നോയിഡ: മാനസിക വെല്ലുവിളി നേരിടുന്ന മകനുമായി 13-ാം നിലയില്‍ നിന്ന് ചാടി യുവതി ആത്മഹത്യ ചെയ്തു. ഗ്രേറ്റര്‍ നോയിഡ വെസ്റ്റിലെ ഏസ് സിറ്റി ബില്‍ഡിങില്‍ ശനിയാഴ്ച്ച രാവിലെ 10 മണിയോടെയാണ് സംഭവം,

ന്യൂറോഡവലപ്പ്മെന്റല്‍ ഡിസോര്‍ഡറുള്ള 11 വയസുകാരന്‍ കഴിഞ്ഞ പത്തുവര്‍ഷമായി ചികിത്സയിലാണ്. ഇത് യുവതിയെ മാനസികമായി തളര്‍ത്തിയിരുന്നു. ഇതിനെ തുടര്‍ന്നായിരുന്നു യുവതി ജീവനൊടുക്കാന്‍ തീരുമാനിച്ചത്. തന്റെ മരണത്തില്‍ ആരും ഉത്തരവാദികളെല്ലെന്നും ഭര്‍ത്താവിനെ ഇനിയും ബുദ്ധിമുട്ടിക്കാനാവില്ലെന്നും യുവതി ആത്മഹത്യാകുറിപ്പില്‍ പറയുന്നു. 

'' ഞങ്ങള്‍ ഈ ലോകം വിടുന്നു. ഞങ്ങളുടെ മരണത്തിന് ആരും ഉത്തരവാദികളല്ല. ക്ഷമിക്കണം. ഇനിയും ഭര്‍ത്താവിനെ ബുദ്ധിമുട്ടിക്കാന്‍ ആഗ്രഹിക്കുന്നില്ല'- യുവതി ആത്മഹത്യാകുറിപ്പില്‍ പറയുന്നു. 

37 വയസ്സുള്ള സാക്ഷി അഗര്‍വാള്‍ ചാര്‍ട്ടേഡ് അക്കൗണ്ടന്റായ ഭര്‍ത്താവ് ദര്‍പണ്‍ ചാവ്ല,  മകന്‍ ദക്ഷ് എന്നിവര്‍ക്കൊപ്പമാണ് ഗ്രെയ്റ്റര്‍ നോയ്ഡയിലുള്ള ഫ്ളാറ്റില്‍ താമസിച്ചിരുന്നത്. 

സംഭവം നടക്കുമ്പോള്‍ യുവതിയുടെ ഭര്‍ത്താവും ഫ്ളാറ്റില്‍ ഉണ്ടായിരുന്നു. മകന് മരുന്ന് നല്‍കാനായി ഭര്‍ത്താവ് ആവശ്യപ്പെട്ടതിനെ തുടര്‍ന്ന് യുവതി മകനുമായി ബാല്‍ക്കണിയിലേക്ക് പോയിരുന്നു. താന്‍ മറ്റൊരു മുറിയിലായിരുന്നുവെന്നും നിലവിളി കേട്ട് ഓടിയെത്തുകയായിരുന്നുവെന്നുമാണ് ഇയാള്‍ പൊലിസിന് നല്‍കിയ മൊഴി. സംഭവത്തില്‍ പൊലിസ് അന്വേഷണം ആരംഭിച്ചു.