കോഴിക്കോട്: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്ത് ജയിലിലിട്ട സംഭവത്തിൽ ബി.ജെ.പി സംസ്ഥാന ഘടകം വീണ്ടും കുരുക്കിൽ. കന്യാസ്ത്രീകൾ ചെയ്തത് ഗുരുതര കുറ്റമാണെന്ന് ഹിന്ദുത്വസംഘടനകൾ നിലപാടെടുത്തത് ഈ വിഷയത്തിൽ മുഖം രക്ഷിക്കാൻ നീക്കം നടത്തുന്ന സംസ്ഥാന പ്രസിഡന്റിനും മറ്റ് നേതാക്കൾക്കും തിരിച്ചടിയായി.

ക്രൈസ്തവ വിഭാഗത്തെ ഒപ്പം നിർത്താൻ പാർട്ടി ശ്രമിക്കുന്നതിനിടെയുണ്ടായ അറസ്റ്റ് സംസ്ഥാന ഘടകത്തെ  പ്രതിസന്ധിയിലാക്കിയിരിക്കുകയാണ്. സഭാ നേതൃത്വവും വിശ്വാസിസമൂഹവും പ്രതിഷേധവുമായി രംഗത്തിറങ്ങിയതോടെയാണ് പ്രതിഷേധം തണുപ്പിക്കാൻ രാജീവ് ചന്ദ്രശേഖർ നീക്കം തുടങ്ങിയത്. 

ഇതിൻ്റെ ഭാഗമായി സംസ്ഥാന ജനറൽ സെക്രട്ടറി അനൂപ് ആൻ്റണിയെ ഛത്തീസ്ഗഡിലേക്ക് അയച്ചിരുന്നു. അറസ്റ്റിലായ കന്യാസ്ത്രീകൾക്ക് നീതി ഉറപ്പാക്കാൻ ആവശ്യമായ എല്ലാ സഹായവും ചെയ്യുമെന്ന രാജീവിൻ്റെ ഫേസ്ബുക്ക് പോസ്റ്റ് വന്നതിന് പിന്നാലെയാണ് സമൂഹമാധ്യമങ്ങളിലൂടെ കടുത്ത സംഘ്പരിവാറുകാർ വിമർശനം തുടങ്ങിയത്. 

തീവ്രഹിന്ദുത്വർക്കൊപ്പം ചേർന്ന് കെ.സുരേന്ദ്രൻ വിഭാഗവും സംസ്ഥാന നേതൃത്വത്തിൻ്റെ നീക്കങ്ങളെ എതിർക്കുന്നുണ്ട്. തന്നെ അനുകൂലിക്കുന്നവരെ വെട്ടി നിരത്തുന്ന രാജീവ് ചന്ദ്രശേഖറിനെതിരേ കിട്ടിയ അവസരം ഉപയോഗിക്കുകയാണ് കെ.സുരേന്ദ്രൻ. 

ബജ്‌റംഗ്ദളാണ് ഛത്തീസ്ഗഡിൽ ആക്രമണം നടത്തിയതെന്നും അതിന് തങ്ങളുമായി ബന്ധമില്ലെന്നുമുള്ള രാജീവിന്റെ വാദം തീവ്രവിഭാഗം  ഖണ്ഡിക്കുന്നു. സംഘ്പരിവാർ സംഘടനയായ ഹിന്ദു ഐക്യവേദിയുടെ യുവജന വിഭാഗമാണ് ബജ്‌റംഗ്ദൾ എന്നും ഇന്നലെ പാർട്ടിയിലേക്ക് കയറിവന്ന രാജീവ് ചന്ദ്രശേഖറിന് ഇതൊന്നും മനസിലാവില്ലെന്നും സംഘ്പരിവാർ സൈബർ വിങ്ങുകൾ കുറ്റപ്പെടുത്തുന്നു. ഹിന്ദുഐക്യവേദി സംസ്ഥാന പ്രസിഡൻ്റ് ആർ.വി ബാബു, ആർ.എസ്.എസ് നേതാവ് കെ.ഗോവിന്ദൻകുട്ടി എന്നിവരും ബി.ജെ.പി നേതൃത്വത്തിൻ്റെ അനുനയ നീക്കങ്ങളെ എതിർക്കുകയാണ്. 

ഇതോടൊപ്പം രാജീവ് ചന്ദ്രശേഖറിന്റെ അടുത്ത അനുയായി ആയ  അനൂപ് ആന്റണിക്കെതിരേയും സംഘ്പരിവാർ അനുകൂലികൾ കടുത്ത സൈബർ ആക്രമണമാണ് നടത്തുന്നത്. ഇയാൾ ഏത് വകയിലാണ് ബി.ജെ.പിയുടെ ഭാവി ആയതെന്ന് മനസിലാകുന്നില്ല. ജോർജ് കുര്യനല്ല അനൂപ് ആന്റണി. കുര്യൻ നമ്മുടെ വികാരമാണ്. അനൂപ് നമ്മൾ കരുതിയിരിക്കേണ്ട അപകടവും എന്ന മുന്നറിയിപ്പും സംഘ്പരിവാർ ഗ്രൂപ്പുകളിൽ പ്രചരിക്കുന്നുണ്ട്.