തിരുനാവായ:ഖാദർ കമ്മിറ്റി റിപ്പോർട്ടിലെ പ്രധാന നിർദേശമായ സ്കൂൾ ഏകീകരണത്തിന് സർക്കാർ പച്ചക്കൊടിവീശുന്നു. ഇതിനുള്ള അനുമതി ഉടനെയുണ്ടാകും. പൊതുവിദ്യാഭ്യാസ രംഗത്ത് സമഗ്രമാറ്റത്തിനാണ് ഇതോടെ വഴി തുറക്കുക. അധ്യാപക തസ്തികകളുടെ ക്രമീകരണവും വിദ്യാഭ്യാസ ഓഫിസുകളുടെ പുന:സംഘാടനവും വ്യവസ്ഥചെയ്യുന്ന സ്പെഷൽ റൂൾ ധനവകുപ്പിന്റെ അടിയന്തര പരിഗണനയിലാണ്. ധനവകുപ്പിൻ്റെ അനുമതി ലഭിച്ചാൽ ഉടൻ സ്‌കൂൾ ഏകീകരണം മന്ത്രിസഭ പരിഗണിക്കും. ഒന്നുമുതൽ എട്ടുവരെ ക്ലാസുകൾ പ്രൈമറി, ഒമ്പതു മുതൽ 12 വരെ സെക്കൻഡറി എന്നീ രണ്ട്  വിഭാഗങ്ങളാണ് ഉണ്ടാവുക. '

ഹയർ സെക്കൻഡറി' വിഭാഗം ഒമ്പത് മുതൽ 12 വരെ ക്ലാസുകൾ ഉൾപ്പെട്ട 'സെക്കൻഡറി' യുടെ കീഴിലാകും. ഇതോടെ ലോവർ പ്രൈമറി, അപ്പർ പ്രൈമറി, സെക്കൻഡറി, ഹയർ സെക്കൻഡറി എന്നീ നാല് തലങ്ങളാണ് രണ്ടായി ചുരുങ്ങുന്നത്. ഇതോടെ അധ്യാപക നിയമനത്തിൽ വലിയ മാറ്റുണ്ടാകും. സെക്കൻഡറിയിൽ സീനിയർ, ജൂനിയർ തസ്തിക ഉണ്ടാവില്ല. ഏകീകരണം നടപ്പാകുന്നതോടെ ഹയർ സെക്കൻഡറി അധ്യാപകർ ഹൈസ്കൂ‌ളിലും പഠിപ്പിക്കേണ്ടി വരും. നിലവിലുള്ള അധിക അധ്യാപകരെ പുനർവിന്യസിക്കാൻ സ്കൂ‌ൾ ഏകീകരണം സഹായകമാകും. സർക്കാരിന് സാമ്പത്തികമായി വലിയ ആശ്വാസമാകുന്ന നടപടിയാണിത്. ഹയർ സെക്കൻഡറിയിൽ ഓഫിസ് സ്റ്റാഫില്ലാത്തത് സെക്കൻഡറിയിലെ സ്റ്റാഫുകളെകൊണ്ട് പരിഹരിക്കപ്പടും. പുതുതായി സൃഷ്‌ടിക്കപ്പെടുന്ന പി.ഐ.ഒ തസ്തികയിൽ അധ്യാപകരെ സ്ഥാനക്കയറ്റം നൽകി നിയമിക്കുന്നതിനാൽ പുതിയ ബാധ്യതയും വരില്ല.

സ്കൂൾ ഏകീകരണത്തോടെ വിദ്യാഭ്യാസ ജില്ല ഇല്ലാതാവും. പൊതുവിദ്യാഭ്യാസം ത്രിതല പഞ്ചായത്ത് സംവിധാനത്തിന് കീഴിൽ വികേന്ദ്രികരിക്കപ്പെടും. സ്കൂൾ മേൽനോട്ടത്തിനായി എല്ലാ തദ്ദേശ സ്ഥാപനങ്ങളിലും വിദ്യാഭ്യാസ ഓഫിസർ എന്ന് പുതിയ തസ്തിക വരും. പ്രഥമാധ്യാപകർ ഉൾപ്പെടെയുള്ളവരെ ഇതിലേക്ക് സ്ഥാനക്കയറ്റം നൽകി നിയമിക്കും.