തിരുവനന്തപുരം: വന്യജീവി ആക്രമണങ്ങളെ ചെറുക്കാൻ വൈദ്യുതി വേലികൾ സ്ഥാപിക്കുന്നതിന് ഇലക്ട്രിക്കൽ ഇൻസ്പെക്ടറേറ്റിന്റെ പ്രത്യേക അനുമതി നിർബന്ധമാണെന്ന് കെഎസ്ഇബി മുന്നറിയിപ്പ്. ഒരു കാരണവശാലും കെഎസ്ഇബി ലൈനിൽ നിന്നോ വീട്ടിലെ വൈദ്യുതി കണക്ഷനിൽ നിന്നോ നേരിട്ടോ അല്ലാതെയോ വൈദ്യുതി വേലികളിലേക്ക് വൈദ്യുതി പ്രവഹിപ്പിക്കാൻ പാടില്ല. ഇത്തരം അനധികൃത ഉപയോഗം 2003ലെ ഇലക്ട്രിസിറ്റി ആക്ട് പ്രകാരം ക്രിമിനൽ കുറ്റമാണ്. ഇത് മൂന്ന് വർഷം വരെ തടവും പിഴയും ലഭിക്കാവുന്ന കുറ്റമായി കണക്കാക്കും.

കഴിഞ്ഞ രണ്ട് വർഷത്തിനിടെ വൈദ്യുതി വേലികളിൽ നിന്നുള്ള ഷോക്കേറ്റ് 24 പേർ മരണപ്പെട്ടതിന്റെ പശ്ചാത്തലത്തിലാണ് കെഎസ്ഇബിയുടെ കർശന നിർദേശം. അടുത്തിടെ രണ്ട് കുട്ടികൾ ഉൾപ്പെടെ ഷോക്കേറ്റ് മരിച്ച സംഭവവും റിപ്പോർട്ട് ചെയ്തിട്ടുണ്ട്. പലപ്പോഴും കെഎസ്ഇബി ലൈനിൽ നിന്ന് വൈദ്യുതി മോഷ്ടിക്കുകയോ വീട്ടിലെ കണക്ഷനിൽ നിന്ന് വേലികളിലേക്ക് വൈദ്യുതി കടത്തിവിടുകയോ ചെയ്യുന്നതാണ് അപകടങ്ങൾക്ക് കാരണമാകുന്നത്.

സുരക്ഷിതമായ വൈദ്യുതി വേലി: മാർഗനിർദേശങ്ങൾ

വൈദ്യുതി വേലികൾ സ്ഥാപിക്കുന്നതിന് ഇലക്ട്രിക്കൽ ഇൻസ്പെക്ടറേറ്റിന്റെ മുൻകൂർ അനുമതി വാങ്ങണം. ഇലക്ട്രിക്കൽ ഉപകരണങ്ങളുടെ സ്റ്റാൻഡേർഡ് ഐഎസ്-302-2-76 (1999) സെക്ഷൻ 76, പാർട്ട് 2 അനുസരിച്ച് ഇംപൾസ് ജനറേറ്റർ ഉപയോഗിക്കുന്ന, ബാറ്ററി പ്രവർത്തിപ്പിക്കുന്ന ഇലക്ട്രിക് ഫെൻസ് എനെർജൈസറുകൾ മാത്രമേ ഉപയോഗിക്കാൻ പാടുള്ളൂ.

2003ലെ ഇലക്ട്രിസിറ്റി ആക്ടിന്റെ ഭാഗം 14, വകുപ്പ് 135 (1) (ഇ) പ്രകാരം വൈദ്യുതി വേലികൾക്കായി അനധികൃതമായി വൈദ്യുതി ഉപയോഗിക്കുന്നത് കർശനമായി നിരോധിച്ചിട്ടുണ്ട്. ഇത് മൂന്ന് വർഷം വരെ തടവും പിഴയും ലഭിക്കാവുന്ന കുറ്റമാണ്.

ഇത്തരം അപകടകരമായ പ്രവൃത്തികൾ തടയാൻ പൊതുജനങ്ങളുടെ സഹകരണം അനിവാര്യമാണെന്ന് കെഎസ്ഇബി അറിയിച്ചു. വൈദ്യുതിയുടെ അനധികൃത ഉപയോഗം ശ്രദ്ധയിൽപ്പെട്ടാൽ അടുത്തുള്ള കെഎസ്ഇബി സെക്ഷൻ ഓഫീസിലോ 9496010101 എന്ന എമർജൻസി നമ്പറിലോ അറിയിക്കണമെന്ന് കെഎസ്ഇബി അഭ്യർത്ഥിച്ചു.

KSEB has issued a strict warning against the unauthorized use of electricity for electric fences, emphasizing that power from KSEB lines or homes must not be used. Special permission from the Electrical Inspectorate is required to install such fences