കമ്മീഷണർ എന്നിവരുമായി  നടത്തിയ ചർച്ച പരാജയപ്പെട്ട സാഹചര്യത്തിലാണ് സമരത്തിലേക്ക് നീങ്ങാൻ ബസ് ഉടമകൾ തീരുമാനിച്ചത്. അനിശ്ചിതകാല ബസ് സമരം പ്രഖ്യാപിക്കാൻ ബസ് ഉടമ സംയുക്ത സമിതി തീരുമാനിച്ചതായി സംയുക്ത സമിതി ചെയർമാൻ ഹംസ ഏരിക്കുന്നൻ അറിയിച്ചു. 

ALSO READ: വീഴ്ചകളിൽ നിന്ന് പഠിക്കാത്ത എയർ ഇന്ത്യ; ഡിജിസിഎ 51 സുരക്ഷാ വീഴ്ചകൾ കണ്ടെത്തിയാതായി റോയിട്ടേഴ്‌സ്

ബസുടമ സംയുക്ത സമിതി ഓഗസ്‌റ്റ് ഒന്നിന് തൃശൂരിൽ യോഗം ചേരുന്നുണ്ട്. യോഗത്തിൽ വെച്ച് സമരത്തിന്റെ തീയ്യതി നിശ്ചയിച്ച് പ്രഖ്യാപനം നടത്തുമെന്നും ഹംസ ഏരിക്കുന്നൻ അറിയിച്ചു. വിദ്യാർഥികളുടെ ടിക്കറ്റ് നിരക്ക് വർഡിപ്പിക്കണമെന്ന ജസ്റ്റീസ് രാമചന്ദ്രൻ കമ്മിഷൻ റിപ്പോർട്ട് നടപ്പിലാക്കുക, ദീർഘ ദൂര പെർമിറ്റുകളും ലിമിറ്റഡ് സ്റ്റോപ് പെർമിറ്റുകളും യഥാസമയം പുതുക്കിനൽകുക തുടങ്ങിയ ആവശ്യങ്ങൾ ഉന്നയിച്ചാണ് വീണ്ടും അനിശ്ചിത കാല സമരം പ്രഖ്യാപിക്കുക. 

ബസുടമകൾ നേരത്തെ സൂചന പണിമുടക്ക് നടത്തിയിരുന്നു. പിന്നാലെ അനിശ്ചിതകാല സമരം ആരംഭിക്കാൻ ഒരുങ്ങുകയായിരുന്നു. എന്നാൽ സമരത്തിന്റെ തലേ ദിവസം സമരം പിൻവലിക്കുകയായിരുന്നു. ഇതിന് പിന്നാലെ ഇന്ന് നടന്ന ചർച്ചകൂടി പരാജയമായതോടെ സമരമല്ലാതെ മറ്റു മാർഗങ്ങൾ ഇല്ലെന്ന അവസ്ഥയിലാണ് സ്വകാര്യ ബസ് ഉടമകൾ.