കോഴിക്കോട്: മാനസികാരോഗ്യ കേന്ദ്രത്തിൽ അധ്യാപിക മരിച്ച സംഭവത്തിൽ ദുരൂഹത നീക്കാൻ നാർക്കോ അനാലിസിസ് പരിശോധന. കൊയിലാണ്ടി സ്വദേശിയായ അധ്യാപികയുടെ മകന്റെ നാർക്കോ അനാലിസിസ് പരിശോധനയാണ് സംഭവം നടന്ന് നാല്‌വർഷത്തിന് ശേഷം ഗുജറാത്തിലെ ഗാന്ധിനഗറിലെ ഫൊറൻസിക് സയൻസ് ലബോറട്ടറിയിൽ നടത്തിയത്. അധ്യാപികയുടെ വീട്ടുകാർക്കോ ബന്ധുക്കൾക്കോ മരണവുമായി ബന്ധപ്പെട്ട് സംശയങ്ങളൊന്നുമുണ്ടായിരുന്നില്ല. 

എന്നാൽ മരണകാരണത്തിലെ ദുരൂഹതകളാണ് പൊലിസിനെ നാർക്കോ അനാലിസിസ് വരെ എത്തിച്ചത്.  നാർക്കോ അനാലിസിസ് പരിശോധനാ ഫലം ലഭിക്കണമെങ്കിൽ പൊലിസ് തുക അടയ്ക്കണം. കഴിഞ്ഞ ദിവസം  ആഭ്യന്തരവകുപ്പ് 95,020 രൂപ അനുവദിച്ചതോടെ പരിശോധനാ ഫലം ഉടൻ ലഭിക്കുമെന്ന പ്രതീക്ഷയിലാണ് പൊലിസ്. 

2021 ഓഗസ്റ്റ് എട്ടിനാണ് കേസിനാസ്പദ സംഭവം. നടക്കാവ് സ്‌റ്റേഷൻ പരിധിയിലെ മാനസികരോഗ ചികിത്സാ കേന്ദ്രത്തിൽ പ്രവേശിപ്പിച്ച 53 വയസുള്ള അധ്യാപികയാണ് മരിച്ചത്. സംഭവത്തിൽ മകന്റെ പരാതിയിൽ നടക്കാവ് പൊലിസ് അസ്വാഭാവിക മരണത്തിന് കേസെടുത്തു. എസ്.ഐ കൈലാസ്‌നാഥ് ആയിരുന്നു കേസന്വേഷിച്ചത്.  അധ്യാപിക മരിക്കുമ്പോൾ വായയിൽ നിന്നും മൂക്കിൽ നിന്നും രക്തം വന്നിരുന്നതായി കേസന്വേഷിച്ച എസ്.ഐ പറഞ്ഞു. എങ്കിലും പരിശോധിച്ച ഡോക്ടറുടെ മൊഴിയിൽ സംശയാസ്പദമായി ഒന്നുമുണ്ടായിരുന്നില്ല. ആന്തരിക രക്തസ്രാവത്തിനുള്ള സാധ്യത ശരിവയ്ക്കുന്ന മറുപടിയായിരുന്നു പൊലിസിന് ലഭിച്ചത്. 

മരണകാരണം ആന്തരിക രക്തസ്രാവമായേക്കാമെന്നായിരുന്നു പോസ്റ്റ്‌മോർട്ടം റിപ്പോർട്ടിലുള്ളത്. തുടർന്ന് വിശദപരിശോധനയ്ക്കായി കെമിക്കൽ എക്‌സാമിനേഷൻ ലാബിലേക്ക് ആന്തരികാവയവങ്ങൾ അയച്ചു.  രാസവസ്തുവിന്റെ സാന്നിധ്യമുണ്ടെന്നായിരുന്നു പരിശോധനാഫലം. 

സയനൈഡ് പോലുള്ള വസ്തു ആണെന്നും പൊലിസിന് വിവരം ലഭിച്ചു. ഇതോടെ അസ്വാഭാവിക മരണത്തിൽ ദുരൂഹതയേറി. അധ്യാപിക മരിക്കുന്നതിന് ഏതാനും ദിവസം മുമ്പാണ് വിദേശത്തുള്ള മകൻ തിരിച്ചെത്തിയത്. മരണ ദിവസവും മകൻ ഒപ്പമുണ്ടായിരുന്നു. അധ്യാപികയുടെ ഭർത്താവും ചികിത്സാകേന്ദ്രത്തിലുണ്ടായിരുന്നു. ഇരുവരെയും പൊലിസ് ചോദ്യം ചെയ്‌തെങ്കിലും സംശയം അവശേഷിച്ചു. ഇതോടെ മറ്റുബന്ധുക്കളെ കേന്ദ്രീകരിച്ചും അന്വേഷണം നടത്തി. വർഷങ്ങൾക്ക് മുമ്പേ തന്നെ മാനസികാസ്വാസ്ഥ്യമുള്ളയാളായിരുന്നു അധ്യാപികയെന്നായിരുന്നു അന്വേഷണത്തിൽ വ്യക്തമായത്. 

മരണത്തിൽ ആർക്കും യാതൊരുസംശയവും ഉണ്ടായിരുന്നില്ല. എന്നാൽ സംശയസാധ്യതകൾ നിലനിൽക്കുന്നതിനാൽ പൊലിസ് മകന്റെ നുണ പരിശോധന നടത്തി. ഈ പരിശോധനാ ഫലത്തിലും സംശയാസ്പദമായി ഒന്നും കണ്ടെത്താനായില്ല. പിന്നീടാണ് വിശദപരിശോധനയ്ക്കായി നാർക്കോ അനാലിസിസിന് വിധേയനാക്കാൻ തീരുമാനിച്ചത്. നിലവിൽ ഇൻസ്പെക്ടർ എൻ.പ്രജീഷാണ് കേസന്വേഷിക്കുന്നത്.