മുംബൈ: കൈയക്ഷരം മോശമായതിന് വിദ്യാർഥിയോട് ട്യൂഷൻ അധ്യാപികയുടെ ക്രൂരത. കയ്യിൽ മെഴുകിതിരികൊണ്ട് പൊള്ളിച്ചാണ് അധ്യാപിക കുട്ടിയെ ശിക്ഷിച്ചത്. മുംബൈ മലഡ് ഈസ്റ്റിലാണ് സംഭവം. എട്ട് വയസ്സുള്ള മുഹമ്മദ് ഹംസ ഖാൻ എന്ന കുട്ടിയുടെ ഇടത്തെ കയ്യിലാണ് പൊള്ളലേറ്റത്. സംഭവത്തിൽ രാജശ്രീ റാത്തോർ എന്ന അധ്യാപികക്കെതിരെ പൊലിസ് കേസെടുത്തു.

ഗോരേഗാവിലെ ഒരു സ്കൂളിൽ മൂന്നാം ക്ലാസ് വിദ്യാർഥിയാണ് മുഹമ്മദ്. മലാദിലെ ജെ.പി ഡെക്സ് കെട്ടിടത്തിൽ താമസിക്കുന്ന രാജശ്രീ റാത്തോഡിന്റെ അടുത്ത് എല്ലാ വൈകുന്നേരവും ട്യൂഷനായി വിദ്യാർഥി പോകാറുണ്ടായിരുന്നു. കുട്ടി മാതാപിതാക്കൾക്കും മൂത്ത സഹോദരിക്കുമൊപ്പം മലഡ് ഈലാസ്റ്റിണ് താമസിക്കുന്നത്. കുട്ടിയുടെ പിതാവ് ഒരു കച്ചവടക്കാരനാണ്. വൈകുന്നേരം 7 മുതൽ രാത്രി 9 വരെയാണ് ട്യൂഷൻ. പിതാവ് കച്ചവട തിരക്കിൽ ആയതിനാൽ സഹോദരിയാണ് കുട്ടിയെ സ്ഥിരമായി ട്യൂഷന് വിടാറുള്ളത്. 

ALSO READ: 40കാരൻ 13കാരിയെ വിവാഹം ചെയ്തു; സാക്ഷി ആദ്യ ഭാര്യ, കൂട്ടുനിന്നത് അമ്മ, പുരോഹിതൻ ഉൾപ്പെടെയുള്ളവരെ അറസ്റ്റ് ചെയ്ത് പൊലിസ്

സംഭവദിവസവും കുട്ടിയുടെ സഹോദരി അവനെ ട്യൂഷനു വിടാൻ പോയിരുന്നു. രാത്രിയിൽ, അധ്യാപിക കുട്ടിയുടെ പിതാവിനെ വിളിച്ച് കുട്ടിയെ കൂട്ടിക്കൊണ്ടുപോകാൻ ആവശ്യപ്പെട്ടു. പതിവുപോലെ മകളെ അയാൾ പറഞ്ഞയച്ചു. എന്നാൽ അവിടെയെത്തിയ സഹോദരി, കുട്ടി കരയുന്നതും കൈയിൽ പൊള്ളലേറ്റ പാടുകളും കണ്ട് അധ്യാപികയോട് കാര്യം അന്വേഷിച്ചെങ്കിലും അതൊരു നിസ്സാര പ്രശ്നമാണെന്ന് പറഞ്ഞ് അവഗണിക്കുകയായിരുന്നു. 

എന്നാൽ വീട്ടിലെത്തിയപ്പോൾ, കുട്ടി പിതാവിനോട് അധ്യാപിക തന്റെ കൈപ്പത്തിയിൽ കത്തുന്ന മെഴുകുതിരി കൊണ്ട് പൊള്ളിച്ചതാണെന്ന് വെളിപ്പെടുത്തുകയായിരുന്നു. പിന്നാലെ കുട്ടിയെ ആശുപത്രിയിൽ എത്തിച്ചതിന് ശേഷം പിതാവ് പരാതി നൽകുകയായിരുന്നു. 

സംഭവത്തിൽ ട്യൂഷൻ അധ്യാപികക്കെതിരെ പൊലിസ് എഫ്‌ഐആർ രജിസ്റ്റർ ചെയ്തു. ജുവനൈൽ ജസ്റ്റിസ് ആക്ട്, ഭാരതീയ ന്യായ സംഹിത എന്നീ വകുപ്പുകൾ പ്രകാരമാണ് കേസെടുത്തത്.