മുംബൈ: ഇന്ത്യയുടെ ബജറ്റ് എയർലൈനായ എയർ ഇന്ത്യയിൽ 51 സുരക്ഷാ വീഴ്ചകൾ കണ്ടെത്തി വ്യോമയാന നിയന്ത്രണ ഏജൻസിയായ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). ജൂലൈയിൽ നടത്തിയ ഒരു ഓഡിറ്റിലാണ് ഇത്രയധികം വീഴ്ചകൾ കണ്ടെത്തിയതെന്ന് റോയിട്ടേഴ്‌സ് പുറത്തുവിട്ട റിപ്പോർട്ടിൽ പറയുന്നു. അപര്യാപ്തമായ പൈലറ്റ് പരിശീലനവും തെറ്റായ ക്രൂ മാനേജ്‍മെന്റ് സംവിധാനവും ഇതിൽ ഉൾപ്പെടുന്നുവെന്ന് റിപ്പോർട്ട് പറയുന്നു. അഹമ്മദാബാദിൽ 260 പേരുടെ മരണത്തിന് കാരണമായ ബോയിംഗ് 787 വിമാന അപകടത്തെത്തുടർന്ന് നടത്തിയ പരിശോധനയെ തുടർന്നാണ് ഓഡിറ്റ് നടത്തിയത്. എന്നാൽ ഇതിൽ കണ്ടെത്തിയ കാരണങ്ങൾ അല്ല അഹമ്മദാബാദ് അപകടത്തിന് കാരണമായത്.

അടിയന്തര ഉപകരണങ്ങൾ പരിശോധിക്കുന്നതിലും, ജീവനക്കാരുടെ ജോലി ഭാരം നിയന്ത്രിക്കുന്നതിലും പരാജയപ്പെട്ടതിന് ടാറ്റ ഗ്രൂപ്പിന്റെ ഉടമസ്ഥതയിലുള്ള എയർലൈന് നേരത്തെ ഡിജിസിഎ മുന്നറിയിപ്പ് നൽകിയിരുന്നു. ജൂലൈ 30-നകം തിരുത്തൽ ആവശ്യമുള്ള ഏഴ് പ്രധാന ലംഘനങ്ങളും ഓഗസ്റ്റ് 23-നകം പരിഹരിക്കേണ്ട 44 മറ്റ് ലംഘനങ്ങളും ഡിജിസിഎയുടെ റിപ്പോർട്ടിൽ പട്ടികപ്പെടുത്തിയിട്ടുണ്ട്. ബോയിംഗ് 787, 777 പൈലറ്റുമാർക്കുള്ള ആവർത്തിച്ചുള്ള പരിശീലന കുറവുകളും റിപ്പോർട്ടിൽ ഉണ്ട്.

ALSO READ: ബോയിംഗ് 787 വിമാനങ്ങളിലെ ഇന്ധന നിയന്ത്രണ സ്വിച്ചുകൾ പരിശോധിക്കാൻ നിർദേശം നൽകി ഇത്തിഹാദ്; നടപടി ഇന്ത്യയിലെ അപകടത്തിന്റെ പശ്ചാത്തലത്തിൽ

എയർ ഇന്ത്യയുടെ വിമാനക്കമ്പനിയിൽ 34 ബോയിംഗ് 787 വിമാനങ്ങളും 23 ബോയിംഗ് 777 വിമാനങ്ങളുമാണുള്ളത്. ജൂണിലെ അപകടത്തെക്കുറിച്ചുള്ള പ്രാഥമിക അന്വേഷണത്തിൽ പറന്നുയർന്നതിന് ശേഷം ഇന്ധന നിയന്ത്രണ സ്വിച്ചുകൾ അബദ്ധത്തിൽ ഓഫാക്കിയതായി കണ്ടെത്തിയിരുന്നു. ഇത് പൈലറ്റുമാരെ ആശയക്കുഴപ്പത്തിലാക്കിയതാണ് അപകടത്തിലേക്ക് നയിച്ചത്. എയർ ഇന്ത്യ പൈലറ്റുമാർ ഫ്ലൈറ്റ്-ഡ്യൂട്ടി പരിധി കവിഞ്ഞതായി ഡിജിസിഎ ആശങ്ക പ്രകടിപ്പിച്ചു. കഴിഞ്ഞ മാസം മിലാൻ-ന്യൂഡൽഹി എഐ-787 വിമാനം ഡ്യൂട്ടി പരിധി കഴിഞ്ഞ് രണ്ട് മണിക്കൂറിലധികം അധികം പറന്നതായും റിപ്പോർട്ടിൽ ഉണ്ട്.

ആവശ്യത്തിന് ക്രൂ ഇല്ലാത്തപ്പോൾ അലേർട്ടുകൾ നൽകാത്ത എയർ ഇന്ത്യയുടെ ക്രൂ മാനേജ്‍മെന്റ് സംവിധാനത്തെയും ഓഡിറ്റ് വിമർശിച്ചു. ഇത് മതിയായ ക്യാബിൻ ക്രൂ ഇല്ലാതെ നാല് അന്താരാഷ്ട്ര വിമാനങ്ങൾ സർവീസ് നടത്തുന്നതിന് കാരണമായി. 2022 ൽ ടാറ്റ എയർ ഇന്ത്യ ഏറ്റെടുത്തിട്ടും, ക്യാബിൻ ശുചിത്വത്തെയും ഉപകരണ പ്രശ്‌നങ്ങളെയും കുറിച്ചുള്ള യാത്രക്കാരുടെ പരാതികൾ കുറഞ്ഞിട്ടില്ലെന്നും റിപ്പോർട്ടിലുണ്ട്.