ജലന്ധര്‍: പഞ്ചാബിലെ ജലന്ധറിലും പാണക്കാട് മുഹമ്മദലി ശിഹാബ് തങ്ങള്‍ക്കായി സ്മാരകം ഒരുങ്ങി. ആഗസ്റ്റ് 22ന് ഉദ്ഘാടനം നടക്കും. നാല് നില കെട്ടിടത്തിലാണ് സാംസ്‌കാരിക കേന്ദ്രം തയാറാക്കിയിരിക്കുന്നത്. പഞ്ചാബിലെ ജലന്ധര്‍ പഗ്വാഡ ലൗലി പ്രൊഫഷണല്‍ യൂണിവേഴ്‌സിറ്റിക്ക് സമീപമാണ് പാണക്കാട് മുഹമ്മദലി ശിഹാബ് തങ്ങളുടെ പേരിലുള്ള സ്മാരകം നിര്‍മിച്ചത്.

കള്‍ച്ചറല്‍ സെന്റര്‍ എന്ന നിലക്ക് നിര്‍മിക്കുന്ന ശിഹാബ് തങ്ങള്‍ സ്മാരകത്തില്‍ വിപുലമായ ലൈബ്രറിയും മിനി കോണ്‍ഫറന്‍സ് ഹാളും പ്രാര്‍ഥനാ റൂമുകളും 20 വിദ്യാര്‍ത്ഥികള്‍ക്ക് താമസിക്കാവുന്ന ഹോസ്റ്റലും രക്ഷിതാക്കള്‍ക്ക് ഉപയോഗിക്കാവുന്ന ഗസ്റ്റ് റൂമുകളും വിദ്യാര്‍ത്ഥികള്‍ക്കായി മെസ് സൗകര്യവും പ്രവര്‍ത്തിക്കുന്നതായിരിക്കും. അത്യാധുനിക സൗകര്യങ്ങളോടെയുള്ള കെട്ടിടം കേരളത്തില്‍ നിന്നുളള എഞ്ചിനിയര്‍മാരുടെയും കോണ്‍ട്രാക്ടര്‍മാരുടെയും മേല്‍നോട്ടത്തിലാണ് നിര്‍മിച്ചിരിക്കുന്നത്. അയ്യായിരത്തോളം മലയാളി വിദ്യാര്‍ത്ഥികള്‍ക്ക് സാംസ്‌കാരിക കേന്ദ്രം ഉപകരിക്കും എന്നാണ് കണക്കാക്കുന്നത്.

സാംസ്‌കാരിക കേന്ദ്രത്തിന്റെ ഉദ്ഘാടനം ആഗസ്റ്റ് 22ന് പാണക്കാട് സാദിഖലി ശിഹാബ് തങ്ങള്‍ നിര്‍വഹിക്കുക. നിലവില്‍ എംഎസ്എഫ് ദേശിയ വൈസ് പ്രസിഡന്റും മുന്‍ ലൗലി യൂണിവേഴ്‌സിറ്റി വിദ്യാര്‍ഥിയുമായ മണ്ണാര്‍ക്കാട് സ്വദേശി അസ്‌ലം, അവിടെ പഠിക്കുന്ന വിദ്യാര്‍ത്ഥികള്‍ നേരിടുന്ന അസൗകര്യങ്ങളെ ചൂണ്ടിക്കാണിച്ച് 2015ല്‍ വിഡിയോ പങ്കുവെച്ചിരുന്നു.

തുടര്‍ന്ന് മുനവറലി ശിഹാബ് തങ്ങള്‍ അസ്‌ലമിനെ ബന്ധപ്പെടുകയും പിന്നാലെ മുനവറലി ശിഹാബ് തങ്ങള്‍ ചെയര്‍മാനായി ട്രസ്റ്റ് രൂപീകരിക്കുകയും ചെയ്തു. ഈ ട്രസ്റ്റിന്റെ കീഴില്‍ 2017ല്‍ 15 സെന്റ് സ്ഥലം വാങ്ങി. സാംസ്‌കാരിക കേന്ദ്രത്തിന് തറക്കല്ലിട്ടു. കോവിഡ് കാലത്ത് നിര്‍മാണ പ്രവൃത്തികള്‍ മുടങ്ങിപ്പോയിരുന്നു. 2023ലാണ് നിര്‍മാണം പുനരാരംഭിച്ചത്. ഇപ്പോള്‍ നിര്‍മാണം പൂര്‍ത്തിയാക്കിയ കെട്ടിടം ഉദ്ഘാടനത്തിന് മുമ്പ് അവസാനവട്ട മിനുക്ക് പണികള്‍ പൂര്‍ത്തിയാക്കുകയാണ്.