2026 ഫിഫ ലോകകപ്പ് ക്രിസ്റ്റ്യാനോ റൊണാൾഡോക്കായി നേടികൊടുക്കുമെന്ന് പറഞ്ഞിരിക്കുകയാണ് പോർച്ചുഗൽ താരം ജാവോ ഫെലിക്സ്. റൊണാൾഡോ തന്റെ കരിയറിൽ ഒരു ലോകകപ്പ് അർഹിക്കുന്നുണ്ടെന്നും റൊണാൾഡോ തന്റെ ആരാധനാപാത്രമാണെന്നും ജാവോ ഫെലിക്സ്  പറഞ്ഞു. 

''ക്രിസ്റ്റ്യാനോ റൊണാൾഡോ ലോകകപ്പ് നേടാൻ അർഹനാണ്. ലോകകപ്പ് നേടാനായി ഞങ്ങൾ അദ്ദേഹത്തെ സഹായിക്കും. അത് അദ്ദേഹത്തിന്റെ സ്വപ്നമാണ്. അദ്ദേഹത്തിന് നഷ്ടമായ ഒരേയൊരു കിരീടം ലോകകപ്പാണ്. ഫുട്ബോളിലെ എന്റെ ആരാധനാപാത്രമാണ് റൊണാൾഡോ. എല്ലാ മേഖലയിലും അദ്ദേഹം എനിക്ക് ഒരു മാതൃകയാണ്. ഞാൻ നേരിട്ട് കണ്ട മുതൽ ലോകത്തിലെ ഏറ്റവും മികച്ച താരമായിരുന്നു അദ്ദേഹം'' ജാവോ ഫെലിക്സ് പറഞ്ഞു.  

ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

അതേസമയം അടുത്തിടെ യുവേഫ നേഷൻസ് ലീഗ് കിരീടം പോർച്ചുഗൽ സ്വന്തമാക്കിയിരുന്നു. ഫൈനലിൽ സ്‌പെയിനെ പെനൽറ്റി ഷൂട്ടൗട്ടിൽ 5-3 ന് വീഴ്ത്തിയാണ് പോർച്ചുഗൽ കിരീടം സ്വന്തമാക്കിയത്. നിശ്ചിത സമയത്തും അധിക സമയത്തും 2-2 എന്ന സ്‌കോറിൽ സമനിലയിൽ പിരിഞ്ഞ മത്സരത്തിൽ, പെനൽറ്റി ഷൂട്ടൗട്ടിലൂടെയാണ് പോർച്ചുഗൽ വിജയികളായത്. പോർച്ചുഗലിന്റെ രണ്ടാം യുവേഫ നേഷൻസ് ലീഗ് കിരീട നേട്ടമായിരുന്നു ഇത്. 2019ലാണ് ഇതിനു മുമ്പ് പോർച്ചുഗൽ ആദ്യമായി ഈ ടൂർണമെന്റ് വിജയിച്ചത്. 

മത്സരത്തിൽ പോർച്ചുഗൽ സമനില ഗോൾ നേടിയത് ക്രിസ്റ്റ്യാനോ റൊണാൾഡോയിലൂടെയായിരുന്നു. ഈ ഗോളോടെ മറ്റൊരു റെക്കോർഡും റൊണാൾഡോ തന്റെ പേരിൽ എഴുതി ചേർത്തു. യുവേഫ നേഷൻസ് ലീഗിന്റെ ഫൈനലിൽ ഗോൾ നേടുന്ന ഏറ്റവും പ്രായം കൂടിയ താരമായാണ് റൊണാൾഡോ മാറിയത്. തന്റെ നാല്പതാം വയസിലാണ് റൊണാൾഡോ ഈ നേട്ടം കൈവരിച്ചത്.

Portugal star Joao Felix has said that he will win the 2026 FIFA World Cup for Cristiano Ronaldo Joao Felix said that Ronaldo deserves a World Cup in his career and that Ronaldo is his idol