കൊച്ചി: മലയാള സാഹിത്യത്തിന്റെ നിറപകിട്ടായ പ്രൊഫസർ എം.കെ. സാനു (97) അന്തരിച്ചു. "സാനു മാഷ്" എന്ന് മലയാളികൾ സ്നേഹപൂർവം വിളിച്ചിരുന്ന അദ്ദേഹം കേരളത്തിന്റെ സാംസ്കാരിക മേഖലയിലെ ആദരണീയ വ്യക്തിത്വമായിരുന്നു. ന്യൂമോണിയ ബാധിച്ച് ചികിത്സയിലായിരുന്നു.  ഇന്ന് വൈകുന്നേരം 5:35നാണ് മരണം സംഭവിച്ചത്. രാത്രി 9 വരെ കൊച്ചിയിലെ അമ‍ൃത ആശുപത്രിയിൽ മൃതദേ​ഹം പൊതുദർശനത്തിന് വയ്ക്കും.

1928 ഒക്ടോബർ 27ന് ആലപ്പുഴ തുമ്പോളിയിൽ എം.സി. കേശവന്റെയും കെ.പി. ഭവാനിയുടെയും മകനായി ജനിച്ച എം.കെ. സാനു, തിരുവനന്തപുരം യൂണിവേഴ്സിറ്റി കോളേജിൽ നിന്ന് മലയാളത്തിൽ ഒന്നാം റാങ്കോടെ എം.എ. ബിരുദം നേടി. നാല് വർഷം സ്കൂൾ അധ്യാപകനായും പിന്നീട് കൊല്ലം എസ്.എൻ. കോളേജ്, എറണാകുളം മഹാരാജാസ് കോളേജ് ഉൾപ്പെടെ വിവിധ ഗവൺമെന്റ് കോളേജുകളിൽ അധ്യാപകനായും പ്രവർത്തിച്ചു. 1983ൽ അധ്യാപന ജീവിതത്തിൽ നിന്ന് വിരമിച്ചു.

മികച്ച എഴുത്തുകാരൻ, നിരൂപകൻ, വാഗ്മി, ചിന്തകൻ, മുൻ നിയമസഭാംഗം എന്നീ നിലകളിൽ പ്രശസ്തനായ സാനു മാഷ്, 40ലേറെ കൃതികൾ രചിച്ചു. ‘കാറ്റും വെളിച്ചവും’, ‘ചക്രവാളം’, ‘നാരായണ ഗുരുസ്വാമി’, ‘ബഷീർ: ഏകാന്തവീഥിയിലെ അവധൂതൻ’ തുടങ്ങിയവ അദ്ദേഹത്തിന്റെ പ്രധാന കൃതികളാണ്. ‘കർമഗതി’ എന്ന ആത്മകഥയും ശ്രദ്ധേയമാണ്. എഴുത്തച്ഛൻ പുരസ്കാരം, കേന്ദ്ര സാഹിത്യ അക്കാദമി അവാർഡ്, വയലാർ അവാർഡ് തുടങ്ങി നിരവധി ബഹുമതികൾ അദ്ദേഹത്തെ തേടിയെത്തി.

1986ൽ പുരോഗമന കലാസാഹിത്യ സംഘം സംസ്ഥാന പ്രസിഡന്റായും 1987ൽ എറണാകുളം നിയമസഭാ മണ്ഡലത്തിൽ ഇടതുപക്ഷ സ്വതന്ത്രനായി മത്സരിച്ച് കോൺഗ്രസ് നേതാവ് എ.എൽ. ജേക്കബിനെ പരാജയപ്പെടുത്തി വിജയിച്ചും അദ്ദേഹം ശ്രദ്ധേയനായി. കേരള സാഹിത്യ അക്കാദമി പ്രസിഡന്റ്, എം.ജി. യൂണിവേഴ്സിറ്റി ശ്രീനാരായണ ചെയർ ഡയറക്ടർ, വയലാർ രാമവർമ്മ ട്രസ്റ്റ് ചെയർമാൻ, ഭാരതീയ വിദ്യാഭവൻ വൈസ് ചെയർമാൻ തുടങ്ങി നിരവധി സ്ഥാനങ്ങൾ വഹിച്ച അദ്ദേഹം, മലയാള സാഹിത്യത്തിനും സാംസ്കാരിക മേഖലയ്ക്കും നൽകിയ സംഭാവനകൾ അനശ്വരമാണ്.

Renowned Malayalam literary critic, writer, and former MLA, Professor M.K. Sanu, fondly called "Sanu Master," passed away at 97 in a private hospital in Ernakulam on Friday at 5:35 PM. Admitted after a fall that injured his hip, his condition worsened post-surgery. Born on October 27, 1928, in Alappuzha, Sanu authored over 40 works, including Kattum Velichavum and Karmagati, and received prestigious awards like the Ezhuthachan Puraskaram. A distinguished educator and orator, he served as a college professor and held significant cultural roles, leaving an indelible mark on Kerala's literary and cultural landscape