മലപ്പുറം: മഞ്ചേരിയിൽ ഡ്രൈവറുടെ മുഖത്തടിച്ച പൊലിസുകാരനെ സ്ഥലം മാറ്റി. മഞ്ചേരി ട്രാഫിക് എൻഫോഴ്സ്മെന്റ് യൂണിറ്റിലെ ഡ്രൈവറായ നൗഷാദിനെയാണ് സ്ഥലം മാറ്റിയത്. മഞ്ചേരി ട്രാഫിക് സ്റ്റേഷനിൽ നിന്നും മലപ്പുറം ആംഡ് പൊലിസ് ഫോഴ്സിലേക്കാണ് സ്ഥലം മാറ്റിയത്. ബാങ്കിലേക്ക് പണം കൊണ്ടുപോവുകയായിരുന്ന ഡ്രൈവർ ജാഫറിനെയാണ് പൊലിസ് മർദിച്ചത്.

ഇന്നലെ ഉച്ചക്കായിരുന്നു സംഭവം നടന്നത്. പൊലിസ് നടത്തിയ വാഹന പരിശോധനക്കിടെയാണ് ഡ്രൈവറായ ജാഫറിനെ പൊലിസ് ഉദ്യോഗസ്ഥൻ മർദിച്ചത്. കനാറ ബാങ്കിന്റെ പണം കൊണ്ടുപോകുന്ന വാഹനത്തിന്റെ ഡ്രൈവറാണ് ജാഫർ. പരിശോധനക്കിടയിൽ ഡ്രൈവർ കാക്കി ധരിച്ചില്ല എന്നു പറഞ്ഞ് പൊലിസ് പിഴയീടാക്കുകയായിരുന്നു. പിഴയായി അടക്കേണ്ട തുക കുറച്ചു തരുമോ എന്ന് ജാഫർ പൊലിസ് ഉദ്യോഗസ്ഥനോട് ചോദിച്ചതിന് പിന്നാലെയാണ് മർദ്ദനം ഉണ്ടായത്.

ഡ്രൈവറിന്റെ മുഖത്ത് അടിക്കുന്നതിന്റെ വീഡിയോയും പുറത്തുവന്നിട്ടുണ്ട്. തൊട്ടടുത്തുള്ള വാഹനത്തിലെ ആളുകളാണ് വീഡിയോ പകർത്തിയത്. പരാതിയുമായി മുന്നോട്ട് പോകരുതെന്ന് പറഞ്ഞ് ജാഫറിനെ പൊലിസ് ഉദ്യോഗസ്ഥൻ ഭീഷണിപ്പെടുത്തിയെന്നും വിവരങ്ങളുണ്ട്. സംഭവത്തിൽ അന്വേഷണം നടത്തിയാണ് പൊലിസ് ഉദ്യോഗസ്ഥനെ സ്ഥലം മാറ്റിയത്.