വാഷിംഗ്ടൺ: വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റിനെ പ്രശംസിച്ചതിന്റെ പേര് പറഞ്ഞ് ഡോണൾഡ് ട്രംപിനെതിരെ വ്യാപക വിമർശനം. തന്റെ പ്രസ് സെക്രട്ടറിയെ അഭിനന്ദിക്കാൻ ഉപയോഗിച്ച അനുചിതമായ വാക്കുകൾ വിവാദമായി. കരോലിൻ തനിക്ക് ലഭിച്ച ഏറ്റവും മികച്ച പ്രസ് സെക്രട്ടറിയാണെന്ന് വിശേഷിപ്പിച്ച ട്രംപ്, അതിരുകവിഞ്ഞ വ്യക്തിപരമായ പരാമർശങ്ങളും നടത്തി.

ന്യൂസ്മാക്സിന് നൽകിയ അഭിമുഖത്തിൽ, ട്രംപിന്റെ നേട്ടങ്ങൾക്ക് സമാധാന നൊബേൽ സമ്മാനം ലഭിക്കണമെന്ന് കരോലിൻ അവകാശപ്പെട്ടതിന് മറുപടിയായാണ് ട്രംപ് ഇങ്ങനെ പ്രതികരിച്ചത്. “അവൾ ഒരു താരമായി മാറി. ആ മുഖം, ആ ബുദ്ധി, ആ ചുണ്ടുകൾ, അവ ചലിക്കുന്ന രീതി... ഒരു മെഷീൻ ഗൺ പോലെയാണ്. അവൾ അതിശയകരമാണ്, ഇത്ര മികച്ച പ്രസ് സെക്രട്ടറി മറ്റാർക്കും ഉണ്ടായിട്ടില്ല,” ട്രംപ് പറഞ്ഞു.

കഴിഞ്ഞ വൈറ്റ് ഹൗസ് വാർത്താസമ്മേളനത്തിൽ, കരോലിൻ ട്രംപിന്റെ അന്താരാഷ്ട്ര നേട്ടങ്ങളെ പ്രശംസിക്കുകയും, അധികാരമേറ്റ് ആറ് മാസത്തിനിടെ ഓരോ മാസവും ശരാശരി ഒരു സമാധാന ഉടമ്പടിയോ വെടിനിർത്തലോ നേടിയെന്ന് അവകാശപ്പെടുകയും ചെയ്തിരുന്നു. എന്നാൽ, ട്രംപിന്റെ പരാമർശങ്ങൾ സാമൂഹിക മാധ്യമങ്ങളിൽ വലിയ വിമർശനത്തിന് ഇടയാക്കി. “ഇത് ജെഫ്രി എപ്സ്റ്റീന്റെ സുഹൃത്ത് പറയുന്നതുപോലെ തോന്നുന്നു,” എന്നാണ് ഒരു ഉപയോക്താവ് കുറിച്ചത്. ട്രംപിനും ലൈംഗിക കുറ്റവാളിയായ എപ്സ്റ്റീനുമായുള്ള ബന്ധം യുഎസിൽ വിവാദമാണ്.

“ഒരു പുരുഷൻ ജോലിസ്ഥലത്ത് സഹപ്രവർത്തകയെക്കുറിച്ച് ഇങ്ങനെ പറഞ്ഞിരുന്നെങ്കിൽ, അവനെ പുറത്താക്കുകയും കമ്പനിക്കെതിരെ കേസെടുക്കുകയും ചെയ്യുമായിരുന്നു,” എന്ന് മറ്റൊരാൾ പ്രതികരിച്ചു. മുഖ്യധാരാ മാധ്യമങ്ങൾ ഈ വിഷയത്തിൽ ട്രംപിനോടോ വൈറ്റ് ഹൗസിനോടോ ചോദ്യങ്ങൾ ഉന്നയിക്കുന്നില്ലെന്നും വിമർശകർ ചൂണ്ടിക്കാട്ടി. “ഇത്ര അനുചിതവും അരോചകവുമായ പരാമർശങ്ങളെക്കുറിച്ച് മാധ്യമങ്ങൾ മൗനം പാലിക്കുന്നത് ഉത്തരവാദിത്തമില്ലായ്മയാണ്,” എന്ന് ഒരു പോസ്റ്റിൽ പറയുന്നു.

Donald Trump sparked widespread criticism for praising White House Press Secretary Karoline Leavitt in a Newsmax interview, calling her a "star" with remarks about her "face," "lips," and their "machine gun" movement. Netizens labeled the comments unprofessional and disturbing, with some referencing Trump's ties to Jeffrey Epstein. Critics slammed the media for not addressing the remarks.